Song of Solomon 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Ma ovu patifu Saroniari, ma ojo e’buari’i.

2Kile ojo oci ma eseliarile, odrua mani leleri ovu ezoanzi ma eselia ’dinile.

3Ekile malaa pati asea ’diyi ma eseliarile, agu mani leleri ovu karile ma eselia ’dinile. Ma ri va eri ma endria ayiko amboru be, efi erini alu ma tilia tu,

4Eri eji ma jo omu nyazuria, eri ma bendera ma driari letani,

5Mi fe okpo ma dri zabibu ’wizasi, mi omi ma asi malaasi; letani ma fule azorurisi.

6Eri ma dri ejiri ovu ma dri ma etia, dri ndirisi eri amvu ma ci!

7Ma fe emi oyo so, Yerusalemu ezoanzi la, ova piyisi nyajo asea ’diyi be, emi ma fe letani engazu ku, emi ma oru eri ku, de nga eri lenini ku.

8O’duko agu mani lelerini! Mi lu, eri emu ombuzu oni ambo ambo ’diyi ma dria, otizu oni were were ’diyi ma dria indi.

9Agu mani leleri si kile ova, kani oborojo mvale. Mi lu, eri pa so ama vile abi ma ngukua, eri angu lu derisasi, e’dazu talanisi ceo

10Agu mani leleri olu ’yo ma tia kini: Mi enga, odrua mani leleri, odrua mani ndripi tori, mi efu emu ma vu;

11te mi lu nga, ewu egbeniri aga ’bo, ozoo ati ’bo, de ira.

12Patifu yi e’da nyaku dria ra, ewu ariani ongo ngozuri eca ’bo, azini o’duko a’balauni ovu di erizaru ama vile angua.

13Elio ’yapi wataru ’diyi wa wa, zabibu ’ba fu ’bo; yi ma aji ngu arikariru. Mi enga, odrua mani leleri, odrua mani ndripi turi, mi efu emu ma vu.

14A’balau mani ovupi oni osiri ma talaari la, ovupi angu zizaru pari gulukuruari ma aliari, mi fe ma ma ndre mi mileti, mi fe ma ma eri mi o’duko; o’duko minini ovule aluzarurisi, mi miletini e’dale ndrizarurisi indi.

15Mi obi amani obalako yi, obalako nyiri zabibu pati amani ezapi ’diyi; zabibu pati amanini fu ’bale ’borisi.

16Agu mani leleri ovu mani azini ma ovu erini, eri nyaka fe kabilo erini o’biru ’diyi dri ojo ma eselia.

17Kpere anguni atiria, endrilendrini afiria, mi oja mi, agu mani leleri, mi ma ovu ekile ovale kani oborojo ma mva oni Beteriari ma driarile.

← Chapter 1 Jump to: Chapter 3 →