Exodus 33

Lahu Bible Edited © Thailand Bible Society and Bible Society of Myanmar, 2010, 2020.

← Chapter 32 Jump to: Chapter 34 →

1Oˇ ve hkʼaw‸ nawˉ Gʼuiˬsha Moˉseˍ hta‸ kʼoˆ piˇ ve, Nawˬ Eˇjiˇtu‸ mvuhˇmiˬ hkʼaw shiˍ tawˆ la taˍ ve chaw chi teˇ hpaˍ hta‸ shiˍ veu leh, Aˍbraˍhanˍ, Iˉcaˆ, Yaˍkoˆ hui hta‸ ngaˬ piˇ tuˬ ka ti‸ te taˍ ve mvuhˇmiˬ hkʼaw lo shiˍ kʼai piˇ-oˆ.

2Ngaˬ ve mvuhˇ naw tcuh yaˇ teˇ gʼaˇ nawˬ hui gʼuˇ suhˍ kʼai tcuh leh, ngaˬ lehˬ Hkaˍnaˍniˆ chaw, Aˍmawˇriˆ chaw, Hiˇtiˆ chaw, Hpeˍraˍziˆ chaw, Hiˇviˆ chaw leh Yeˍbuˇsiˆ chaw hui hta‸ gʼa‸ kʼoˬ piˇ tuˬ yoˬ.

3Nawˬ hui lehˬ hkuiˇ jaˇ da‸ jaˇ ve mvuhˇmiˬ lo kʼai chehˇ taˍ ve yoˬ. Ya‸ hkʼaˇ, ngaˬ nawˬ hui geh te toˇ tuˬ ve maˇ heˆ. Awˬ lawn kʼo, nawˬ hui lehˬ nyi ma heh ve chaw hpeh‸ ve pa taw, ya‸ kʼaw kʼaˉ lo ngaˬ nawˬ hui hta‸ te luˬ te sheˆ la ve hta‸ dawˇ hkiˉ tuˬ cawˬ ve yoˬ, teh‸ Moˉseˍ hta‸ kʼoˆ piˇ ve yoˬ.

4Iˉsaˍreˍlaˆ chaw teˇ hpaˍ tawˇ oˇ ve hta‸ gʼa kaˇ ve teˇ yanˇ dawˇ haˍ jaˇ leh, yawˇ hui teˇ gʼaˇ ka‸ hpu hkʼeun shi hkʼeun maˇ kʼaw‸ tcuhˉ ve yoˬ.

5Oˇ htaˇ Gʼuiˬsha kʼoˆ ve, Nawˬ hui nyi ma heh ve chaw hpeh‸ ve yoˬ. Ngaˬ nawˬ hui geh te toˇ ve hkʼe kʼo, nawˬ hui luˬ kʼai ve maw jaˇ peuˬ. Chi beu‸ nawˬ hui ve hpu hkʼeun shi hkʼeun teˇ hpaˍ hta‸ kʼehˆ teh taˍ-oˬ. Nawˬ hui hta‸ hkʼaˬ hkʼe te cawˇ ve hta‸ ngaˬ dawˇ cheˆ tuˬ yoˬ, teh‸ Moˉseˍ hta‸ kʼoˆ piˇ ve yoˬ.

6Hkʼe te leh, Iˉsaˍreˍlaˆ chaw teˇ hpaˍ Siˉnaˆ hkʼaw lo tawˆ kʼai peuˬ hkʼaw‸ nawˉ, yawˇ hui ve hpu hkʼeun shi hkʼeun teˇ hpaˍ hta‸ maˇ kʼaw‸ tcuhˉ ve yoˬ.

7Moˉseˍ lehˬ, yawˇ hui deh chehˇ kuiˬ hta‸ a ciˉ vuiˇ ve chehˇ kuiˬ teˇ kaˬ lo hpa aˉ po kʼo te taˍ ve yoˬ. Aˉ po kʼo chi ve hta‸ Gʼuiˬsha ve chehˇ kuiˬ teh‸ meh piˇ leh, Gʼuiˬsha hta‸ na‸ uˉ te da‸ gaˇ ve chaw oˇ kaˬ lo kʼai ve yoˬ.

