Exodus 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Oˇ htaˇ Moˉseˍ kʼaw‸ kʼoˆ ve, Yawˇ hui ngaˬ hta‸ maˇ yonˍ leh ngaˬ kʼoˆ piˇ ve tawˇ hta‸ maˇ na ve awˬ hkʼoˆ, Gʼuiˬsha nawˬ geh laˬ ve maˇ heˆ taˬ, teh‸ kʼoˆ laˇ ve kʼo, ngaˬ hkʼaˬ hkʼe gʼa te tuˬ le, teh‸ Gʼuiˬsha hta‸ kʼaw‸ na nyi ve yoˬ.

2Oˇ htaˇ Gʼuiˬsha lehˬ, Nawˬ ve la‸sheh hkʼaw aˬ hto‸ ma cawˬ le, teh‸ yawˇ hta‸ na nyi ve yoˬ. Moˉseˍ lehˬ, Juˇ fuiˍ taˬ teˇ maˬ cawˬ ve yoˬ, teh‸ kʼaw‸ yaw hkʼaw‸ piˇ ve yoˬ.

3Gʼuiˬsha kʼoˆ ve, Nawˬ ve juˇ fuiˍ taˬ hta‸ miˬ chaˇ hkʼoˆ lo baˬ peu-o, teh‸ yawˇ hta‸ kʼoˆ piˇ ve yoˬ. Hkʼe te leh, Moˉseˍ lehˬ yawˇ ve juˇ fuiˍ hta‸ miˬ chaˇ hkʼoˆ lo baˬ peu leh juˇ fuiˍ oˇ ve vuiˬ hpeh‸ la ve yoˬ. Hkʼe te leh yawˇ gʼuiˇ hpaw-e ve yoˬ.

4Oˇ htaˇ Gʼuiˬsha lehˬ, Nawˬ ve la‸ sheh che leh vuiˬ mehˍ tu hta‸ yuˬ-o‸, teh‸ yawˇ hta‸ kʼoˆ piˇ ve yoˬ. Yawˇ yuˬ ve teˇ yanˇ, vuiˬ oˇ ve juˇ fuiˍ kʼaw‸ hpeh‸ la ve yoˬ.

5Gʼuiˬsha kʼoˆ ve, Chi ve lehˬ yawˇ hui ve awˬ puˍ lonˉ Aˍbraˍhanˍ, Iˉcaˆ leh Yaˍkoˆ hui ve Gʼuiˬsha nawˬ geh laˬ peuˬ ve hta‸ yawˇ hui yonˍ hpeh‸ tuˬ awˬ pon te maˍ laˇ ve awˬ heˆ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

6Teˇ pawˆ Gʼuiˬsha lehˬ, Nawˬ ve la‸ sheh aˉ po‸ hawˉ lo keu taˍ-o‸, teh‸ Moˉseˍ hta‸ kʼaw‸ kʼoˆ piˇ ve yoˬ. Moˉseˍ lehˬ yawˇ ve la‸ sheh hta‸ aˉ po‸ hawˉ lo keu taˍ ve yoˬ. Kʼaw‸ gʼawˬ tawˆ nyi ve teˇ yanˇ, yawˇ ve la‸ sheh vaˇ meu-e hkʼa shuˍ hpuˉ-ehˍ hpeh‸ leh hkiˬ tu‸ paˍ hkʼe hpeh‸ la ve yoˬ.

7Gʼuiˬsha lehˬ, Nawˬ ve la‸ sheh hta‸ aˉ po‸ hawˉ teˇ pawˆ kʼaw‸ keu taˍ-o‸, teh‸ yawˇ hta‸ kʼoˆ piˇ ve yoˬ. Yawˇ teˇ pawˆ kʼaw‸ keu leh gʼawˬ tawˆ nyi ve teˇ yanˇ, awˬ gʼuˇ suhˍ htaˇ hkʼe yawˇ ve la‸ sheh kʼaw‸ da‸ la ve yoˬ.

8Oˇ htaˇ Gʼuiˬsha kʼoˆ ve, Nawˬ awˉ lawˉ peuˇ te maˍ piˇ ve anˇ tuˬ hta‸ yawˇ hui maˇ yonˍ ve htawˇ, nawˬ gʼa mawˬ ve anˇ tuˬ chi ve nyiˇ maˬ teˇ maˬ hta‸ yawˇ hui yonˍ leh ha‸ yuˬ tuˬ yoˬ.

