Ecclesiastes 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Afa dria alu alu ovu ewu yini be, e’yo dria ’bu ma etiari ovu etu yini be indi;

2etu ’bani osizuri pi, etu ’bani drazuri pie I etu ’bani afa sazu nyakuari pie, etu afa sale nyakuari okuzuri pie;

3etu ’ba fuzuri pie, etu ’ba rua atizuri pie; etu afa oguzu vari pie, etu afa edrezu ururi pie;

4etu wuzu mindresiri pie, etu oguta oguzuri pie; etu awu wuzuri pie, etu ongo tuzuri pie;

5etu oni o’bezuri pie, etu oni okuzu tualuri pie; etu ’ba o’dezu avasiri pie, etu ’ba o’deza kuzu jari pie;

6etu afa ndazuri pie, etu afani avizuri pie; etu afa ta mbazuri pie, etu afa dazu amveri pie;

7etu bongo osizuri pie, etu bongo sozuri pie; etu ovuzu ciriri pie, etu e’yo ’yozuri pie;

8etu ’ba lezu avasiri pie, etu ’ba nguzu onziri pie; etu ombani pie, etu asi anzuruniri pie.

9’Ba azi ngapi okposiri ma orodri ngoni azi okporu erini ma alia ya?

10Ma ndre azi ewaru Munguni fele ’ba ma ori dri yini andezu aniri ra.

11Eri ede afa dria ndrizaru ewu yinisi: eri ’ba egata ewu ’dani ’danirini ’ba ma asia indi, te ti, ’ba econi azi Munguni ’yele ’bori ma e’yo ndazu nizu engazu e’dozania kpere asizaniria ku.

12Ma ni ra kini afa azini yi dri onyiru agapi rani yo, lu yi ma ovu ayikosi, ma ’ye onyiru de nga yi drani ku;

13azini indi Mungu fe ’ba dri afa feza ’dini, yi alu alu ma nya, ma mvu, ma ovu ayikosi azi yini ma alia onyiru.

14Ma ni ra kini afa dria, ka ovu ngoni ti, Munguni ’yeleniri nga adri ’dani ’danini; ’ba econi afa azini o’ba ruania ku, ’ba econi vini afa azini onzezaru ruaniasi ku indi; Mungu ’ye ’dini kini ’ba ma ovu urisi eri ma drilia ani beni.

15Afa ovupi curu’do indiri eri afa ndra ovupi driori’i; te afa ngapi ovupiri eri afa ndra ovupi driori’i; te Munguni afa agapi ’bori nda dika.

16Azini vini indi ma ndre etu etia ’dini, e’yo onzi indi pari e’yo lizuria, azini e’yo onzi indi pari e’yo onyiruruna.

17Te ma ’yo ma asia kini Munguni nga ’ba kililiru ’diyi pi ma e’yo li, ’ba onzi ’diyi be; a’disiku ewu indi e’yo dria ma e’yosi, azini azi dria ma e’yosi indi.

18Ma ’yo ma asia, Eri ’dini ’ba ori ma e’yosi, ’dini Mungu eco yi o’bizaru ani, yi ma ndre ani kini yi ma ngulupi ovu kile anyapa asea ’diyile.

19A’disiku e’yo alu i ’yepi ’ba ma ori ma ruaari ’ye i anyapa ruaa indi; ada, afa alu eca yi ma ruaa driani: ekile alurini dralerile aziniri dra alu indi ’dinile. Ada, yi dria ovu ava ’yaza be alu, te ’ba agani anyapa aluni ku; e’yo driani ovule tokorurisi.

20Dria mu pari alua, dria ebi enga irifura ma alia, dria nga eca irifuraru dika.

21A’di ni orindi ’bani ma e’yo kani eri tu uru, kani anyapaniri eri si va nyakuarini ya?

22E’yo ’disi ma ndre afa azini onyiru agapini yo, pe lu ’ba ma ovu ayikosi azi erini ma alia, a’disiku ’diri esele eriniri; te a’dini nga eri omvi dika afa i ’yepi eri ma vutiari ndrezuni ya?

← Chapter 2 Jump to: Chapter 4 →