Song of Solomon 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Ma emu ma vile amvua ’bo, ma amvipi, amurua maniri, ma oku ajinguru mani pi afa aluzaru maniri be ra, ma mbe anyu mani ’bo, ma mvu patiefi ma su mani lesu mani be ’bo indio Emi nya, emi ’ba agyiru ’diyi la, emi mvu emi mvu angiri, emi ’ba mani lele ’diyi la! Esele cozu rari candiru

2Ma ko o’du ra, te ma asi koni o’du ku. Eri o’duko agu mani lelerini! Eri jotile kponi, kini, Mi zi ma dri, ma amvipi, odrua mani le1eri, a’balau mani, alatatararuri; te andreli dri ma dri yiru, azini dri’bi ma dria ’diyi yiru yi otiza ini berisi.

3Ma tru ma bongo amveleruri ’bo,ma di nga eri su ngoni ngoni ya? Ma oji ma pa ’bo, ma di nga yi ini ondiru ngoni ngoni ya?

4Agu mani leleri ’ba i ma dri jotile talaa, ava fi ma asia erisi tu.

5Ma enga uru jotile zizu agu mani leleri dri, ajinguru oti ma driarisi oti oti, ajinguru edele oduru oti ma drianzi ma ruaarisi, jotile ma ekilimgbi ma dria.

6Ma zi jotile agu mani leleri dri, te isu agu mani leleri oja i vile ’bo, mu ra. Erini te e’yo ’yoria, ava erini fu ma tu. Ma ndru eri ra, te ma econi eri isuzaru ku; ma omve eri ra, te a’ini ma dri e’yo omvizu ku.

7’Ba angu agei tepi acipi aku amborua ’diyi isu ma ra; yi co ma ra, ogba ma ari be, ’ba abi kaliru ma agei tepi ’diyi pa bongo ’beza mani ma driarisi ra.

8Ma fe emi oyo so, Yerusalemu i ezoanzi la, emi ka agu mani leleri isu ra, emi ma olu eri tia kini letani ma fu azoru.

9Agu mini leleri aga ’ba ’ba azinini leleri ngoni ngoni ya? mi ’ba ovupi ndrizaru tu oku azini ma eseliari lao. Agu mini leleri aga ’ba ’ba azinini leleri ’dini ngoni mini ani ama fezu oyo sozu ’dinileni ya?

10Agu mani leleri ovu emveru vini rua alaru be indi, ’ba endrepi tu ’ba alifu mudri ma eseliari.

11Eri ma dri ovu ekile mele alaru turile; dri’bini du tre tre, iniru ekile korekele.

12Eri ma mile ovu kile a’balau yi ara tia ’diyile, yi ojipi lesusi, yi otipi yi paria kililiru ’diyi.

13Eri ma o’bolo ovu kile pari pati aji be arikarirurinile, kile amu troza pati bi be arikariru ’diyinile. Eri ma tile kile ojo ajinguru oduruni otizu aleniasirile.

14Dri erini ovu ekile driadriamva meleru, ’bani oni beruleruri otizu ruaniarile. Rua erini ovu afa ewasiru ’bani oni safiraru ’diyi o’bazu tre ruaniarile.

15Pa erini ovu kile idiaru edele oni ndrizarurisi ofile ’bile edele mele alarusi ’diyi ma aliarile. E’data erini ovu Lebanonile, ndrizaru tu kite mario patile.

16Ti erini ovu aluzaru tu, ada eri ma mgbari cala ndrizaru tu. ’Di agu mani leleri azini ’di ma agyi’i, emi Yerusalemu ezoanzi la.

← Chapter 4 Jump to: Chapter 6 →