Exodus 28 — Lahu Bible Edited © Thailand Bible Society and Bible Society of Myanmar, 2010, 2020.

1Iˉsaˍreˍlaˆ chaw chi ma ve awˬ hkʼaw lo ngaˬ ve paw hkuˇ te tuˬ, nawˬ viˉ paˍ Aˍronˍ leh yawˇ ve yaˇ Naˍdaˆ, Aˍbiˇhuˆ, Eˇliˇshaˍ leh Iˉtaˍmaˍ hui hta‸ nawˬ geh kuˬ yuˬ taˍo‸.

2Nyi sha leh awˬ me‸ awˬ hponˇ cawˬ la tuˬ, nawˬ viˉ paˍ Aˍronˍ awˬ pon da‸ kehˬ ve veu‸ kʼaˇ teˇ hpaˍ hta‸ nawˬ gʼa te ve yoˬ.

3Aˍronˍ hta‸ ngaˬ ve paw hkuˇ te tcuh htaˇ, yawˇ veu‸ deh tuˬ ve veu‸ kʼaˇ te piˇ tuˬ ngaˬ cuˇ yiˍ piˇ taˍ ve hpa chiˇ shehˍ hpaˇ teˇ hpaˍ hta‸ nawˬ geh kuˬ yuˬ taˍ-o‸.

4Yawˇ hui gʼa te tuˬ ve veu‸ kʼaˇ teˇ hpaˍ lehˬ, nyi ma pui beh tuˬ, aˉ po‸ zuhˬ ma, awˬ sheuˉ laiˉ ceuˬ cawˬ ve aˉ po‸ awˬ hta‸ deh tuˬ, uˉ nyiˉ leh caw‸ cehˍ nyi lo hpeh tuˬ ve hpaˉ ce‸, chi teˇ hpaˍ hpeh‸ ve yoˬ. Nawˬ viˉ paˍ Aˍronˍ leh yawˇ ve yaˇ teˇ hpaˍ ngaˬ ve paw hkuˇ te htaˇ veu‸ deh tuˬ,

5yawˇ hui lehˬ shi hkeh leh, awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh hta‸ yuˬ leh da‸ jaˇ ve veu‸ kʼaˇ gʼa te chiˇ ve yoˬ.

6Yawˇ hui lehˬ, shi hkeh leh awˬ sheuˉ nawˉ-ehˍ, nyiˉ-ehˍ nyi naˆ meuˉ-ehˍ cawˬ ve gʼo‸ hkeh hta‸ yuˬ leh da‸ jaˇ ve aˉ po‸ zuhˬ ma hpeh‸ la tuˬ gʼa te chiˇ ve yoˬ.

7Aˉ po‸ oˇ ve lehˬ, la‸ hpeh kʼaˉ hkʼoˆ lo gʼawˬ tiˉ gʼa ve aˉ po‸ gʼa hpeh‸ ve yoˬ.

8Aˉ po‸ awˬ hkʼoˆ veu‸ tuˬ ve nyi ma pui beh tuˬ hta‸ htawˇ, aˉ po‸ hta‸ hkʼa hawehˍ awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh, shi hkeh hta‸ yuˬ leh, gʼa tawˉ nehˉ taˍ ve yoˬ.

9Haˉ pui shehnˉ nyiˇ maˬ hta‸ yuˬ leh, oˇ ve awˬ hkʼoˆ lo Yaˍkoˆ ve yaˇ teˇ hpaˍ ve awˬ meh hta‸ nawˬ gʼa htawˆ keu taˍ ve yoˬ.

10Haˉ pui shehnˉ teˇ maˬ awˬ hkʼoˆ lo yaˇ hkaw‸ gʼaˇ ve awˬ meh leh, awˬ nu ve teˇ maˬ awˬ hkʼoˆ lo yaˇ hkaw‸ gʼaˇ ve awˬ meh gʼa htawˆ keu ve yoˬ.

11La‸ meuˇ puiˉ ve chaw hta‸ ca leh, Yaˍkoˆ yaˇ chi teˇ hpaˍ ve awˬ meh haˉ pui shehnˉ nyiˇ maˬ awˬ hkʼoˆ nawˬ gʼa htawˆ keu taˍ ve yoˬ.

12Haˉ pui shehnˉ oˇ ve teˇ hpaˍ hta‸ shi mu‸ hkʼu hkʼaw keu leh, Iˉsaˍreˍlaˆ chaw teˇ chi nyiˇ ceuˬ cawˬ ve hta‸ dawˇ nawˇ tuˬ, aˉ po‸ zuhˬ ma oˇ ve awˬ hkʼoˆ lo gʼa hpeh chiˇ taˍ ve yoˬ. Ngaˬ yawˇ hui hta‸ dawˇ nawˇ hpeh‸ tuˬ, Aˍronˍ lehˬ awˬ meh oˇ ve teˇ hpaˍ hta‸ yawˇ ve la‸ hpeh kʼaˉ hkʼoˆ lo gʼa hpeh chiˇ taˍ ve yoˬ.

13Shi mu‸ hkʼu ehˉ nyiˇ maˬ hta‸ te leh,

14shi caˆ nyiˇ caˆ hta‸ vaw‸ da‸ peuˬ hkʼaw‸ nawˉ, shi mu‸ hkʼu ehˉ oˇ ve teˇ hpaˍ hta‸ gʼa hpeh taˍ ve yoˬ.

15Awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh, shi hkeh teˇ hpaˍ hta‸ yuˬ leh aˉ po‸ te chiˇ ve hkʼe, nyi ma pui beh tuˬ ve hta‸ htawˇ gʼa te ve yoˬ.

16Oˇ ve hta‸ nyiˇ kʼaw‸ teh te leh, zuhˬ hpawˇ teˇ htu, kʼehˬ hpawˇ teˇ htu gʼa cawˬ piˇ ve yoˬ.

17Nyi ma pui beh tuˬ oˇ ve awˬ hkʼoˆ lo, shehnˉ shiˍ awˇ cawˆ gʼa tawˉ keu taˍ ve yoˬ. Awˬ hkuiˉ puiˍ ve teˇ cawˆ lehˬ, awˬ sheuˉ laiˉ ceuˬ cawˬ ve shehnˉ, naw hpui ve shehnˉ, leh hpuˉ-ehˍ ve shehnˉ teˇ hpaˍ,

18nyiˇ cawˆ teˇ cawˆ lehˬ, naw naˆ ve shehnˉ, ga‸-ehˍ ve shehnˉ, nyiˉ-ehˍ ve shehnˉ,

19shehˆ cawˆ teˇ cawˆ lehˬ, shi nyi ve shehnˉ, naw shi ve shehnˉ, shiˉ-ehˍ ve shehnˉ,

20awˇ cawˆ teˇ cawˆ leh, shi naw ve shehnˉ, nyi hpui ve shehnˉ, nyi naˆ ve shehnˉ chi teˇ hpaˍ hta‸ shi mu‸ hkʼu ehˉ hkʼaw gʼa keu taˍ ve yoˬ.

21Yaˍkoˆ ve yaˇ teˇ chi nyiˇ gʼaˇ cawˬ ve hkʼe, haˉ pui shehnˉ oˇ ve teˇ shiˍ awˬ hkʼoˆ yaˇ teˇ gʼaˇ ve awˬ meh gʼa htawˆ keu taˍ ve yoˬ.

22Nyi ma pui hta‸ beh tuˬ awˬ pon shi caˆ nyiˇ caˆ yuˬ leh aˉ caˆ hkeh hkʼa shuˍ vaw‸ da‸ peuˬ hkʼaw‸ nawˉ,

23shi la‸ kawˬ nyiˇ maˬ kʼaw‸ te leh, nyi ma pui beh tuˬawˬ na paˉ, awˬ ceˍ nyiˇ hpawˇ lo gʼa hpeh taˍ ve yoˬ.

24Shi caˆ oˇ ve nyiˇ caˆ lehˬ, shi la‸ kawˬ oˇ ve nyiˇ maˬ hta‸ gʼa hpeh taˍ ve yoˬ.

25Teˇ hpawˇ lo cawˬ taˍ sheˍ ve shi caˆ nyiˇ caˆ lehˬ, shi mu‸ hkʼu ehˉ teˇ hpaˍ hta‸ gʼa kʼaw‸ hpeh taˍ ve yoˬ. Oˇ hkʼe te ve kʼo, nyi ma pui beh tuˬ ve chi lehˬ, aˉ po‸ zuhˬ ma gʼuˇ suhˍ teˇ hkʼaˇ hteˇ lehˍ cawˬ taˍ tuˬ yoˬ.

26Shi la‸ kawˬ nyiˇ maˬ kʼaw‸ te leh, nyi ma pui beh tuˬ ve, awˬ hawˉ awˬ ceˍ nyiˇ hpawˇ lo gʼa hpeh taˍ ve yoˬ.

27Shi la‸ kawˬ nyiˇ maˬ kʼaw‸ te leh, aˉ po‸ zuhˬ ma gʼuˇ suhˍ paˉ hpawˇ, nyi ma pui beh tuˬ ve hta‸ hpeh taˍ ve shi caˆ teˇ hpawˇ lo teˇ maˬ gʼa hpeh taˍ ve yoˬ.

28Nyi ma pui beh tuˬ ve hta‸ hpeh taˍ ve shi la‸ kawˬ leh aˉ po‸ zuhˬ ma hta‸ hpeh taˍ ve shi la‸ kawˬ hta‸ nawˉ-ehˍ ve hpa caˆ yuˬ leh gʼa hpeh taˍ ve yoˬ. Nyi ma pui beh tuˬ ve chi lehˬ, aˉ po‸ zuhˬ ma awˬ hkʼoˆ hkʼaˬ htaˆ ka‸ gʼa cawˬ taˍ piˇ ve yoˬ.

29Aˍronˍ lehˬ da‸ kehˬ ve chehˇ kuiˬ lo laˬ ve teˇ yanˇ, ngaˬ Iˉsaˍreˍlaˆ chaw teˇ hpaˍ hta‸ hkʼaˬ htaˆ ka‸ dawˇ nawˇ chehˇ tuˬ awˬ pon, nyi ma pui beh tuˬ hta‸ tawˉ keu taˍ ve Yaˍkoˆ ve yaˇ teˇ hpaˍ ve awˬ meh hta‸ yawˇ ve nyi ma pui hkʼoˆ lo gʼa pfuhˇ taˍ ve yoˬ.

30Nyi ma pui beh tuˬ ve hpa awˬ hkʼaw lo, Uˆrenˍ leh Tuˇmenˍ hta‸ gʼa keu taˍ ve yoˬ. Aˍronˍ lehˬ, ngaˬ mehˆ gʼuˇ suhˍ lo laˬ ve teˇ yanˇ, Iˉsaˍreˍlaˆ chaw hui hta‸ ngaˬ ve a loˍ hpeu‸ maˍ piˇ gʼa tuˬ awˬ ceuˬ oˇ ve teˇ hpaˍ hta‸ yawˇ ve nyi ma pui hkʼoˆ hkʼaˬ htaˆ ka‸ gʼa pfuhˇ taˍ ve yoˬ.

31Yawˇ veu‸ deh tuˬ ve aˉ po‸ zuhˬ ma hta‸ nawˉ-ehˍ ve hpa tiˉ gʼa yuˬ tawˉ ve yoˬ.

32Oˇ kʼoˍ shi keu gʼa tuˬ, hpa oˇ ve awˬ kʼaw ji lo gʼa hkoˇ hpe‸ taˍ leh yeˬ chaweh gʼa kʼaw‸ tawˉ keu taˍ ve yoˬ.

33Awˬ sheuˉ nawˉ-ehˍ, nyiˉ-ehˍ nyi naˆ meuˉ-ehˍ cawˬ ve gʼo‸ hkeh hta‸ yuˬ leh aˉ ci ku shiˍ leh shi ju lu ehˉ teˇ hpaˍ gʼa te taˍ ve yoˬ.

34Peuˬ hkʼaw‸ nawˉ, aˉ po‸ zuhˬ ma awˬ mehˍ meuˇ lo, aˉ ci ku shiˍ teˇ shiˍ kʼo, shi ju lu teˇ shiˍ, chi hkʼe hkʼa caw zuhˇ gʼa hpeh taˍ ve yoˬ.