8Teˇ pawˆ le le Moˉseˍ hpa aˉ po kʼo lo kʼai ve teˇ yanˇ, chaw teˇ gʼaˇ le le a shu yawˇ ve aˉ po kʼo yehˬmiˉhpe‸ lo huˉ taˍ leh, yawˇ hpa aˉ po kʼo hkʼaw lo‸-e htaˇ hkʼa gaˬ gʼa‸ nyi taˍ ve yoˬ.

9Moˉseˍ lehˬ, hpa aˉ po kʼo hkʼaw lo‸-e ve teˇ yanˇ, moˬ yehˬ hkuiˉ daw ya‸ la leh aˉ po kʼo yehˬmiˉhpe‸ lo chehˇ taˍ ve yoˬ. Gʼuiˬsha lehˬ moˬ hkʼaw chehˇ taˍ leh, Moˉseˍ hta‸ tawˇ yaw piˇ ve yoˬ.

10Moˬ yehˬ hkuiˉ daw hpa aˉ po kʼo yehˬmiˉhpe‸ lo chehˇ taˍ ve hta‸ chaw yaˇ teˇ hpaˍ gʼa mawˬ ve teˇ yanˇ, yawˇ hui miˬ chaˇ hkʼoˆ lo boˆ taˍ ve yoˬ.

11Chaw yaˇ chawˇ chawˇ na‸ uˉ te da‸ ve hkʼe, Gʼuiˬsha lehˬ Moˉseˍ hta‸ mehˆ hpfuhˇ tawˍ da‸ leh tawˇ yaw piˇ ve yoˬ. Oˇ ve hkʼaw‸ nawˉ, Moˉseˍ yawˇ hui deh chehˇ taˍ kuiˬ lo kʼaw‸ la ve yoˬ. Ya‸ hkʼaˇ, yawˇ hta‸ ga piˇ shehˍ hpaˇ Nunˍ ve yaˇ paˍ Yawˇsuˆ lehˬ, hpa aˉ po kʼo hkʼaw chehˇ taˍ ve yoˬ.

12Moˉseˍ Gʼuiˬsha hta‸ kʼoˆ piˇ ve, Chaw chi teˇ hpaˍ hta‸ shiˍ leh mvuhˇmiˬ oˇ ve hkʼaw‸ lo‸-e tuˬ, nawˬ ngaˬ hta‸ kʼoˆ laˇ taˍ ve yoˬ. Ya‸ hkʼaˇ, ngaˬ geh a shu hta‸ kʼai peu laˇ tuˬ ve nawˬ ngaˬ hta‸ maˇ hto laˇ. Nawˬ ngaˬ hta‸ shiˍ taˍ leh ngaˬ hta‸ nyi hkʼaˇ suh ve yoˬ, teh‸ kʼoˆ laˇ ve yoˬ.

13Nawˬ ngaˬ hta‸ awˬ tehˬ awˬ na nyi hkʼaˇ suh ve kʼo, nawˬ hta‸ shiˍ hpeh‸ tuˬ leh nawˬ nyi hkʼaˇ suh ve kanˉ hta‸ leuˉ leh kʼaw‸ te gʼa tuˬ, nawˬ ve dawˇ hkʼaˇ ngaˬ hta‸ a ciˉ hpeu‸ maˍ laˇ-oˆ. Chaw chi teˇ hpaˍ lehˬ, nawˬ ve chaw ceuˬ hpeh‸ ve hta‸ a ciˉ dawˇ nawˇ taˍ-o‸, teh‸ Gʼuiˬsha hta‸ kʼoˆ piˇ ve yoˬ.

14Oˇ htaˇ Gʼuiˬsha kʼoˆ ve, Ngaˬ nawˬ geh kʼai leh nawˬ hta‸ gʼaˇ shehˍ hpaˇ hpeh‸ la piˇ tuˬ yoˬ, teh‸ Moˉseˍ hta‸ kʼoˆ piˇ ve yoˬ.

