Judges 7

Lugbara (E’yo Siza Alatararu Munguniri BIBLIA)

← Chapter 6 Jump to: Chapter 8 →

1Yerubaali (eri Gideoni’i) azini ’ba dria ovupi eri be ’diyi nga di enga o’bitisi drio drio, mu hema yini aso yi a’di Harodi ma tia; te pari ’ba Midianini ’diyini hema asozuri ovu yi ma kala andraleruria, oni Moreni ma tia e’bu alia.

2Yehova nga di ’yo Gideoni ma tia, ’Ba nde ovupi mi be ’diyi yi karakarau tu, aga mani ’ba Midianini ’diyi fezu yi dria, Israeli kazu e’yo ’yozu afusi ma ruaa ku, kini, Ma ngulupi ma dri pa mani.

3Curu’do mi mu, mi olu e’yo ’diri ’ba ma bilia kini, ’Ba ovupi uri be tu ruanini yazu indiri, eri ma atri dri vile, ma nga oni Gileadiarisi ra. ’Dini ’ba azini yi ma eselia atri dri vile ’ba alifu kali iri drini iri, te ’ba acepi ’diyi alifu mudri.

4Te Yehova ’yo Gideoni ma tia, ’Ba nde yi nga kiri kakauru tu aga ra; mi ma fe yi si yia, ma nga yi o’bi mi dri ’daa; te eri nga ovu ’dini, ’ba mani ’yole mi tia, ’Ba ’diri nga mu mi be-ri, agu nde nga mu mi be ra, azini ’ba mani ngale ’yole mi tia, ’Ba ’diri ngani mu m be ku-ri, agu nde ngani mu ku.

5’Dinile eri fe ’ba nde si yia ra; azini Yehova nga di ’yo Gideoni ma tia, ’Ba dria alu alu yi mbepi andresi ekile oceni mbelerile ’diyi, mi nga eri ’ba pari alua; ’dinile mi nga ’ba alu alu avupi kumuti osipi va raka yi mvupi ndo ’diyi ’ba ndu indi.

6’Dinile ’ba yi eyapi dri ’bapi yi ma tia ’diyi ma kalafe ndra turu na; te ’ba joloko dria acepi ’diyi yi ’ba avupi yi mvuria kumuti osipi’i ’diyi.

7Yehova nga di ’yo Gideoni ma tia, Ma nga emi pa ’ba turu na yi eyapi yi ma tia drisi ’diyisi ra, ma nga ’ba Midianini ’diyi fe mi dri ra; mi ku ’ba dria alu alu ma mu pari ini vusi.

8’Dinile ’ba nde ’du di afa nyaza yini yi ma dria, guka yini pie; azini eri pe ’ba Israelini ma ti mvizu ’ba dria alu alu hema erini vusi, te fe lu ’ba turu na ’diyi ma teni. Isu de pari ’ba Midianini hema asozuri ovu e’bua, eri ma kala andraleruria.

9Eri nga eca ini nde alu ’da ma vusi ’dini, Yehova nga ’yo eri tia kini, Mi nga, mi si andra fi pari yini hema asozuria; a’disiku ma fe eri mi dria ’bo.

10Te mi ka ru sizu andraleru ru ru, mi si Pura ati’bo mi vileri be tualu pari nde hema asozuria;

11mi nga e’yo yini ’yoleri eri ra, vutinia mi drini nga okpo isu sizu andraleru fizu pari hema asozuria ra. Eri nga di si Pura ati’bo eri vileri be tualu fizu ’ba afa ombani ’dupi ovupi pari hema asozuri ma kala amveleruria ’diyi ma eselia.

12Te ’ba Midianini piyi, ’ba Amalekini pie, anzi kala etuni efurialeruria ’diyi pie dria ola yi e’butisi ongulumuru ekile ombile; ngamia yini ma kalafe lakokoru ekile cinya miri tiarini ovule karakaraurile.

