Micah 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1“Naawe Beteleemu Efurata, asembayo obutono mu bika bya Yuda, mu ggwe mwe mulinviira ow'okufuga mu Yisirayeli. Ensibuko ye eri eyo mu mirembe egy'edda, mu nnaku eza ddi na ddi.”

2Olw'okubeera ekyo Omukama alibaabuliramu akabanga, okutuusa oyo ali olubuto lw'alizaala. Olwo abasigaddewo mu baganda be balidda eri Abayisirayeli.

3Aliyimirira n'alunda eggana lye mu maanyi g'Omukama, mu bukulu bw'erinnya ly'Omukama Katonda we; olwo balituula ntende, kubanga olwo aliba mukulu okutuuka ku nkingi z'ensi.

4Y'aliba eddembe. Assuri bw'alizinda ensi yaffe, bw'alisambirira embiri zaffe, tulimusitulira abasumba musanvu okumulwanyisa, n'abaami munaana ab'abantu.

5Balifuga ensi ya Assuri n'ekitala, ensi ya Nimurodi n'ekitala ekisowole. Alitununula mu Bassuri, bw'alijja mu nsi yaffe, bwalirinnya ekigere kye mu kitundu kyaffe.

6Abaasigalawo mu Yakobo baliba wakati w'abantu enkumu, ng'omusulo oguva ew'Omukama, ng'oluwandaggirize ku bimera ebitalinda muntu, ebitalwa lwa baana ba bantu.

7Abaasigalawo mu Yakobo baliba wakati mu mawanga, wakati mu bantu abangi; baliba ng'empologoma wakati mu bisolo by'omu bibira, ng'omwana gw'empologoma mu ggana ly'endiga, ogulinnyirira nga bwe gugenda, oguyuzaayuza obulere nga tewakyali asobola kutaasa.

8Omukono guliwanikibwa ku balabe bo, abakukyawa bonna balikutulwako.

9“Ku olwo,” Omukama y'agamba, “embalaasi zo ndizizikiriza mu ggwe, n'ensaanyaawo ebigaali byo.

10Ndizikiriza ebibuga by'ensi yo, ndimenyawo ebigo byo byonna.

11Eby'obulogo ndibiggya mu mikono gyo, toliddamu kubeera na balaguzi.

12Ndizikiriza ebifaananyi byo ebya balubaale n'empagi zo emponge ndizikusimbulamu; toliddayo kuvunnamira mikono gyo bye gikoze.

13Empagi za Asera nzija kuzikuulamu n'ebibuga byo mbizikirize.

14Ndiwoolera eggwanga mu busungu n'obukambwe ku mawanga agaagaana okuwulira.”

← Chapter 4 Jump to: Chapter 6 →