Song of Solomon 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Ongo Sulemanini, ongo azi ’diyi agapi rari’i.

2Eri ma ndru ma o’bolo eri ma tilesi! Leta minini ovule onyiru patiefi ma su agazu rarisi,

3odu efiza miniri ngu onyiru arikariru, ru mini ovu ekile odu ’bani osulerile; e’yo ’disi ezoanzi aliriaru yi le

4Mi se ma mi vu; ama nga nzu mi vutia. Opi eji ma i vile joa ’bo. Ama nga ovu ayikosi azini nyonasi misi; ama nga leta miniri ma e’yo ’yo aga patiefi ma su ma e’yo ra; ’ba le mi ’yeke.

5Ma ovu iniru, vini ndrizaru, emi Yerusalemu ezoanzi la, ekile hema Kedaria ’diyile, ekile bongo jo ale alizu Sulemanini ’diyile.

6Mi ni ma edematararu mani ovule inirurisi ku, te etu ve mani. Ma andri ma anzipi ovu ndra ombasi ma be, ’ba ma ovuzu ’ba amvu zabibuni ma agei tepiriru; te ma teni amvu zabibuni ma ngulupiniri ma agei ku!

7’Ba ma orindini leleri la, mi ece ma dri pari mini nyaka fezu kabilo mini driri, azini pari mini kabilo mini fezu ava lizu etu agaasiri ngoa ya? Ma di ovu ekile ’ba abapi aba mi agyi ma kabilo o’biru ma kalaarile a’disi ya?

8Mi ka ni ku, mi oku ndrizaru tu oku azini ma eseliari la, mi mu geri minia kabilo o’biru ma pamvusi, mi fe nyaka ndrianzi mini dri ’ba kabilo ocepi ’diyi vile hema ma ageia,

9Ma o’bi mi, odrua mani leleri, sizu ekile akanya gari Farauni sepirile.

10Mi o’bolo ndri tu dri’bi cazasi, mi ombele ndri vini tu nyorosi.

11Ama nga mi dri afa caza ede melesi, afa osuza dahaburu ’diyi be.

12Opini riria i vile mesa tia, odu arikariru ma vileri ma aji ’du i ’dale.

13Agu mani leleri si ma dri ekile jurua ajinguru be lapi ma ba driarile.

14Agu mani leleri si ma dri ekile patifu hinaru yi o’bapi tre tre arakala alu ma sia amvu zabibuni Eni-gedia ’diyi ma aliarile.

15Mi lu, mi ovu ndrizaru, odrua mani leleri; mi lu, mi ovu ndrizaru; mi mile si a’balaunirile.

16Mi lu, mi ovu ndrizaru, agu mani leleri, ada ayikoru. Gbolo amani ovu iribini;

17jo amaniri ma pati marioni, azini pati jo drini pati bi be nyiria ’diyi.

Jump to: Chapter 2 →