15Moˉseˍ kʼaw‸ kʼoˆ ve, Nawˬ ngaˬ hui geh awˬ tehˬ awˬ na maˇ kʼai tuˬ ve kʼo, ngaˬ hui hta‸ choˬ kaˬ lo a ciˉ taˇ tawˆ kʼai tcuh laˇ-oˆ.

16Awˬ lawn kʼo, nawˬ ngaˬ hui geh maˇ kʼai ve kʼo, ngaˬ leh nawˬ ve chaw chi teˇ hpaˍ hta‸ nawˬ nyi hkʼaˇ suh chehˇ ve hta‸ a shu shiˍ hpeh‸ tuˬ le. Nawˬ ngaˬ hui geh kʼai ve kʼo, ngaˬ hui lehˬ awˬ nu ve chaw teˇ hpaˍ hta‸ peun da‸ jaˇ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ.

17Oˇ htaˇ Gʼuiˬsha kʼoˆ ve, Chi beu‸ nawˬ kʼoˆ ve hkʼe ngaˬ te tuˬ yoˬ. Awˬ lawn kʼo, ngaˬ nawˬ hta‸ nyi hkʼaˇ suh leh nawˬ hta‸ hkʼa deh‸ shiˍ taˍ ve yoˬ, teh‸ Moˉseˍ hta‸ kʼoˆ piˇ ve yoˬ.

18Oˇ htaˇ Moˉseˍ lehˬ, Nawˬ ve awˬ me‸ awˬ hponˇ ngaˬ hta‸ a ciˉ maw laˇ-oˆ, teh‸ Gʼuiˬsha hta‸ kʼoˆ piˇ ve yoˬ.

19Gʼuiˬsha kʼoˆ ve, Ngaˬ ve awˬ me‸ awˬ hponˇ hta‸ nawˬ mehˆ gʼuˇ suhˍ hpanˍ kʼai tcuh leh, ngaˬ ve awˬ meh Jawˇmawˇ hpeh‸ ve hta‸ nawˬ mehˆ gʼuˇ suhˍ ngaˬ kʼoˆ maˍ laˇ tuˬ yoˬ. Ngaˬ leuˆ yuˬ ve chaw hui hta‸ ngaˬ ha kʼaˉ piˇ tuˬ yoˬ.

20Ya‸ hkʼaˇ, ngaˬ ve mehˆ hpfuhˇ nawˬ hta‸ maw laˇ tuˬ ve maˇ heˆ. Awˬ lawn kʼo, ngaˬ hta‸ mawˬ ve chaw lehˬ, a sha‸ gʼa te‸ chehˇ tuˬ ve maˇ heˆ.

21Choˬ kaˬ ngaˬ paˇ lo nawˬ huˉ taˍ hpeh‸ ve haˉ pui shiˍ lonˉ teˇ maˬ cawˬ ve yoˬ.

22Ngaˬ ve awˬ me‸ awˬ hponˇ nawˬ hta‸ hpanˍ kʼai chehˇ ve teˇ yanˇ, nawˬ hta‸ haˉ pui kaˍ lo yuˬ keu laˇ leh, ngaˬ nawˬ hta‸ ponˬ kʼai htaˇ hkʼa gaˬ, ngaˬ ve la‸ sheh nawˬ hta‸ beh taˍ laˇ tuˬ yoˬ.

23Oˇ ve hkʼaw‸ nawˉ, ngaˬ ve la‸ sheh kʼaw‸ gʼawˬ hkʼaw‸ leh, nawˬ lehˬ ngaˬ ve caw‸ nawˉ hkʼaˇ hta‸ gʼa mawˬ tuˬ yoˬ. Ya‸ hkʼaˇ, ngaˬ ve mehˆ hpfuhˇ hta‸ nawˬ gʼa mawˬ tuˬ ve maˇ heˆ, teh‸ Moˉseˍ hta‸ kʼoˆ piˇ ve yoˬ.

← Chapter 32 Jump to: Chapter 34 →