Song of Solomon 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Inisi ma vile gbolo dria ma ndru agu ma orindini leleri; ma ndru eri ra, te ma isuni eri ku.

2Ma ’yo ra, Ma nga enga curu’do, ma nga mu aku amboru ma alia gbokoa, azini geri wala ’diyi ma alia; ma nga ’ba ma orindini leleri ndru. Ma ndru eri ra, te ma isuni eri ku.

3’Ba angu ma agei tepi acipi aku amborua ’diyi isu ma ra, Ma ’yo yi ma tia, Emi ndre ’ba ma orindini leleri ra ya?

4Te mani yi agaria were ma isu agu ma orindini leleri ra. Ma bi eri ci, ma kuni eri muzu ku kpere mani eri ejiria ma andri vile joa, kpere fizu ma andri ma tipiri ma jo aliza ma alia.

5Ma fe emi oyo so, Yerusalemu ezoanzi la, ova piyisi nyajo asea ’diyi be, emi ma fe letani engazu ku, emi ma oru eri ku, de nga eri lenini ku. Acizu omu oku pari nyaeuria

6’Ba emupi roko driarisi kile acikani tule pirirurile, ngupi arikariru ajinguru pisi obiese pie afa dria arikariru ma fura ’ba afa ozipirini ejileri pieri a’di’i ya?

7Mi lu, eri gbolo Sulemanini ’duzu inzitasiri ’Ba kali azia okpo be ’diyi ageinia ci, yi ’ba okporu Israelini ’diyi ma azi.

8Yi dria sei be, ’ba nipi omba ’dipi tu ’diyi, ’ba dria alu alu ovu i ma sei be i ma opilia ci, uri inisiri ma e’yosi.

9Opi Sulemani ede i ma afa ’ba ’duzu inzitaruri pati Lebanoniarisi.

10Eri ede pati erini idiaru ’diyi dahabusi, etini melesi, kiti rizuri afa okalakokalarurisi; ede aleni alaru leta ezoanzi Yerusalemunini felerisi.

11Emi fu, Zioni ma ezoanzi la! Emi ndre opi Sulemanini oku erini be, oku ndra andrini sule drinia o’du erini oku bizurisi, o’du eri ma asini ovuzu ayikosiriari.

← Chapter 2 Jump to: Chapter 4 →