9Ya‸ hkʼaˇ, yawˇ hui lehˬ anˇ tuˬ awˬ heˆ chi ve nyiˇ maˬ maˬ hta‸ maˇ yonˍ leh, nawˬ kʼoˆ piˇ ve tawˇ hta‸ maˇ na yuˬ sheˬ ve kʼo, Niˍlaˆ iˉ kaˆ lawˬ hkʼaw cawˍ ve iˉ kaˆ hta‸ nyiˉ veu laˇ leh yawˇ hui mehˆ gʼuˇ suhˍ miˬ chaˇ hkʼoˆ ngeuˍ baˬ maˍ piˇ-oˆ. Iˉ kaˆ oˇ ve awˬ suhˍ hpeh‸ kʼai tuˬ yoˬ, teh‸ yawˇ hta‸ kʼoˆ piˇ ve yoˬ.

10Oˇ htaˇ Moˇseˍ kʼaw‸ kʼoˆ ve, Gʼuiˬsha-oˬ, ngaˬ hta‸ taˇ kʼai peu laˇ-oˆ. Awˬ lawn kʼo, nawˬ ngaˬ hta‸ tawˇ tanˬ yaw laˇ ve teˇ nyi hta‸ te leh ya‸ nyi hkʼa gaˬ, ngaˬ lehˬ tawˇ yaw puiˉ ve chaw hpeh‸ ve maˇ heˆ. Ngaˬ lehˬ, tawˇ tsuh‸ ve chaw hpeh‸ ve yoˬ, teh‸ Gʼuiˬsha hta‸ kʼoˆ piˇ ve yoˬ.

11Gʼuiˬsha yawˇ hta‸ kʼoˆ piˇ ve, A shu teˇ gʼaˇ chaw yaˇ hta‸ maw‸ kʼaw piˇ taˍ ve le. A shu teˇ gʼaˇ yawˇ hta‸ chaw kʼaˍ hpeh‸ piˇ lawˬ leh, naˍ paw pawˇ piˇ lawˬ ve le. A shu teˇ gʼaˇ yawˇ hta‸ mehˆ mawˬ la piˇ leh, yawˇ hta‸ mehˆ cuˉ piˇ lawˬ ve le. Oˇ hkʼe te piˇ gʼa ve lehˬ, ngaˬ Gʼuiˬsha hpeh‸ ve maˇ heˆ laˇ.

12Chi hta‸ pa taw, chi beu‸ nawˬ kʼai loˬ. Nawˬ tawˇ yaw puiˉ la tuˬ ngaˬ te laˇ leh, nawˬ hkʼaˬ hkʼe gʼa kʼoˆ tuˬ ngaˬ nawˬ hta‸ hto laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

13Ya‸ hkʼaˇ Moˉseˍ lehˬ, Gʼuiˬsha-oˬ, chaw teˇ gʼaˇ gʼaˇ hta‸ kʼaw‸ leuˆ yuˬ leh kʼai tcuh-o, teh‸ kʼoˆ ve yoˬ.

14Oˇ htaˇ, Gʼuiˬsha Moˉseˍ hta‸ nyi ma zuhˆ leh, Leˍviˆ chaw nawˬ viˉ paˍ Aˍronˍ teˇ gʼaˇ cawˬ ve maˇ heˆ laˇ. Yawˇ lehˬ tawˇ yaw puiˉ ve chaw hpeh‸ ve hta‸ ngaˬ shiˍ ve yoˬ. Yawˇ nawˬ hta‸ ca hpuˇ da‸ la tuˬ laˬ chehˇ ve yoˬ. Yawˇ nawˬ hta‸ gʼa mawˬ ve kʼo, ha lehˬ jaˇ tuˬ yoˬ.

15Tawˇ hkʼaˬ hkʼe gʼa yaw tuˬ, nawˬ yawˇ hta‸ kʼoˆ maˍ piˇ-oˆ. Nawˬ huiˉ maˬ tawˇ yaw puiˉ tuˬ ngaˬ ga laˇ leh, nawˬ huiˉ maˬ hkʼaˬ hkʼe gʼa te tuˬ ngaˬ hto laˇ tuˬ yoˬ.

