Judges 15

Lugbara (E’yo Siza Alatararu Munguniri BIBLIA)

← Chapter 14 Jump to: Chapter 16 →

1Te eri nga eca o’du azini vutia, ewu anya lozurisi, Samisoni nga mu ndriamva be oku i vileri andrizu; te eri ’yo ra, Ma nga mu oku mani vu joa. Te oku nde ma ati a’ini erini fizu ku.

2Oku nde ma ati ’yo ra, Ndi ndi ma ega ma asia mi ngu di eri iriti ’bo; e’yo ’disi ma fe eri ani mi agyi dri ’bo Eri ma amvipi vileri ndri erini ndenini ku ya? Mi ’du eri, ma zi mi tia, eri ma paria’i.

3Te Samisoni ’yo yi ma tia, Ma ka ’ba Filisitiaa ’diyi ’ye onzi curu’do, e’yoniri ngani ovu ma dria aliru ku.

4Samisoni nga di mu obalako obizu turu na, eri ’du alaka; oja yi ma so’bi agyi vu agyi vu, ombe alaka so’bi iri ma eselia dria dria.

5Eri ka alaka ti ’ba acisi ’bo, eri ku yi mu anya ’ba Filisitiaa ’diyinia, eri ove anya yini otile uru amvua ’diyi pi, anya nga lole kuri be iri tro, azini mizeitu pati ve indi.

6’Ba Filisitiaa ’diyi nga diyi A’di ’ye afa ’dirini ya? Te yi ’yo, Samisoni ’ba Timinaari ma anyi zini jepiri’i, a’disiku eri ’du eri ma oku fezu agyi erini dri. ’Ba Filisitiaa’diyi nga di etu ra, nga oku nderi pi ve ati be acisi.

7Te Samisoni ’yo yi ma tia, Emi ka ’ye ’dinile, adaru ma nga afa ’diri ma aroti ofe emi dri raka, vutinia ma nga ku ra.

8Te eri ofu yi titi futa amborusi; eri nga di si mu ’a’azu oni oji Etamunia.

9’Ba Filisitiaa ’diyi nga di mu hema yini aso Yudaa, ere yi ndu ndu Lema.

10’Ba Yudani nga di ’yo, Emi etu a’di ’dizu ama be a’disi ya? Te yi ’yo, Ama etu emu Samisonini ombezu, azini eri ’yezu ekile emi ama ’yele ’borile.

11’Ba Yudani alifu na nga di si oni oji Etamunia, ’yo Samisoni ma tia, Mi nini ’ba Filisitiaa ’diyi opi nya ama driliani ku ya? Afa mini ’yele ama vu ’diniri a’di afani ya? Te eri ’yo yi ma tia, Ekile yini ’yele ma vurile, ’dinile ma ’ye vini alu yi vu indi.

12Te yi ’yo eri ma tia, Ama esi emu mi ombezu, ama ma fe mi ’ba Filisitiaa ’diyi ma dria beni. Te Samisoni ’yo yi ma tia, Emi so oyo ma dri ci kini emi ngulupi ngani e’de ma dria emi’i ku.

13Yi ’yo tinia kini, Yo, te ama nga mi ombe kirikiri, fezu ’ba nde ma dria; te ama ngani mi fu ama’i ku adaru. Yi nga di eri ombe baka iri o’diru ’diyisi, eji eri uru enzazu kata ndea.

14Te eri ka eca Lehia ’bo, ’ba Filisitiaa ’eliyi otre yini dri fule eri berisi; te Orineli Yehovani eca eri ma dria okpo be, azini baka te eri ma wu ombezu ’eliyi oja yi ekile palaba vele acisirile, azini baka eri ma dri ombezu ’diyi ayi va.

15Azini eri isu akanya ma siso o’elini, eri eju i ma dri e’du eri ra,ofu ’ba alifu alu ani.

16Te Samisoni ’yo ra, Akanya ma sisosi amu amu azini ma dria, akanya ma sisosi ma ofu ’ba alifu alu.

17Eri nga eca ’dini, eri ka e’yo ’yo de ’bo, eri ’be siso i ma driarisi ra; yi nga angu ’dari ma ru ’da Ramatilehi’i ani.

18Isu de yi kore fu eri re, eri omve Yehovani kini, Mi fe pata amboru ’diri geri ati’bo mini ma driarisi ’bo; te curu’do ma nga dra yi koresi, ma nga e’de ’ba agele we ku ’eliyi ma dria.

19Te Mungu asi angu daliru ovupi Lehiari, yi efu alenia ’daa ra; eri ka mvu ’bo eri ma orindi enga dika, ega ra, Ka’dini yi nga angu ’dari ma ru ’da Enihakore; eri Lehia kpere o’du ’disi.

20Azini eri li Israeli ma e’yo o’du ’ba Filisitiaa ’ eliyinisi eli kali iri.

← Chapter 14 Jump to: Chapter 16 →

Recommended Reading

Commentary Judges Commentaries → Devotional Judges Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →