Micah 7

Luganda (BIBU1) (BIBULIYA ENTUKUVU)

← Chapter 6 Jump to:

1Zinsanze! Anti nfuuse ng'akungula ebibala eby'ekyeya, ng'omunozi w'emizabbibu. Teri kirimba kya kulyako, yadde entontogolo z'emikunyu ezisooka ze njoya.

2Mu nsi mubuzeemu abalungi; temukyali mutuufu n'omu. Bonna bateegeredde kuyiwa musaayi; buli omu ayigga munne n'ekitimba.

3Emikono gyabwe gyombi gyetegekedde kukola kabi; omufuzi aliko ky'asabayo, n'omulamuzi akkiriza enguzi, n'ali mu buyinza alagira nga bw'ayagala; bonna beekobaanidde wamu.

4Abasingamu obulungi ali nga kirobo, abasingamu obutuufu ali ng'olukomera olw'amaggwa. Lwe lunaku lw'abakuumi baabwe, olunaku lw'okubonerezebwa kwo lutuuse; ke kadde batabuketabuke.

5Teweesiganga muliraanwawo; tossanga bwesige mu mukwano gwo; ne bw'aba mukazi eyeebaka mu mikono gyo, weegenderezanga ebigambo by'akamwa ko.

6Kubanga omwana ow'obulenzi anyooma kitaawe, n'ow'obuwala asitukira mu nnyina, mukaamwana ayimukira mu nnyazaala we; abalabe b'omuntu be bantu ab'ennyumba ye.

7Naye nze nnindirira n'essuubi Omukama, nnindirira Katonda Omulokozi wange, Katonda wange anampulira.

8Ggwe omulabe wange, tosanyukira nnaku yange; lwa kugwa, naye ndiddawo; lwa kutuula mu nzikiza, naye Omukama y'aliba ekitangaala kyange.

9Nzija kugumiikiriza obusungu bw'Omukama, kubanga namusobya, okutuusa lw'aliramula ensonga zange, n'annejjeereza. Alinfulumya mu kitangaala, ndiraba obutuukirivu bwe.

10Olwo omulabe wange aliraba, alijjula ensonyi, oyo eyankiinanga nti: “Omukama Katonda wo ali ludda wa?” Amaaso gange galimutunuulira, ku luno nga bw'alirinnyirirwa ng'ebitoomi by'omu nguudo.

11Olunaku olw'okuzimba bbugwe wo. Ku olwo ensalo zo zirigaziyizibwa.

12Ku olwo balijja gy'oli okuva mu Assuri okutuuka e Misiri, n'okuva mu Misiri okutuuka ku Mugga, n'okuva ku nnyanja okutuuka ku nnyanja, n'okuva ku lusozi okutuuka ku lusozi.

13Ensi erifuuka eddungu olw'okubeera abagisulamu, nga kye kibala ky'ebikolwa byabwe.

14Abantu bo balunde n'omuggo gwo, eggana ly'obusika bwo, abali eyo bokka mu kibira, wakati mu nsi ey'ennimiro; balundire e Basani n'e Gileyaadi nga mu nnaku ez'edda.

15Nga luli lwe wava e Misiri, tulage ebyewuunyisa byo.

16Amawanga galiraba ne gaswala yadde ne ku maanyi gaabwe ago gonna; balikwata ku mumwa, amatu gaabwe galiziba.

17Balikomba enfuufu ng'omusota, ng'ebyewalula ku ttaka. Baliva mu mikwesese gyabwe nga bakankana; balidda eri Omukama Katonda waffe mu kutya; balikutya.

18Katonda, ani akwenkana, ggwe asonyiwa ekibi, ab'obusika bwo abaasigalawo n'obasonyiwa emisango? Tosunguwala bbanga lyonna, naye osanyukira mu kulaga ekisa.

19Oliddamu n'otusaasira, olirinnyirira ebibi byaffe, ebyonoono byaffe byonna olibikanyuga mu ddubi mu nnyanja.

20Oliba mwesigwa eri Yakobo, ne Yiburayimu n'omulaga ekisa nga bwe walayirira bajjajjaffe okuva edda n'edda.

← Chapter 6 Jump to: