Exodus 35

Lahu Bible Edited © Thailand Bible Society and Bible Society of Myanmar, 2010, 2020.

← Chapter 34 Jump to: Chapter 36 →

1Moˉseˍ lehˬ Iˉsaˍreˍlaˆ chaw moˍ lonˉ hta‸ kuˬ hpawnˬ peuˬ hkʼaw‸ nawˉ, yawˇ hui hta‸ kʼoˆ piˇ ve, Chi lehˬ nawˬ hui awˬ pon Gʼuiˬsha ve awˬliˇtawˇhkawˇ hpeh‸ ve yoˬ.

2Hkaw‸ nyi hkʼa gaˬ nawˬ hui kanˉ te caˇ hpeh‸ ve yoˬ. Ya‸ hkʼaˇ, suhˍ nyi teˇ nyi lehˬ da‸ kehˬ ve awˬ nyi hpeh‸ leh, Gʼuiˬsha awˬ pon fuiˍ teh leh gʼaˇ jehˇ ve awˬ nyi hpeh‸ ve yoˬ. Oˇ ve teˇ nyi hkʼaw kanˉ te ve chaw lehˬ, tiˇ pehˍ ve hta‸ gʼa hkanˍ tuˬ yoˬ.

3Gʼaˇ jehˇ ve awˬ nyi chi hkʼaw, nawˬ hui ve yehˬ hkʼaw aˬ miˍ ka‸ maˇ gʼa ceh, teh‸ yawˇ hui hta‸ kʼoˆ piˇ ve yoˬ.

4Oˇ ve hkʼaw‸ nawˉ Moˉseˍ yawˇ hui hta‸ kʼoˆ piˇ ve, Gʼuiˬsha ngaˬ hui hta‸ chi hkʼe kʼoˆ laˇ taˍ ve yoˬ.

5Chaw teˇ gʼaˇ le le, Gʼuiˬsha hta‸ piˇ tuˬ ve tanˇ tuˬ teˇ hpaˍ hkʼa deh‸ gʼa fuiˍ teh taˍ ve yoˬ. Tanˇ gaˇ ve nyi ma cawˬ ve chaw lehˬ, tanˇ tuˬ chi teˇ hpaˍ Gʼuiˬsha geh yuˬ laˬ hpeh‸ ve yoˬ. Hpu, shi, kuiˇ,

6awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh, da‸ jaˇ ve hpu, aˉ che‸ awˬ mvuh yuˬ te taˍ ve hpa,

7nyiˉ-ehˍ haw taˍ ve yawˬ ehˉ awˬ guiˬ kʼuˉ, da‸ jaˇ ve shaˍ guiˬ kʼuˉ, aˍhkeˇshaˍ suhˆ,

8kawˆ faiˇ awˬ pon naˍ manˇ, naