Micah 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Zibasanze abalowoolereza obubi, abateesa eby'obukambwe nga bali mu bitanda byabwe! Bwe bukya ne bakikola, kubanga balina obuyinza okukituukiriza.

2Beegomba ennimiro, ne baziwamba; beegomba amayumba ne bagatwala; banyakulako omuntu ennyumba ye, ne bantu bannaabwe, obusika bwabwe.

3Omukama kyava agamba nti: “Nteesa okukolera ennyumba eno akabi, ke mutaasobole kununulamu nsingo zammwe. Temulitambuza malala, kubanga obudde buliba bwa kacwano.

4Ku olwo balibayisaako olugero, balibakiina mu nnyimba zaabwe ezikungubaga nti: ‘Tusigalidde ddala ttayo, omugabo gw'abantu bange agugabanyizzaamu, laba bw'agunzigyeeko! Ennimiro zaffe laba bw'azigabudde abajeemu.’ ”

5Mu lukuŋŋaana lw'Omukama kyoliva obulwamu akuwa akalulu osalirweko ennimiro.

6“Temuyigiriza,” bwe batyo bwe bayigiriza, “temuyigiriza ku bino, okuswala tekulitugwira.”

7Kino kyandyogeddwa, wattu nnyumba ya Yakobo: nti: “Mwoyo w'Omukama takyagumiikiriza? Y'akola bino?” “Ebigambo byange tebikolera bulungi oyo atambula obutereevu?

8Mmwe mulumba abantu bange kyenkana ng'omulabe wammwe; aba yeetambulira agage mumukwakkulako omunagiro gwe, aba mu ddembe lye mumuyisa ng'omusibe w'omu lutalo.

9Abakazi b'abantu bange mubagoba mu nnyumba ze beesiimiramu, n'abaana baabwe ne mubaggyako ekitiibwa kyabwe emirembe gyonna.

10Musituke, mugende! Wano tewali buwummuliro, kubanga kyayonooneka, kyafaafaagana; kyazikirizibwa obutazzikawo.

11Singa omuntu ajja ng'ayogera bya mpewo na bulimba nti: ‘Nzija kulanga gye muli evviini n'omwenge,’ oyo ye yandibadde omulanzi w'abantu bano.

12“Nzija kukukuŋŋaanya wenna, ggwe Yakobo; nzija kuleeta wamu abasigaddewo mu Yisirayeli; nzija kubaleeta wamu ng'endiga mu kisibo, ng'eggana mu ddundiro lyalyo; ebbiina eriwuuma olw'obungi bw'abantu.

13Abaggulirawo ekkubo n'ayambuka ng'abakulembedde, balifubutuka ne bayita mu mulyango, balifulumira mu gwo. Kabaka waabwe aliyitawo ng'abakulembeddemu, Omukama nga y'abali mu maaso.”

← Chapter 1 Jump to: Chapter 3 →