35Aˍronˍ lehˬ, ngaˬ mehˆ gʼuˇ suhˍ kanˉ te leh, da‸ kehˬ ve chehˇ kuiˬ hkʼaw tawˆ tawˆ lo‸ lo‸ te chehˇ ve teˇ yanˇ, yawˇ maˇ gʼa suh-e tuˬ, aˉ po‸ zuhˬ ma oˇ ve hta‸ gʼa veu‸ deh taˍ leh, ju lu ehˉ oˇ ve teˇ hpaˍ gʼa bvuhˬ la piˇ chehˇve yoˬ.

36Shi mu‸ hkʼu ehˉ teˇ maˬ te leh oˇ ve awˬ hkʼoˆ lo, Gʼuiˬsha hta‸ chiˇ a‸ piˇ taˍ ve teh‸ kʼoˆ ve li‸ mehˆ gʼa htawˆ bvuh‸ taˍ ve yoˬ.

37Oˇ ve hta‸ nawˉ-ehˍ ve hpa caˆ yuˬ hpeh leh, yawˇ ve uˉ nyiˉ hta‸ gʼa hpeh tsuh‸ piˇ taˍ ve yoˬ.

38Iˉsaˍreˍlaˆ chaw teˇ hpaˍ ngaˬ hta‸ tanˇ laˇ ve awˬ ceuˬ maˇ da‸ ve cawˬ ve htawˇ, ngaˬ venˇbaˆ hpehˇ piˇ leh ha‸ yuˬ piˇ hpeh‸ tuˬ, Aˍronˍ lehˬ oˇ ve hta‸ yawˇ ve naˍ kʼa‸ pui hkʼoˆ lo gʼa cawˬ taˍ piˇ ve yoˬ.

39Awˬ sheuˉ laiˉ ceuˬ cawˬ ve aˉ po‸ awˬ hta‸ deh tuˬ, uˉ nyiˉ leh caw‸ cehˍ nyi lo hpeh tuˬ ve hpaˉ ce‸ hta‸ htawˇ, da‸ jaˇ ve hpa yuˬ leh gʼa te ve yoˬ.

40Aˍronˍ ve yaˇ teˇ hpaˍ nyi sha leh awˬ me‸ awˬ hponˇ cawˬ tuˬ, yawˇ hui hta‸ aˉ po‸ zuhˬ ma, caw‸ cehˍ nyi lo hpeh tuˬ ve hpaˉ ce‸ leh uˉ tcuhˍ teˇ hpaˍ gʼa tawˉ piˇ taˍ ve yoˬ.

41Nawˬ viˉ paˍ Aˍronˍ leh yawˇ ve yaˇ teˇ hpaˍ hta‸ veu‸ kʼaˇ oˇ ve teˇ hpaˍ feuˉ piˇ peuˬ hkʼaw‸ nawˉ yawˇ hui ngaˬ ve paw hkuˇ hpeh‸ la tuˬ, yawˇ hui hta‸ naˍ manˇ pfuhˍ piˇ leh aˉ yaˇ gʼa piˇ ve yoˬ.

42Yawˇ hui maˇ gʼa ya‸ taw tuˬ, haˍ tawehˇ teˇ hpaˍ htawˇ gʼa tawˉ piˇ ve yoˬ.

43Aˍronˍ leh yawˇ ve yaˇ teˇ hpaˍ, ngaˬ mehˆ gʼuˇ suhˍ lo laˬ htaˇ maˇ kʼoˆ, da‸ kehˬ ve chehˇ kuiˬ lo cawˬ ve tuˉ tanˇ kuiˬ lo kʼai htaˇ maˇ kʼoˆ, yawˇ hui maˇ gʼa ya‸ taw leh maˇ gʼa suh-e tuˬ, veu‸ kʼaˇ oˇ ve teˇ hpaˍ hta‸ gʼa veu‸ taˍ ve yoˬ. Chi ve lehˬ, Aˍronˍ leh yawˇ ve awˬ ceuˬ awˬ hkʼaˇ teˇ co peuˬ teˇ co na yuˬ leh gʼa te tuˬ ve awˬ liˇ hpeh‸ ve yoˬ.