Judges 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1’Dini Samisoni si Gazaa, nga oku awuouru ndre ’dale, mu fi eri vu.

2Te yi olu ’ba Gazaa ’diyi ma tia kini, Samisoni emu ’dia ’bo. Yi ace eri ma agei ci, yi te eri ini be rra aku amboru ma kalitilea. Yi adri inisi dria ndi, kini, Angu ka ati ’bo, ama di nga eri fu ra.

3Te Samisoni la kpere iniayii, eri enga iniayii, bi aku amboru nderi ma kalitile pi pati erini iri ’diyi pie, onze yi pi katala alale jotileari pie dria, o’ba yi i ma gbudria, ’du yi jizu uru oni ovupi Hebironi ma driliari ma dria.

4Eri nga eca e’yo ’diyi ma vutia ’dini, eri le oku alu ovupi e’bu Sorekiari, runi Delila’i.

5Azini opi ’ba Filisitiaa ’diyini etu emu eri vu ’yo eri ma tia, Mi obe eri, mi ndre okpo erini amboruri enga ngoa Ya, kani ama eco eri aga geri ngosi yani, ’dini ama ma ombe eri, candi fezu eri dri ani; te ama dria alu alu nga mi dri silingi dahaburu fe alifu alu drini turu alu.

6Delila nga di ’yo Samisoni ma tia, Ma zi mi tia, mi olu mani, okpo mini amboruri enga ngoa yani, azini ’ba eco mi ombe a’di afasi candi fezu mi dri yani.

7Te Samisoni ’yo eri ma tia, Yi ka ma ombe isuba aziri ibiru ’wipi nga ku ’diyisi, ma di nga ma oja okpokokoru, ma nga ovu ’ba azinile.

8Opi ’ba Filisitiaa ’diyini nga di isuba ibiru aziri ’wipi nga ku ’diyi eji oku nde dri, eri ombe eri ani.

9Isu de curu’do ’ba ’ba mbapi ’diyi ovu oku nde be, eri tezu jo alialeruria. Te eri ’yo tinia, ’Ba Filisitiaa ’diyi eca mi dria ’bo, Samisoni la! Te eri nga isuba ’diyi oce ekile baka awuawuni i ocele aci ka eri ma rua elo rarile. ’Dinile okpo erini ovuni ani nizaru ku.

10Delila nga di ’yo Samisoni ma tia, Mi lu, mi ede ma ra, mi li ma dri inzo; te curu’do mi olu ma tia, ma zi mi tia, kani ’ba eco mi ombezaru a’di afasi yani.

11Te eri ’yo tinia, Yi ka ma ombe baka o’di ’bani nga azi ngazu ani ku ’diyisi, ma di nga ma oja okpo kokoru, ma nga ovu ’ba azinile.

12’Dinile Delila ’du di baka o’diru ’diyi, eri ombe eri ani, azini ’yo tinia, ’Ba Filisitiaa ’diyi eca mi dria ’bo, Samisoni la Isu de ’ba ’ba mbapi ’diyi eri te jo alialeruria. Te eri oce baka i ma wuarisi ekile wizile ra.

13Te Delila ’yo eri ma tia, Kpere curu’do mi ede ma ra, mi oli ma dri inzo; mi olu ma tia kani yi eco mi ombezaru a’di afasi yani. Te eri ’yo tinia, Mi ka ma dribi ombeza aziri ma dria ’diyi ca afa bongo cazurisi.

14Te eri ba dribi erini kirikiri alo ruaa, eri ’yo tinia, ’Ba Filisitiaa ’diyi eca mi dria ’bo, Samisoni la Te eri enga o’duarisi ra, nze alo patiniri pi bongo caza be dria.

15Oku nderi ’yo eri ma tia, Mi di eco ’yo, Ma le mi ra; de isu mi asi ma be ndu ngoni ngoni ya? Mi ede curu’do ma pale na ’bo, mi oluni ma tia mi okpo amboruri enga ngoari ku.

16Eri nga eca ’dini, eri ka eri omi zuzu e’yo erini ’yolerisi, ka eri zi okposi, avani oti ra kpere drata vu.

