Exodus 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Teˇ nyi htaˇ, Moˉseˍ lehˬ yawˇ awˬ puˍ Meˇdiˍanˍ paw hkuˇ Yeˍtaˍroˍ ve yawˬ teˇ hpaˍ hta‸ hawˉ chehˇ ve yoˬ. Yawˇ lehˬ, yawˬ oˇ ve teˇ hpaˍ hta‸ gʼa‸ veu leh da‸ kehˬ ve Siˉnaˆ hkʼaw lo kʼai ve yoˬ

2Oˇ kaˬ lo Gʼuiˬsha ve mvuhˇ naw tcuh yaˇ teˇ gʼaˇ, suhˆ buiˇ hkʼaw lo aˬ miˍ ha hkʼa shuˍ yawˇ mehˆ gʼuˇ suhˍ tawˆ la ve yoˬ. Suhˆ buiˇ oˇ ve aˬ miˍ to‸ chehˇ ve htawˇ, te‸ chiˉ maˇ hpeh‸ ve hta‸ yawˇ gʼa mawˬ ve yoˬ.

3Oˇ htaˇ Moˉseˍ lehˬ, Chi taw taw anˇ tuˬ cawˬ ve awˬ ceuˬ hta‸ ngaˬ ca nyi shaˍ. Aˬ hto‸ ma pa taw, suhˆ buiˇ oˇ ve hta‸ aˬ miˍ maˇ to‸ baˬ ve leh naˍ, teh‸ dawˇ ve yoˬ.

4Moˉseˍ laˬ chehˇ ve hta‸ Gʼuiˬsha gʼa mawˬ ve teˇ yanˇ, Gʼuiˬsha lehˬ suhˆ buiˇ oˇ ve hkʼaw chehˇ taˍ leh, Moˉseˍ-oˬ, Moˉseˍ-oˬ, teh‸ kuˬ ve yoˬ. Moˉseˍ htawˇ, Ngaˬ choˬ kaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.

5Gʼuiˬsha kʼoˆ ve, Awˬ paˇ neˇ lo taˇ laˬ. Nawˬ ve hkuiˉ nuˆ kʼehˆ-oˆ. Awˬ lawn kʼo, chi beu‸ nawˬ huˉ taˍ ve chehˇ kuiˬ lehˬ, da‸ kehˬ ve chehˇ kuiˬ hpeh‸ve yoˬ.

6Ngaˬ lehˬ, nawˬ puˍ lonˉ Aˍbraˍhanˍ, Iˉcaˆ, Yaˍkoˆ hui ve Gʼuiˬsha hpeh‸ ve yoˬ, teh‸ kʼoˆ piˇ ve yoˬ. Hkʼe te leh, Moˉseˍ Gʼuiˬsha hta‸ chiˇ nyi maˇ haˆ ve pa taw, yawˇ ve mehˆ hpfuhˇ hta‸ beh taˍ ve yoˬ.

7Oˇ htaˇ Gʼuiˬsha kʼoˆ ve, Eˇjiˇtu‸ mvuhˇmiˬ hkʼaw lo ngaˬ ve chaw teˇ hpaˍ hkʼaˬ ma gʼa tu‸ gʼa hkanˍ chehˇ ve hta‸ ngaˬ gʼa mawˬ peuˬ. Yawˇ hui hta‸ ponˬ laˇ tuˬ kuˬ chehˇ ve awˬ hkawˇ hta‸ htawˇ ngaˬ gʼa kaˇ peuˬ.

8Ngaˬ yawˇ hui hta‸ Eˇjiˇtu‸ chaw hui ve la‸ sheh hkʼaw ponˬ piˇ leh, hkuiˇ jaˇ da‸ jaˇ ve mvuhˇmiˬ lo yawˇ hui hta‸ shiˍ kʼai piˇ gaˇ ve yoˬ. Mvuhˇmiˬ oˇ ve lehˬ Hkaˍnaˍniˆ chaw, Hiˇtiˆ chaw, Aˍmawˇriˆ chaw, Hpeˍraˍziˆ chaw, Hiˇviˆ chaw leh Yeˍbuˇsiˆ chaw hui ve mvuhˇmiˬ hpeh‸ ve yoˬ.

9Chi beu‸ ngaˬ ve chaw teˇ hpaˍ kuˬ hawˬ chehˇ ve awˬ hkawˇ hta‸ ngaˬ gʼa kaˇ peuˬ. Eˇjiˇtu‸ chaw teˇ hpaˍ, yawˇ hui hta‸ hkʼaˬ hkʼe te fawˉ mehˍ piˇ chehˇ ve hta‸ htawˇ ngaˬ gʼa mawˬ peuˬ.

10Ngaˬ ve chaw teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ piˇ tuˬ, chi beu‸ ngaˬ nawˬ hta‸ Eˇjiˇtu‸ jawˇmawˇ geh kʼai peu laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

11Oˇ htaˇ Moˉseˍ kʼoˆ ve, Ngaˬ lehˬ te‸ chiˉ shiˍ ve chaw maˇ heˆ. Hkʼaˬ hkʼe te leh ngaˬ jawˇmawˇ geh kʼai leh, Iˉsaˍreˍlaˆ chaw teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ piˇ gʼa tuˬ le, teh‸ Gʼuiˬsha hta‸ kʼoˆ piˇ ve yoˬ.

12Gʼuiˬsha kʼaw‸ kʼoˆ ve, Ngaˬ nawˬ geh chehˇ taˍ ve yoˬ. Ngaˬ nawˬ hta‸ kʼai tcuh ve yoˬ, teh‸ nawˬ hkʼa deh‸ shiˍ hpeh‸ tuˬ shaˉ hkiˆ chi hkʼe cawˬ ve yoˬ. Chaw oˇ ve teˇ hpaˍ hta‸ nawˬ Eˇjiˇtu‸ mvuhˇmiˬ hkʼaw shiˍ tawˆ la peuˬ ve teˇ yanˇ, nawˬ hui hkʼa peu-eˬ hkʼaw pui chi ve awˬ hkʼoˆ lo ngaˬ hta‸ oˉ kʼoˍ gʼa pui tuˬ yoˬ, teh‸ yawˇ hta‸ kʼoˆ piˇ ve yoˬ.

13Oˇ htaˇ Moˉseˍ kʼoˆ ve, Ngaˬ Iˉsaˍreˍlaˆ chaw hui geh kʼai leh, Nawˬ hui ve awˬ puˍ awˬ pi hui ve Gʼuiˬsha ngaˬ hta‸ nawˬ hui geh peu laˇ ve yoˬ, teh‸ kʼoˆ piˇ tuˬ yoˬ. Ya‸ hkʼaˇ yawˇ hui lehˬ, Yawˇ ve awˬ meh aˬ hto‸ ma le, teh‸ kʼaw‸ na nyi laˇ ve kʼo, ngaˬ hkʼaˬ hkʼe gʼa kʼoˆ piˇ tuˬ ve le, teh‸ Gʼuiˬsha hta‸ kʼoˆ piˇ ve yoˬ.

14Gʼuiˬsha kʼaw‸ kʼoˆ ve, Ngaˬ lehˬ, Ngaˬ hpeh‸ ve yoˬ. Yawˇ hui hta‸ chi hkʼe kʼoˆ piˇ-oˆ. Ngaˬ lehˬ, ngaˬ hpeh‸ ve yoˬ, teh‸ kʼoˆ shehˍ hpaˇ teˇ gʼaˇ, ngaˬ hta‸ nawˬ hui geh peu laˇ ve yoˬ, teh‸ yawˇ hui hta‸ kʼoˆ piˇ-oˆ.

15Yawˇ hui ve awˬ puˍ lonˉ Aˍbraˍhanˍ, Iˉcaˆ, Yaˍkoˆ hui ve Gʼuiˬsha lehˬ, nawˬ hta‸ yawˇ hui geh peu laˇ taˍ ve yoˬ, teh‸ yawˇ hui hta‸ kʼoˆ piˇ-oˆ. Chi lehˬ, co co taiˍ taiˍ ngaˬ ve awˬ meh hpeh‸ leh, chaw yaˇ teˇ co peuˬ teˇ co ngaˬ hta‸ chi hkʼe tiˉ gʼa te kuˬ tuˬ yoˬ.

16Nawˬ kʼai leh Iˉsaˍreˍlaˆ chaw awˬ hoˉ awˬ naˬ teˇ hpaˍ hta‸ kuˬ hpawnˬ leh, yawˇ hui hta‸ chi hkʼe kʼoˆ piˇ-oˆ. Nawˬ hui ve awˬ puˍ lonˉ Aˍbraˍhanˍ, Iˉcaˆ, Yaˍkoˆ hui ve Gʼuiˬsha ngaˬ geh laˬ leh, ngaˬ hta‸ chi hkʼe kʼoˆ laˇ ve yoˬ. Eˇjiˇtu‸ chaw teˇ hpaˍ nawˬ hui hta‸ hkʼaˬ hkʼe te laˇ chehˇ ve hkʼa peu-eˬ hta‸ ngaˬ gʼa mawˬ peuˬ.

17Hkʼe te leh, fawˉ mehˍ ve hta‸ gʼa hkanˍ chehˇ ve Eˇjiˇtu‸ mvuhˇmiˬ chi hkʼaw nawˬ hui hta‸ shiˍ tawˆ laˇ leh, hkuiˇ jaˇ da‸ jaˇ ve Hkaˍnaˍniˆ chaw, Hiˇtiˆ chaw, Aˍmawˇriˆ chaw, Hpeˍraˍziˆ chaw, Hiˇviˆ chaw leh Yeˍbuˇsiˆ chaw hui ve mvuhˇmiˬ lo nawˬ hui hta‸ shiˍ kʼai laˇ tuˬ ngaˬ dawˇ cheˆ taˍ peuˬ, teh‸ yawˇ hui hta‸ kʼoˆ piˇ-oˆ.

18Yawˇ hui lehˬ, nawˬ ve tawˇ hta‸ na tuˬ yoˬ. Iˉsaˍreˍlaˆ chaw hui ve awˬ hoˉ awˬ naˬ teˇ hpaˍ hta‸ shiˍ veu leh, Eˇjiˇtu‸ jawˇmawˇ hta‸ chi hkʼe ca kʼoˆ piˇ-oˆ. Heˍbrehˇ chaw hui ve Gʼuiˬsha ngaˬ geh laˬ ve yoˬ. Hkʼe te leh, shehˆ nyi vuiˇ ve heh puiˉ hkʼaw lo, yawˇ hta‸ gʼa ca tuˉ tanˇ tuˬ ngaˬ hui hta‸ a hkaw-anˬ pe‸ laˇ-oˆ, teh‸ kʼoˆ piˇ-oˆ.

19Eˇjiˇtu‸ jawˇmawˇ lehˬ, yawˇ hta‸ a ciˉ hehnˇ chaweh maˇ te piˇ ve kʼo, nawˬ hui hta‸ maˇ hpehˇ laˇ taˬ ve hta‸ ngaˬ shiˍ ve yoˬ.

20Ya‸ hkʼaˇ, ngaˬ ve kanˇ paˆ hta‸ yehˇ leh Eˇjiˇtu‸ chaw hui hta‸ hehnˇ chaweh ciˍ yanˍ piˇ tuˬ yoˬ. Oˇ ve hkʼaw‸ nawˉ, yawˇ nawˬ hui hta‸ hpehˇ laˇ tuˬ yoˬ.

21Nawˬ hui tawˆ-e ve teˇ yanˇ, awˬ to kʼawˇ lehˍ maˇ gʼa tawˆ-e tuˬ, Eˇjiˇtu‸ chaw hui hta‸ ngaˬ kawˆ ve nyi ma cawˬ la piˇ tuˬ yoˬ.

22Iˉsaˍreˍlaˆ yaˇ miˇ teˇ gʼaˇ le le, Eˇjiˇtu‸ yaˇ miˇ teˇ hpaˍ geh kʼai leh, hpu hkʼeun shi hkʼeun teˇ hpaˍ leh veu‸ kʼaˇ teˇ hpaˍ lawˬ yuˬ peuˬ hkʼaw‸ nawˉ, yawˇ hui ve yaˇ paˍ yaˇ miˇ teˇ hpaˍ hta‸ feuˉ piˇ deh piˇ tuˬ yoˬ. Yawˇ hui lehˬ, Eˇjiˇtu‸ chaw hui ve mawˇ jeˬ teˇ hpaˍ hta‸ yuˬ leh gʼa tawˆ kʼai tuˬ yoˬ, teh‸ Moˉseˍ hta‸ kʼoˆ piˇ ve yoˬ.

← Chapter 2 Jump to: Chapter 4 →