Revelation 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1E’yo ’diyi ma vutia ma ndre malaika azinini engaria ’buarisi esizu va, eri okpo be amboru; nyaku ovu mvezaru diza erinisi.

2Eri oyu uru o’duko okporusi kini, Babuloni amboruri e’de va ’bo eri e’de va ’bo! Eri oja i pari orindi onzi ’diyini adrizuriru, azini pari orindi alatara kokoru dria ’diyini yi ta mbazuriru, azini pari aria alatara kokoru dria, ’bani ngule onzi ’diyini yi ta mbazuriru indi;

3a’disiku suru dria o’de va patiefi ma su awu erini ali o’bazurinisi ’bo, opi nyakua ’diyi o’ba ali erisi ra, ’ba afa ozipi nyakua ’diyi ofu afa e’iru lonyi erini i enyazuri ma okposi.

4Ma eri o’duko azini engapi ’buari kini, ’Ba mani la, emi ma efu eri ma aliarisi ra, emi kazu ti ecizu eri be azi onzi erini ma alia ku, emi kazu inzata isuzu eri be ku indi;

5a’disiku azi onzi erini oku yi tualu cazu trua ’bua uru, azini Mungu ega ezata erini.

6Mi ofe eri ekile erini ofelerile, mi ofe eri paleko iri ’yeta erini ’yele ’diyi vusi; okelea erini afa osazuri ma alia mi osa afa eri dri paleko iri.

7Ekile erini diza fele i ngulupi dririle, azini erini i enyale lonyi inisirile, mi ma ofe eri dri inzata pi candi be’dipi. Erini ’yole i asia kini, Ma ri oku opiruriru, ma ovuni awuziouni ku, ma ngani candi ndre aluni ku, ’dinirisi,

8e’yo ’disi inzata erini ’diyi nga ecea o’du alu ma alia, yi ’di: dra pi, awu wuza pi, tiki pie, eri nga ovu vezaru acisi kieikiei indi; a’disiku Opi Mungu e’yo erini lipiri ovu okporu.

9Opi nyakua ndra ali o’bapi erisi, yi enyapi eri be lonyi erinisi ’diyi nga awu wu azini lulu ga, yini aci eri vepiri ma acika ndrelerisi;

10yini pa soria re inzata erini ma urisi, ’yozu kini, Eyawaye! Eyawaye! aku amboru Babuloni ye! aku okpo beri ye! E’yo liza mini ecea sawa alu ma alia coti ’doni!

11’Ba afa ozipi nyakua ’diyi nga awu wu erisi, nga lulu ga eri ma e’yosi indi, a’disiku ’ba aluni afa yini elileri; jezuni dika yo;

12afa ejiza meleruri pi, dahabururi pie, oni aje nyapi turi pie, nyoro ndrizaru aje nyapi turi pie, bongo mile be nyiriari pie, bongo okalakokalaruri pie, lasiruri pie, ekaruri pie; azini pati dria aji be arikariru ’diyi pie, afazu dria edele ewasisi ’diyi pie, afazu dria edele pati aje nyapi turisi ’diyi pie, molasiri pie, ayasiri pie, oni ndrizarurisiri pie;

13madalasini pie, afa aji be arikariruri pie, obiese vele veri pie, odu rua efizuri pie, odu arikariruri pie, patiefi ma su pie, mizeitu odu pie, anyafura inikiniruri pie, nganu pie, ti pie, kabilo pie, akanya pie, gari akanyani pie, ’ba rua pie, orindi ’bani pie.

14Patiefi mi asini lele avasi ’diyi ku mi ra, afa osoru ’diyi pi avi mi dri dria afa ndrizaru ’diyi be ra, ’ba ngani yi isu dika aluni ku!

15’Ba afa ’diyi ozipi ofupi afa e’iru eri ma e’yosi ’diyi nga pa oso reiinzata erini ma urisi, awu wuria azini lulu garia,

16kini, Eyawaye! Eyawaye! aku amboruri ye! bongo mile be nyiriari pi supi okalakokalaruri pie, ekaruri pie, mele pi supi i ruaa onyiafaru oni aje nyapi turi pie, nyoro ndrizaru aje nyapi turi pieri ’ye!

17Lonyi amboru ’dopi ja dri sawa alu ma alia coti ’doni ya! ’Ba oguru ma ti opipi ’diyi dria alu alu, ’ba dria acipi yi dria kani angu ngoria ’diyi pie, ’ba azi ngapi oguru ma alia ’diyi pie, ’ba dria azi ngapi miria ’diyi pie, oso pa re,

18yi nga otre uru yini aci eri vezuri ma acika ndrelerisi, kini, Aku i sipi aku amboru ’dirileri ngori ya?

19Yi nga irifura omvu yi dria, nga otre uru, awu wuria azini lulu garia kini, Eyawaye! Eyawaye! aku amboruri ye! pari ’ba dria ovupi oguru be miri ma alia ’diyini ofuzu afa e’iru lonyi erini turisiri ye! Ja eri ma dri sawa alu ma alia coti ’doni ya!

20Mi ’bu la, mi ma ovu ayikosi erisi, emi ’ba alatararu ’diyi la, ’ba ti opele ’diyi pie, nabi pie, a’disiku Munguni e’yo emini lile eri ma driarisi

21Malaika alu okporeri nga di Oni ekile oni anya ’izurileri ’du ’be miri alia, kini, Yi nga Babuloni, aku amboruri, ’be va rugbu okposi ’dini, yi ngani eri isu dika aluni ku;

22’ba ngani ’ba o’di copi ’diyi pi ma o’duko eri mi alia dika aluni ku, ’ba ongo ngopi ’diyi pie, ’ba ejeleko vupi ’diyi pie, ’ba guka vupi ’diyi pie dria; ’ba onduouru afa dria ndu ndu edepi ’diyi ngani e’da mi alia dika aluni ku; ’ba ngani oni anya ’izuri ma awu eri mi alia dika aluni ku;

23diza talani ngani di mi alia dika aluni ku; ’ba ngani izio pi ma o’duko, amurua ma o’duko be, eri mi alia dika aluni ku; a’disiku ’ba mini afa ozipi ’diyi ovu ndra ’ba amboru nyakua, azini mi ici ndra suru dria ole minisi.

24Te yi isu nabi pi ma ari eri ma alia, ’ba alatararu ’diyi pie, ’ba dria yini ofule nyakua’diyi pie dria.

← Chapter 17 Jump to: Chapter 19 →