Ecclesiastes 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Mi ’be mikate mini yi mirini ma dria, mini ngale eri isule dika o’du kakau ma vutiarisi.

2Mi awa eseleni ’ba aziri dri kani ’ba aro dri, mini e’yo onzi ngapi ovupi nyakuari nile kurisi.

3Iriti ka ga tre ozoosi yi nga yi osu nyaku dria; azini pati ka ’de kala uruleru kani kala andralaru, pari patini ’dezuria eri nga la ’daa.

4’Ba oli ndrepiri ngani ori ri ku; ’ba iriti ma e’yo egapiri ngani anya lo ku.

5Mini oli ma geri nile kurile, mini geri falani zozu oku okporovururi ma okpojo ma aliari nile kurile indi, ’dinile mi nini Mungu afa dria ’yepiri ma azi ku.

6Mi ri ori mini o’bitisi, ondresi mi nze mi dri ku; a’disiku mi nini ku afa ngori nga i ’ye drilebasi, kani ’diri, kani ’dari, kani yi iritro nga ’ye onyiru yani.

7Ada, diza eri aluzaru, mileni etu ndrezuri ovu ayikoru tu.

8Ada, ’ba ka ovu idriru eli kakau, eri ma ovu ayikosi eli ndesi dria; te eri ma ega o’du inini ’diyi, yini ngale ovule kakaurisi, E’yo dria emupiri eri e’yo tokoni.

9Karilau, mi ma ovu di ayikosi eli mini karilaunirisi, mi fe mi asi ma fe mi dri ayiko ewu miru ovuzu karilaururisi; mi aci geri mi asini leleri ma alia, azini mi mileni ndrelerile. Te mi ma ni e’yo ’diyisi dria Munguni nga mi eji e’yo liza ma alia ra.

10E’yo ’disi mi ofu candi mi asiari amve, mi nze e’yo onzi mi ruaasi; te ewu karilauniri pi yi toko, ewu ’ba ruani ovuzu okporu turi be.

← Chapter 10 Jump to: Chapter 12 →