Judges 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Anzi Israelini ’ye e’yo onzi Yehova ma milia dika; Yehova nga ani yi fe ’ba Filisitiaa ’diyi ma dria eli kali su.

2Isu agu alu indi, ’ba Zoraa ori’ba Danini ma eseliari, runi Manoa’i; te oku erini ovu ondoni, tini ku.

3Malaika Yehovani nga i e’da oku nde vu, ’yo tinia, Mi lu, curu’do mi ondoni, mi tini ku; te mi nga mva isu, mi nga agupimva osi ra.

4Curu’do e’yo ’disi mi ovu mile be, ma zi mi tia, mi mvu patiefi ma su ku, kani afa mvuza okporu ku, mi ma nya afa alata kokoruri ku;

5te mi ne, mi nga mva isu mi alia mi nga agupimva osi. Yi ngani dribini ofa idrisi ku, mva ndeni ngale ovule ’ba Naziriru Mungu dri engazu opojoarisi; eri nga e’do Israeli opazu ’ba Filisitiaa ’diyi ma dria.

6Oku nderi nga di emu e’yo nderi olu i agupi ma tia, kini, ’Ba Munguni alu emu ma vu, ’ba nde ma andreti e’da ekile malaika Munguniri ma andretile, uriuriru tu; te ma zini eri tia eri enga ngoari ku, azini eri luni mani i ma ru ku indi;

7te eri ’yo ma tia, Mi lu, mi nga mva isu mi alia, mi nga agupimva osi; te curu’do mi ma mvu patiefi ma su kani afa mvuza okporu ku, azini vini mi ma nya afa alata kokoruri aluni ku, mva ndeni ngale ovule ’ba Naziriru Mungu dri erini engaria opojoa kpere o’du erini ngazu drazuriarisi.

8Manoa nga matu ’ba Yehova vu, ’yo kini, Opi la, ma zi mi tia, mi fe ’ba Munguni mini te ti epeleri ma emu ama vu dika, ama imbazu e’yo amani ngale ’yele mva amani ngale tileri ma e’yosirisi fo!

9Mungu nga Manoa ma o’duko eri ra, malaika Munguni emu dika oku nde vu erini riria nga alia; te Manoa agupi erini eri be de ’daa yo.

10Oku nde nga ’ye mbele, nzu mu e’yoni olu i agupi tia, ’yo tinia, Mi lu, agu ndra emupi ma vu o’du ’dasiri e’da i ma dri ’bo.

11Te Manoa enga ra, mu oku erini ma vutia, emu ’ba nde vu, ’yo tinia, Mi ’ba ndra e’yo ’yopi oku ’di beri’i ya? Eri omvi e’yo kini, Ma eri’i.

12Manoa nga di ’yo, Curu’do mi fe e’yo mini ’yole ’diyi ma ’ye di yi fo! Mva nde nga ovu mva ngonini ya, azini azi erini nga ovu ngoni ya?

13Malaika Yehovani nga di ’yo Manoa ma tia, E’yo dria mani ’yole oku nde ma tiarisi eri ma ovu di ani mile be.

14Eri ma nya afa efupi zabibu pati ma aliari aluni ku, eri ma mvu kani patiefi ma su ku indi, kani afa mvuza okporu, kani afa alata kokoru eri ma nya ku indi; afa dria mani azile eri ma tiari, eri ma ndre yi ’yezu.

15Te Manoa ’yo malaika Yehovani ma tia, Ma zi mi tia, ama oga nga mi were, ama ma ede nga mi dri ndrimva raka.

16Te malaika Yehovani ’yo Manoa ma tia kini, Mi ka tro ma oga ra ti, ma ngani enya mini nya ku; te mi ka le edeta vezaruri ede ra, mi ma ede eri Yehova dri. (Manoani nile eri ovu malaika Yehovani kurisi.)

17Te Manoa ’yo malaika Yehovani ma tia, Mi ru a’di’i ya, e’yo mini ’yole ’diyi ka nga yi ’ye ra, ama ma inzi mi beni?

18Malaika Yehovani ’yo tinia, Mi zi ma ru a’disi ya? te eri osutaru.

19’Dini Manoa ’du ndriamva nderi edeta anyafurasiri be, ede eri edetaru oni dria Yehova dri; te malaika ’ye e’yo osutaru; Manoa pi oku erini be ndre ra.

20Eri nga eca ’dini, aci diza ka tu uru engazu pari edeta vezuria, ’dini malaika Yehovani tu aci diza nde pari edeta edezuriari ma aliasi, Manoa pi oku erini be ndre ra; yi o’de o’bukuru nyakua va.

21Te malaika Yehovani e’dani di i Manoa pi ma milia oku erini be dika ku. Manoa ni di ani eri malaika nde Yehovaniri ra,

22Manoa nga di ’yo oku erini ma tia, Ndi ama nga odra ra, a’disiku amani Mungu ndrelerisi.

23Te oku erini ’yo tinia, Yehova ka te le ama ofuzu, eri econi te edeta vezaru pi edeta anyafurasiri be a’i ama dri ku, ngani te afa awa’dile ’diyi ece dria ama dri ku indi, kani etu ’disi ngani te afa ’dinile ’diyi olu ama tia ku.

24Te oku nderi nga mva osi ra, ’da runi Samisoni’i; mva nde zo ra, Yehova nga asi ndriza fe eri dri.

25Te Orindi Yehovani e’do drini cezu Mahane-dani Zora pi ma eselia Esitaoli beria.

← Chapter 12 Jump to: Chapter 14 →