16Yawˇ lehˬ, nawˬ awˬ tan chaw moˍ lonˉ hta‸ tawˇ yaw piˇ tuˬ yoˬ. Nawˬ lehˬ, Gʼuiˬsha hkʼe hpeh‸ leh yawˇ hkʼaˬ hkʼe gʼa kʼoˆ tuˬ, nawˬ yawˇ hta‸ awˬ hkʼaˇ beˆ maˍ piˇ tuˬ yoˬ.

17Juˇ fuiˍ taˬ chi hta‸ nawˬ yuˬ taˍ-o‸. Chi ve hta‸ cuˇ leh anˇ tuˬ awˬ heˆ teˇ hpaˍ hta‸ nawˬ gʼa te maˍ piˇ tuˬ yoˬ, teh‸ yawˇ hta‸ kʼoˆ piˇ ve yoˬ.

18Oˇ ve hkʼaw‸ nawˉ Moˉseˍ yawˇ ve awˬ puˍ Yeˍtaˍroˍ geh kʼo‸-e leh, Eˇjiˇtu‸ mvuhˇmiˬ hkʼaw chehˇ taˍ ve ngaˬ ve awˬ ceuˬ awˬ hkʼaˇ teˇ hpaˍ a sha‸ te‸ chehˇ sheˍ leh naˍ ca kʼaw‸ nyi tuˬ, ngaˬ hta‸ a hkaw-anˬ pe‸ laˇ-oˆ, teh‸ kʼoˆ piˇ ve yoˬ. Yeˍtaˍroˍ htawˇ, Gawˬ lehˍ ve hkʼaw kʼai loˬ, teh‸ kʼoˆ piˇ ve yoˬ.

19Meˇdiˍanˍ mvuhˇmiˬ hkʼaw Gʼuiˬsha Moˉseˍ geh laˬ leh, Eˇjiˇtu‸ mvuhˇmiˬ lo kʼaw‸ kʼo‸-e loˬ. Awˬ lawn kʼo, nawˬ hta‸ tiˇ pehˍ gaˇ ve chaw hkʼa peu-eˬ suh peuˬ, teh‸ yawˇ hta‸ kʼoˆ piˇ ve yoˬ.

20Oˇ htaˇ Moˉseˍ lehˬ, yawˇ ve miˇ yaˇ teˇ hpaˍ hta‸ piˉ laˬ hkʼoˆ ciˇ tcuh leh, Eˇjiˇ tu‸ mvuhˇmiˬ lo kʼaw‸ kʼo‸-e ve yoˬ. Moˉseˍ lehˬ, Gʼuiˬsha kʼoˆ piˇ taˍ ve juˇ fuiˍ taˬ oˇ ve hta‸ htawˇ yuˬ kʼai ve yoˬ.

21Gʼuiˬsha Moˉseˍ hta‸ kʼoˆ piˇ ve, Chi beu‸ nawˬ lehˬ, Eˇjiˇtu‸ mvuhˇmiˬ lo kʼo‸-e chehˇ ve yoˬ. Ngaˬ nawˬ hta‸ kanˇ paˆ piˇ taˍ ve hkʼe, jawˇmawˇ mehˆ gʼuˇ suhˍ anˇ tuˬ awˬ heˆ laiˉ ceuˬ te maˍ piˇ tuˬ hkʼa deh‸ gu taˍ-o‸. Ngaˬ lehˬ yawˇ ve nyi ma hta‸ heh la piˇ leh, yawˇ lehˬ chaw oˇ ve teˇ hpaˍ hta‸ hpehˇ piˇ tuˬ ve maˇ heˆ.

22Gʼuiˬsha chi hkʼe kʼoˆ ve yoˬ, teh‸ jawˇmawˇ hta‸ kʼoˆ piˇ-oˆ. Iˉsaˍreˍlaˆ lehˬ, ngaˬ ve yaˇ paˍ uiˍ hpeh‸ ve yoˬ.

