Micah 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Mu nnaku ez'oluvannyuma, olusozi lw'Ekiggwa ky'Omukama lulissibwawo nga lutikko mu nsozi zonna; luligulumizibwa ne lulengezza obusozi; abantu balikuluggukira gye luli.

2Amawanga mangi galijja, ne bagamba nti: “Mujje twambuke ku lusozi lw'Omukama, eri Ekiggwa kya Katonda wa Yakobo, atuyigirize amakubo ge, tutambulire mu bukubo bwe. Kubanga etteeka liriva mu Siyoni, n'ekigambo ky'Omukama kiriva mu Yeruzaalemu.”

3Aliramula abantu bangi; alisalirawo amawanga ag'amaanyi ag'ewala eyo; ebitala byabwe balibiweesaamu enkumbi, n'amafumu baligawesaamu ebiwabyo. Eggwanga teririgalulira ggwanga linnaalyo kitala, era tebaliddayo kuyiga bya ntalo.

4Buli omu alituula wansi w'omuzabbibu gwe ne wansi w'omukunyu gwe; tewalibaawo abakanga, kubanga akamwa k'Omukama w'Amagye koogedde.

5Buli ggwanga liritambulira mu linnya lya lubaale waalyo, naye ffe tulitambulira mu linnya lya Mukama Katonda waffe emirembe n'emirembe.

6“Ku olwo,” Omukama y'agamba, “ndikuŋŋaanya ennema, eziwabye ndizizza, ne ze nali ndabizza ennaku.

7Ennema ndizifuulamu abaasigalawo, n'ezo ezaagobwa, eggwanga ery'amaanyi. Omukama alibafuga ng'ayima ku lusozi Siyoni, okuva ku olwo n'emirembe gyonna.

8Kati ggwe, munaala gw'eggana, akasozi ka muwala wa Siyoni, obuyinza obwasooka bulikuddizibwa, obwakabaka buliddira muwala wa Yeruzaalemu.”

9Kati lwaki okuba ebiwoobe bityo? Mu ggwe temuli kabaka? Akuwa ku magezi yazaawa. Okulumwa kyekuvudde kukukwata ng'omukazi azaala?

10Weenyoole mu bulumi, muwala wa Siyoni, ng'obw'omukazi azaala, kubanga kati otuuse okuva mu kibuga, ogende osule ku ttale; ojja kugenda e Babiloni; eyo gy'oliwonyezebwa, eyo Omukama gy'alikununulira okuva mu mikono gy'abalabe bo.

11Gaago nno amawanga mangi gakukuŋŋaaniddeko, gagamba nti: “Agwagwawaziddwa, amaaso gaffe geerolere Siyoni.”

12Kubanga bo bennyini tebaamanya birowoozo bya Mukama, tebaategeera ntegeka ze, oyo abakuŋŋaanya ng'emiganda gy'eŋŋano mu gguuliro.

13“Situka, muwala wa Siyoni, wuula! Kubanga ejjembe lyo nzija kulifuula lya kyuma, n'ebinuulo byo, bya kikomo, ojja kubetenta amawanga mangi. Bye baanyaga olibiwongera Omukama, n'eby'obugagga bwabwe, Omukama w'ensi yonna.”

14Nnyweza bbugwe wo, wattu ekibuga ekibugirize, kubanga tuzindiddwa. Balikuba omufuzi wa Yisirayeli ku ttama n'oluga.

← Chapter 3 Jump to: Chapter 5 →