Song of Solomon 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Mi lu, mi ovu ndrizaru, odrua mani leleri, mi lu, mi ove ndrizaru! Mi mile si kile a’balaunirile bongo mini ma talaasi. Mi dri’bi ovu kile ndri ongulumuru lapi oni Gileadiari ma kalaa ’diyile.

2Mi si yi ovu kabilo ongulumuru’bani ’bikoni lile o’diru, ibipi efupi yi rua ojiria ’diyile, yi alu a ti ejoru, aluni yi ma eselia mvani drazu drinia rani yo.

3Mi tile ovu kile wizi baka: ekarurile, mi ti ndri tu. Mi o’bolo ovu kile patiefi pomegranateni ma egalepile bongo mini ma talaa.

4Mi ombele ovu kile jo izuru Daudini, sile afa ombani ’diyi o’bazu aleniarile, yini gombere o’izu alenia alifu alurile, gombere ’diyi dria ’ba okporu ombaa ’diyini.

5Mi ba iri ’diyi ovu kile ovaanzi iri, ovani tile ejoru, iribi nyapi ojo eselia ’diyile.

6Kpere anguni atiria, endrilendrini afiria, ma nga tu oni izu ajinguruniria azini oni were obieseniria.

7Mi cala ndrizaru, odrua mani leleri; nyebileko mi ruaa aluni yo.

8Mi emu ma be engazu Lebano-niasi, amurua mani, mi emu ma be engazu Lebanonia. Mi ndre angu engazu Amana ma driasi, engazu Seniri pi ma driasi Herimoni be, engazu kami ojia, engazu oni izu o’duni ovuzu ’diyia indi.

9Mi ’du ma asi ’bo, ma amvipi, amurua maniri, mi ’du ma asi mi mileni ma ndrezu pale alurisi ’bo, nyoro efi alu mi ombelearisi indi.

10Leta miniri ndri ’doni, ma amvipi la, amurua maniri! Leta mini ma onyi aga patiefi ma suniri ra ’doni ya! Odu efiza mini ma aji ngu: onyiru aga odu dria aji be arikari ’diyi ra ’doni ya!

11Mi tilea, amurua maniri la, anyuosoni rani; anyuoso pi lesu be mi andre etia; bongo mini ’diyi ma nguza kile nguza Lebanoninirile.

12Ma amvipi, amurua maniri, eri amvu ageini tole ciri, yi a’di were ’bani tini bile ciri, yi a’di amboru tini opile ciri’i.

13Pati idiza mini yi ovu pati pomegranateni sale kakau efi aje be amboru ’yapi ’diyi, pati omvele hinari pi pati arikariru ’diyi be,

14pati arikariruri pi pari safaroni pie, ekaka pie madalasini pie, pati dria obieseru ’diyi pie, ajinguru pie ojo nzoruri pie, pati dria aji be aluzaru tu ’diyi pie dria-

15mi yi a’di amvuari, yi gaza yi idriru beri, yi ara rapi Lebanoniasi ’diyi pie dria.

16Mi enga, oli andraleruri la, mi emu, oli uruleruri la! Mi li amvu mani ma dria, afa erini arikariru ’diyi ma aji ma efu ani. Agu mani leleri ma efi i ma amvua, ma nya patiefi aje be amboru ’diyi ani fo!

← Chapter 3 Jump to: Chapter 5 →