23Yawˇ ngaˬ hta‸ oˉ kʼoˍ ca pui hpeh‸ tuˬ ngaˬ ve yaˇ paˍ hta‸ hpehˇ piˇ-oˆ, teh‸ kʼoˆ piˇ taˍ peuˬ ve htawˇ nawˬ lehˬ yawˇ hta‸ maˇ hpehˇ piˇ. Chi hta‸ pa taw, nawˬ ve yaˇ paˍ uiˍ hta‸ ngaˬ tiˇ pehˍ piˇ tuˬ yoˬ, teh‸ kʼoˆ piˇ-oˆ, teh‸ Gʼuiˬsha Moˉseˍ hta‸ kʼoˆ piˇ ve yoˬ.

24Ya‸ kʼaw kʼaˉ lo yawˇ hui haˉ chehˇ ve teˇ yanˇ, Gʼuiˬsha Moˉseˍ hta‸ tiˇ pehˍ tuˬ laˬ ve yoˬ.

25Oˇ htaˇ, Ziˆpawˇraˆ lehˬ tcuhˆ jaˇ ve haˉ pui shiˍ teˇ maˬ yuˬ leh yawˇ yaˇ paˍ hta‸ awˬ guiˬ meuˇ shoˍ piˇ peuˬ hkʼaw‸ nawˉ, awˬ guiˬ meuˇ oˇ ve hta‸ yuˬ leh Moˉseˍ ve hkui sheh hta‸ yuˬ daw‸ piˇ taˍ leh kʼoˆ ve,

26Nawˬ lehˬ awˬ suhˍ hta‸ caˉ da‸ ve ngaˬ ve awˬ hpawˇ hpeh‸ ve yoˬ, teh‸ kʼoˆ ve yoˬ. Hkʼe te leh, Gʼuiˬsha Moˉseˍ hta‸ maˇ kʼaw‸ tiˇ pehˍ piˇ ve yoˬ.

27Oˇ ve hkʼaw‸ nawˉ Gʼuiˬsha Aˍronˍ geh laˬ leh, Moˉseˍ hta‸ hpuˇ da‸ tuˬ heh puiˉ hkʼaw lo kʼai-o, teh‸ yawˇ hta‸ kʼoˆ piˇ ve yoˬ. Hkʼe te leh, yawˇ Moˉseˍ hta‸ ca hpuˇ da‸ tuˬ da‸ kehˬ ve hkʼaw cawˬ kuiˬ lo kʼai ve yoˬ. Yawˇ Moˉseˍ hta‸ mawˬ htaˇ, yawˇ hta‸ boˆ nu piˇ ve yoˬ.

28Moˉseˍ lehˬ, Gʼuiˬsha yawˇ hta‸ kʼoˆ piˇ taˍ ve tawˇ hkʼa peu-eˬ Aˍronˍ hta‸ kʼoˆ maˍ piˇ ve yoˬ.

29Oˇ ve hkʼaw‸ nawˉ, Moˉseˍ leh Aˍronˍ Iˉsaˍreˍlaˆ chaw awˬ hoˉ awˬ naˬ hkʼa peu-eˬ hta‸ kuˬ hpawnˬ leh,

30Gʼuiˬsha Moˉseˍ hta‸ kʼoˆ piˇ taˍ ve tawˇ hkʼa peu-eˬ, Aˍronˍ yawˇ hui hta‸ kʼoˆ maˍ piˇ ve yoˬ Moˉseˍ lehˬ, yawˇ hui mehˆ gʼuˇ suhˍ anˇ tuˬ awˬ heˆ laiˉ ceuˬ te maˍ piˇ ve pa taw, yawˇ hui yonˍ la ve yoˬ.

31Yawˇ hui tu‸ chehˇ hkanˍ chehˇ ve hta‸ Gʼuiˬsha gʼa mawˬ peuˬ leh, yawˇ hui hta‸ ca htaiˍ hkʼaw‸ piˇ la ve hta‸ yawˇ hui gʼa shiˍ ve teˇ yanˇ, Iˉsaˍreˍlaˆ chaw teˇ hpaˍ Gʼuiˬsha hta‸ hkui tcuhˉ teh leh oˉ kʼoˍ pui ve yoˬ.

← Chapter 3 Jump to: Chapter 5 →