Micah 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Awo ne ŋŋamba nti: “Muwulire mmwe, abafuzi b'ennyumba ya Yakobo, mmwe abakungu b'ennyumba ya Yisirayeli. Si mmwe mwandimanye ennunula entuufu,

2mmwe abakyawa ekirungi ne mwagala ekibi, mmwe abasusumbula ensusu ku bantu bange, n'ennyama yaabwe ne mugiryako ku magumba gaabwe;

3mmwe abalya ennyama y'abantu bange, ne mubabaagako enkuta, n'amagumba gaabwe ne mugamenyaamenya; mmwe abatemaatema ebifi ng'ennyama ey'omu ntamu, ng'ennyama ey'omu nsaka?”

4Omukama balimulaajanira, naye talibaanukula. Ku olwo alibakweka amaaso ge, olw'okubeera ebibi byabwe bye baakola.

5Omukama kino ky'agamba ku balanzi abawubisa abantu bange: “Bwe babaako n'ekyokulya, bagamba nti ‘Mirembe,’ naye oli bw'atabassa kantu mu kamwa, bamuggulako lutalo.

6Awo nno ekiro kiribakwatiriza nga temulabikiddwa, n'ekizikiza, nga temulaguddwa. Enjuba erizaamira abalanzi, n'olunaku lulibafuukira enzikiza.

7Olwo abalabi balikwatibwa ensonyi, n'abalaguzi baliswala; bonna balyebikka ku maaso gaabwe, kubanga Katonda takyayanukula.”

8Naye nze nzijudde amaanyi, nzijudde Mwoyo wa Katonda, n'obutuufu n'amaanyi, okubuulira Yakobo omusango gwe ne Yisirayeli ekibi kye.

9Kale nno mmwe abakungu ab'omu nnyumba ya Yakobo, mmwe abafuzi ab'ennyumba ya Yisirayeli, muwulire kino: mmwe abeenyinyala obutuufu ne mukyamya buli kituufu;

10mmwe abazimbira Siyoni ku kuyiwa omusaayi, ne Yeruzaalemu ku kukola obubi.

11Abakungu baakyo balamulira nguzi: bakabona baakyo bayigiriza lwa mpeera; n'abalanzi balagulira ssente. Sso ate beeyinula Omukama ne bagamba nti: “Omukama tali mu makkati gaffe? Akabi tekasobola kututuukako.”

12Kale nno olw'okubeera mmwe, Siyoni alikabalwa ng'ennimiro, Yeruzaalemu alifuuka kifulukwa, n'olusozi lw'Ekiggwa, ntuumu okumeze ekibira.

← Chapter 2 Jump to: Chapter 4 →