13Gideoni ka eca ra, mi lu, ’ba azini alu ri orobi ini olu i agyi tia, kini, Mi lu, orobi obi ma, te mi ne, mikate onduni e’de pari ’ba Midianini hema asozuria, ca kpere hema vu’leri co eri erini e’dezu, oja eri juluru, ’dini hema nde la i nyakua va.

14Agyi eriniri nga di e’yo omvi, kini, E’yo nduni de yo pe lu Gideoni Yoasi mvi ’ba Israelini ma sei’i; Mungu fe Midiani pi asikari ongulumuru ’diyi pie dria eri ma dria ’bo.

15Te eri ovu ’dini, Gideoni ka orobi yini oluleri eri efini be ’bo, eri inzi Mungu ra; emvi pari ’ba Israelinini hema asozuria, ’yo ra’i Emi nga; te Yehova fe ’ba ongulumuru Midianini ’diyi emi dria ’bo.

16Eri awa ’ba turu na ’diyi ma ale esele be na, eri fe guka ’ba dria dri, imvu ale be pirini ’diyi pie, de tala imvu nde ’diyi ma alia ci ci.

17Eri ’yo yi ma tia, Emi ndre ma vu, emi ’ye tro tro mani ’yelerile indi; te emi lu, ma ka ca pari yini hema asozuri ma kala amveleruria ’bo, eri nga ovu ’dini, ekile mani ’yelerile emi nga ’ye alu indi.

18Ma ka guka vu ma’i, ’ba ovupi ma be ’diyi pie ra, emi vu di guka indi pari yini hema asozu nderi ma ageia kuru, emi ’yo, Yehova dri azini Gideoni dri.

19’Dini Gideoni pi ’ba turu alu ovupi eri be ’diyi be ca pari hema lasozu nderi ma kala amveleruria lamuti agadua angu tezurini e’doria, yi ka ’ba ’ba angu tezu o’diru ’bo; iyi vu guka, aco imvu yi ma dria ’diyi nyingiriki ra.

20Azini ’ba ongulumuru awale esele be na ’diyi vu guka aco imvu indi, yi obi tala yi ma dri ejisi, obi guka dri ndisi vuzu beni; azini yi oyu kini, Sei Yehovani, azini Gideonini!

21’Ba dria alu alu nga pa so pari erini ma alia pari hema asozuri ma ageia kuru; te ’ba ongulumuru dria nzu ra; yi otre uru, yi fe ’ba nde apa ra.

22Yi vu guka turu na ’diyi ra, te Yehova fe ’ba dria alu aluni yi agyi pi ofuzu seisi ceni ceni, ’ba ongulumuru ’diyi pie dria; azini ’ba ongulumuru ’diyi apa re kpere Beti-sita Zerera vuleruria, kpere Abeli-mehola ma kala ovupi Tabati tiaria.

23Te ’ba Israelini oku yi ’tualu engazu Nafutali pi ma alia, Aseri pie, suru dria Manaseni pie, yi dro Midiani ma vuti.

24Gideoni nga di ’ba ti pe angu oniru Efiraimuniri ma eselia dria ’yozu kini, Emi esi a’di ’dizu ’ba Midianini be, emi opa yi raza yi drilia kpere Beti-bara pia Yoridani be. ’Dini ’ba dria Efiraimuni ’diyi oku yi tualu, opa yi raza ’diyi kpere Beti-bara pia Yoridani be ra.

25Yi obi opianzi iri Midianini ’diyi, Orebu pi Zeebu be; yi fu Orebuni kata Orebuniri ma dria, fu Zeebuni pari Zeebuni patiefi su nzizuria, yi nga di ’ba Midianini ma vuti dro ra; nga Orebu pi ma dri oli eji Zeebu be Gideoni vu Yoridania ’aa’dasi.

← Chapter 6 Jump to: Chapter 8 →