Song of Solomon 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1Agu mini leleri mu ngoa ya, mi ndripi tu oku ma eseliari la? Agu mini leleri oja i mu ngole ya? ama ma ndru eri mi be beni fo!

2Agu mani leleri si andraleru i vile amvua, pari pati aji be arikariru ’diyi sazuria, nyaka fezu amvua ’dale azini ojo okuzu.

3Ma agu roani lelerini, agu mani leleri eri mani; eri nyaka fe kabilo erini dri ojo ma eselia.

4Mi ovu ndrizaru, odrua mani leleri la, kile Tirizale, mi ndrizaru Yerusalemule, uriuriru kile ’ba ombani bendera be ’diyile.

5Mi ma oja mi mile ma vurisi ra, yini fele ma asini kole korisiri’bi mini ovu ndri ongulumuru, lapi Gileadi ma kalaa ’diyile.

6Mi si ovu kabilo o’biru ibipi efupi yi rua ojiria ’diyile, yi alu alu ti ejoru, aluni yi ma eselia mvani drazu drinia rani yo.

7Mi o’bolo si kile patiefi pomegranateni ma egalepile bongo mini ma talaa.

8Oku opiru indi kali azia, azini oku ati’baru ’diyi kali aro, aliria ma kalafe yi lakokoru.

9Te a’balau mani, odrua alatatararu maniri ovu alu a’dule, eri i andri ma mva alu ilipiliruri, ’ba eri tipirini peleri’i. Ezoanzi ndre eri ra, omve eri drilebaru; ada, oku opiru ’diyi pi oku ati’baru ’diyi be, yi inzi eri ra.

10Eri’i e’dapi kile o’bitile, ndrizaru kile mbale, alaru etule, azini uriuriru kile ’ba ombani bendera be ’diyileri a’di’i ya?

11Ma si andraleru amvu patiefiniria ’dale, tibi e’bua ’diyi ndrezu, ndrezu kani zabibu pati ’ba fu emi ’bo ya, kani pomegranate ’ba fu ra yani.

12De nga ma nini e’yoni ku, ma asisile ’ba ma ovuzu gari ’ba mani opiru ’diyini ma eselia.

13Mi atri dri, mi atri dri vile, mi Sulamu ezo la, mi atri dri, mi atri dri, ama ma ndre mi ani beni. Emi le Sulamu ezo nde ndre a’disi ya? kile mini ’ba ongo tupi Mahanaimua ’diyi ndrelerile. Emi le Sulamu ezo nde ndre a’disi ya? kile mini ’ba ongo tupi Mahanaimua ’diyi ndrelerile.

← Chapter 5 Jump to: Chapter 7 →