17Azini eri olu e’yo i asiari eri ma tia dria, ’yo eri ma tia, Yi ofani nga dribi ma driari idrisi ku; mani ibile ovule ’ba Naziriru Mungu vu engazu ma andri ma opojoarisi. Yi ka ma dribi ofa ra, ma okponi nga fu ma ruaarisi ra, ma nga di eca okpo kokoru, ovuzu ekile ’ba azini ’diyile ani.

18Delila ka di ndre eri olu e’yo i ma asiari dria eri ma tia ’bo, eri pe ’ba ti mu opi ’ba Filisitiaa ’diyini omvezu, kini, Emi etu pale alu ’disi, a’disiku eri olu e’yo i ma asiari dria ma tia ’bo. Opi Filisitiaa ’diyi nga di etu eri vu ra, yi eji silingi nde yi ma dria indi.

19Te eri fe eri o’du kozu i ma kumu dria; eri omve ’ba alu, ofa eri ma dribi ombeza aziri ’diyi ra. Eri e’do eri ecandizu, okpo erini fu eri ma ruaarisi ra.

20Eri ’yo ra, ’Ba Filisitiaa ’diyi eca mi dria ’bo, Samisoni la! Te eri enga o’duarisi ra, eri ’yo, Ma nga fu amve ekile mani ndra fule okorile ma rua oyazu. Te eri nini ku kini Yehova ku di i ’bo.

21’Ba Filisitiaa ’diyi bi eri ra, onze eri ma mile ra, yi eji eri andraleru Gazaa, ombe eri anziriku molarusi; eri di nga anya ’i arujoa ra.

22Te dribi eri ma driari ’bani ndra ofale rari e’do du dika ra.

23Opi ’ba Filisitiaa ’diyini oku yi tualu edeta amboruri edezu Dagoni adrou yiniri dri, ayiko ’bazu indi; a’disiku yi ’yo ra, Adrou amani fe ari’bo amani Samisonini ama dria ’bo.

24’Ba nde ka eri ndre ra, yi inzi adrou yiniri; te yi ’yo ra, Adrou amani fe ama dri ari’bo amani, ’ba angu amani ma dri japi, ama azi ofupi kakauri’i.

25Eri nga eca ’dini, asi yini ka ovu ayikosi, yi ’yo, Emi omve Samisonini, eri ma fe oguta ama dri ani. ’Dini yi omve Samisonini engazu arujoarisi, eri nga di oguta fe yi ma milia ra. Yi ’ba eri pati idiaferu iri ’diyi ma eselia;

26Samisoni ’yo mva i dri bipiri ma tia, Mi ku ma ma amvi nga idiafe joni pa sozu drinia ’diyi ani, ma ma ati ma yi ma ruaa beni.

27Isu de agupi oku pie ga jo ndea tre; opi ’ba Filisitiaa ’diyini dria ’dale indi, te jo nde ma dri senderuri ma dria isu de ’ba ekile alifu nale, agupi oku pie, ecapi Samisonini ndrezu erini oguta feria yi dri ’diyi.

28Te Samisoni omve Yehovani, ’yo kini, Opi Mungu la, mi ega ma e’yo fo, ma zi mi tia; mi fe ma dri okpo, ma zi mi tia,lu pale alu ’di’i, Mungu la, ma ma ofe ma ma mile iri ’diyi ma aroti ’ba Filisitiaa ’diyi ma ruaa beni fo!

29Samisoni nga pati idiaferu iri agadua joni pa sozu drinia ’diyi bi, ati i yi ma ruaa, alu eri ma dri ndiria, aziniri eri ma dri ma,

30Te Samisoni ’yo ra, Mi ku ma ma dra ’ba Filisitiaa ’diyi be tualu. Eri avu va i okpo driasi; azini jo asu i opi piyi ma dria ’ba dria jo nde ma alea ’diyi pie. Ka’dini ’ba erini ofule drata erini ma alia ’diyi ma kalafe aga ’ba erini ofule de nga eri idriru ’diyi ra.

31’Dini eri ma adripi ’ba eri ati vile joa ’diyi be esi ra, ’du eri ra, eji eri uru, sa eri Zora pi ma eselia Esitaoli be, pari yini ati Manoani sazuria. Isu de eri li Israeli ma e’yo eli kali iri.

← Chapter 15 Jump to: Chapter 17 →