Revelation 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Ma ndre malaika azini okpo berini esiria ’buarisi va, su iriti i ma ruaa bongole, gari ago i eri ma dria uruleru, andretini etule, pani ekile ad pa sopi piriru ’diyile.

2Eri ma dria buku gaaru ovu zizaru. Eri ’ba i pa dri ndiari miri dria, dri ejiari nyaku dria,

3eri tre o’duko urusi ekile kamini onolerile; ka tre ’bo, angu liza aziri ’diyi oli yi ma o’dukosi oli oli.

4Angu liza aziri ’diyi ka li ’bo, ma ’ye e’yoni si si, te ma eri o’duko engazu ’bua ’yozu kini, Mi ma ’ba eceta afa ma ti opizuri e’yo angu liza aziri ’diyini oluleri ma dria ci, mi si yi ku.

5Malaika mani ndrele pa sopi miri ma dria nyaku beri eju i dri ndiari uru ’bua,

6nga oyo so ’ba ovupi idriru kpere ’dani ’dani, ’bu pi ’bapi afa alenia ’diyi be, nyaku pie afa alenia ’diyi be, miri pie afa alenia ’diyi beri ma rusi, kini ewu tezuri ’ye asi di,

7te o’du o’duko malaika aziririnirisi, erini ’yeria vuria, e’yo zizaru Munguniri de i ra ekile e’yo bari erini olule ati’ba ini ’ba nabiru ’diyi ma tiarile.

8Ma eri o’duko teka mani erile ’buarini e’yo ’yoria ma be dika kini, Mi mu, mi ’du buku ovupi zizaruri malaika pa sopi miri ma dria nyaku beri ma dria.

9Ma mu di malaika vu ani, ma ’yo eri tia eri ma fe ma dri buku gaaru nderi, Eri ’yo ma tia, Mi ’du eri, nya; eri nga asi mini ’ba drazaru, te mi tilia eri nga ovu aluzaru anyule.

10Ma nga di buku gaaru nderi ’du malaika ma dria, ma nya eri ra; eri ovu ma tilia aluzaru anyule, te ma ka eri nya ’bo, eri ’ba ma asi drazaru,

11Yi ’yo ma tia, Mi ma ondri e’yo dika ’ba kakau ma dria, suru pie, ti ’yoza pie, opi pie dria.

← Chapter 9 Jump to: Chapter 11 →