Judges 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Abimeleki ma vutia Tola, Pua Dodo mvi ma mvi, ’ba Isakarini, enga ’ba Israelini opazu; eri adri Samiria, angu oni ruaa Efiraimuniria.

2Eri li ’ba Israelini ma e’yo eli kali iri drini na, dra ra, sa eri Samiria.

3Eri ma vutia Yairi ’ba Gileadini engani, eri li e’yo ’ba Israelini eli kali iri drini iri.

4Isu de eri ovu ndra anzi be kali na, nzupi akanya kariaru kali na ’diyi ma dria ’diyi; yi ovu ndra aku ambo ambo be kali na, yini omvele Havoti-yairi kpere o’du ’disi ’diyi, yi angu Gileadinia.

5Yairi dra di ra, sa eri Kamonia.

6Te anzi Israelini ’ye onzi dika Yehova ma milia, yi nga azi adrou Baaliru piyi dri, Asitaroti pie, adrou ’ba Suriaa ’diyini pie, adrou Zidonini pie, adrou Moabuni pie, adrou Amoni anzipini pie, adrou ’ba Filisitiaa ’diyini pie; te yi ku Yehovani ra, yi ngani azi eri dri ku.

7Te Yehova ma adra nga ti ko anzi Israelini ma ruaa, eri fe yi jezu ’ba Filisitiaa ’diyi pi ma dria, Amoni anzipi pie,

8yi fe candi, yi inza anzi Israelini eli ’dasi. Eli mudri drini aro yi inza anzi Israelini dria ndra ovupi Yoridania ’aa’dasi, angu ’ba Amorini Gileadiaria ’diyi.

9Amoni anzipi nga enga vini alu Yoridania ’aa’dasi, mu a’di ’dizu ’ba Yudani piyi be, ’ba Benyaminini pie, ori’ba Efiraimuni ’diyi pie; Israeli ovu ndra ani ocokosi tu aga ra.

10Anzi Israelini nga ani owu Yehova vu, kini, Ama ’ye e’yo onzi mi vu, amani Mungu amaniri kule amani azi ngale adrou Baaliru ’diyi dririsi.

11Yehova nga di ’yo anzi Israelini ma tia, Ma opani ndra emi ’ba Misiria ’diyi pi ma dria, ’ba Amorini pie, Amoni anzipi pie, ’ba! Filisitiaa ’diyi pie ku ya?

12’Ba Zidonini piyi inza ndra emi, ’ba Amalekini pie, ’ba Maonini pie ra; te emi owu ndra ani ma vu, ma opa ndra ani emi yi ma dria ra.

13Te kiri emi ku ma ra, emi nga azi Mungu andini ’diyi dri; e’yo ’disi ma ngani emi opa dika ku.

14Emi mu wu adrou emini pele emi dri ’bo ’diyi vu; yi ma opa emi etu candi emini ma aliani.

15Te anzi Israelini yi ’yo di Yehova nde ma tia, Ama ’ye onzi; mi ’ye di ama be ekile e’yo dria ovupi onyiru mi ma miliarile; te kiri mi opa ama o’du ’disi fo, ama zi mi tia.

16Yi nga adrou ndu ndu ’diyi onze yi ma eseliarisi amve ra, yi nga azi Yehova dri; te asi erini nga ndra ota candi Israelinisi.

17Amoni anzipi nga di yi oku tualu hema asozu Gileadia; anzi Israelini oku yi tualu hema asozu Mizipaa.

18Te ’ba nde, ’ba ’wara Gileadia ’diyi ’yo yi eselia ’dini, ’Ba ngapi a’di eti e’dopi ’dizu anzi Amonini be ’ba ngonini ya? Eri nga ovu ’ba ovupi Gileadia ’diyi ma drilia driani.

← Chapter 9 Jump to: Chapter 11 →