Judges 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Eri nga eca drata Yosuani ma vutia ’dini, anzi Israelini zi Yehovani kini, A’dini nga tu amani ’ba Kananini ’diyi vu oko, a’di ’dizu yi beni ya?

2Yehova nga ’yo kini, Yudani nga tuni; mi lu, ma fe angu nderi eri ma dria ’bo.

3Yuda nga di ’yo i adripi Simeoni ma tia, Mi etu ma be fi awuruso ma vileria, ’dini ama ma mu a’di ’dizu ’ba Kananini be; ’dinile indi ama nga mu mi be awuruso mi vileria ndo. ’Dinile Simeoni mu di eri be ra.

4Yuda tu di ra, Yehova fe ’ba Kananini ’diyi ’ba Perizini pie yi ma dria; yi ofu ’ba yi ma eselia alifu mudri Bezekia.

5Yi isu Adonibezeki Bezekia, yi ’di a’di eri be, yi ofu ’ba Kananini piyi ’ba Perizini pie.

6Te Adoni-bezeki apa ra; yi dro vutini, bi eri ra, oli eri ma driago pi, paago pie ra.

7Adoni-bezeki nga di ’yo ra, opi kali aziri ’bani driago yini olile paago pie ’bo ’diyi adri ndra nyaka yini oku mesa mani ma etia; ekile mani ’yelerile, ’dini Mungu ofe arotini masi ’do.

8Anzi Yudani nga a’di ’di Yerusalemu be, bi eri ra, fu eri sei ma sisi ra, ’ba aku nde ma ti acisi ra.

9Vutinia anzi Yudani si mu a’di I’dizu ’ba Kananini ovupi oni ruaa ’diyi pi be, angu Uruleruria ’diyi pie angu eleria ’diyi pie.

10Azini Yuda mu a’di ’dizu ’ba Kananini ovupi Hebironia ’diyi be (de isu okorisi Hebironi ma ru Kiriatiariba’i); yi ofu Sesai pi, Ahimani pie, Talimai pie ra.

11Engazu ’daarisi eri mu ’ba ovupi angu Debiria ’diyi vu a’di ’dizu (Debiri ma ru ndra okorisi Kiriati-seferi’i).

12Te Kalebu nga ’yo ra, ’Ba ngapi aku Kiriati-seferini ndepi ombasi eri bipi rari, ma nga ma zi Akisani fe eri dri okuru.

13Te Otinieli, Kalebu ma adripi eri vutia Kenazi’iri ma mvi bi eri ra; eri nga di i zi Akisani fe eri dri okuru ani.

14Nga eca’dini, zamva ’dirini caria agupi vile ’bo, eri omi eri amvu a’izu ati dri; ’dinile Akisani esiria va akanya driarisi, Kalebu nga zi tinia, Mi le a’dini ya?

15Eri nga ’yo tinia, Mi ma fe ma dri afa feza asi ndrizaniri; mini ma ’bale angu Uruleru ma alia ’borisi, mi fe ma dri yi a’di indi fo! Kalebu nga ani eri dri yi a’di ururi pi fe andrari be iri tro.

16e ’ba Kenini, Musa oti ma anzipi, efu etu uru engazu aku amboru ovupi itu pati beria, anzi Yudani pie, fi angu didi Yudani ovupi Aradi ma kala uruleruria; yi mu ra, ovu ’ba nde ma eselia.

17Te Yuda pi nga di mu i adripi Simeoni be, yi ofu ’ba Kananini ovupi Zefatia ’diyi, ja eri ma dri teketeke ra. ’Da aku amboru nderi ma ru Horima’i.

18Yuda bi vini Gaza pi kalatini be, Asikeloni pie kalatini be, Ekironi pie kalatini be dria.

19Te Yehova ovu ndra Yuda be, eri dro ’ba ovupi oni ruaa ’diyi ra, te eri econi ndra ’ba e’bu alia ’diyi drozaru ku, yini ovule gari ombani edele ayasi ’diyi berisi.

20Yi fe Hebironini Kalebu dri, ekile Musani ndra ’yolerile; eri dro anzi Anakini na ’diyi engazu ’diarisi ra.

21Te anzi Benyaminini awini ’ba Yebusini ovupi Yerusalemua ’diyi dro ku; te ’ba Yebusini ovu anzi Benyaminini be tualu Yerusalemua kpere o’du ’disi. Yusufuni Betelini pazu ombasiri

22Te ori’ba Yusufuni ’diyi tu mu a’di ’dizu Beteli be indi; Yehova ovu yi be.

23Ori’ba Yusufuni ’diyi pe ’ba ti Beteli ma orile gazu. (Isu de aku nde ma ru ndra okorisi Luzi’i.)

24’Ba angu ma orile gapi ’diyi ndre ’ba alu efu aku ndeasi, yi ’yo eri ma tia, Mi ece amani geri fizu aku amboru ’diriari fo, ama zi mi tia, ama nga mi ’ye asi ndrizasi ani.

25Eri ece yi dri geri fizu aku ndeari ra; yi fu aku nderi sei ma sisi ra, te yi ku ba nderi fuzu ori’ba erini be dria.

26Agu nde mu ’ba Hitini vile angua, eri si aku ’daa, ’da runi Luzi’i; eri aku nde ma ru kpere o’du ’disi andru.

27Te Manase droni ndra ’ba ovupi Bete-seania aku ambo ambo erini be ’diyi pi ku, ’ba ovupi Taanakia aku ambo ambo erini be ’diyi pie, ’ba ovupi Doria aku ambo ambo erini be ’diyi pie, ’ba ovupi Ibileamua aku ambo ambo erini be ’diyi pie, ’ba ovupi Megidoa aku ambo ambo erini be ’diyi pie dria; te ba Kananini yi le ndra ovuzu angu nderi ma aliani.

28Te eri nga eca ’dini, ’ba Israelini ka eca okporu ’bo, yi ’ba ’ba Kanania ’diyini azi ngazu ati’baru, te yi awini yi dro dria teketeke ku.

29Efiraimu droni vini ’ba Kananini ovupi Gezeria ’diyi ku; te ’ba Kananini ovu yi ma eselia Gezeria ’dani.

30Zebuluni droni ndra ’ba ovupi Kitronia ’diyi ku, droni vini ’ba ovupi Nahalolia ’diyi ku indi; te ’ba Kananini adri yi ma eselia, oja yi ’ba musoro ’bepiriru yi dri.

31Aseri droni ndra ’ba ovupi Akoa ’diyi pi, ’ba ovupi Sidonia ’diyi pie, Alabua ’diyi pie, Akizibua ’diyi pie, Helibaa ’diyi pie, Afikia ’diyi pie, Rehobua ’diyi pie dria ku;

32te ’ba Aserini ovo ’ba Kananini ’diyi ma eselia, yi ’ba ovupi angu ndea ’diyi; yini ndra yi drole kurisi.

33Nafutali droni ndra ’ba ovupi Beti-semesia ’diyi ku, droni vini ’ba ovupi Beti-anatia’diyi ku, te eri adri ’ba Kananini ’diyi ma eselia, yi ’ba ovupi angu nderia ’diyi; te ti, ’ba ovupi angu Beti-semesia azini Betianatia ’diyi oja yi ’ba musoro ’bepi diyiru yi dri.

34Te ’ba Amorini ’diyi omi ’ba Danini ’diyi, dro yi angu oni ruaari ma alia, yini ndra a’ile yini esizu va e’bua kurisi;

35te ’ba Amorini ’diyi le ndra ovuzu oni Heresi ma ruaa, Aiyaloni pia, Saalibimu pie, te kiri Yusufu vile ori’ba ma dri agani, ’dini yi oja yi ’ba musoro ’bepiriru.

36Kalati ’ba Amoriniri ndra kpere engazu angu tuza Akirabimuaria, engazu kata nde vu kpere uru.

Jump to: Chapter 2 →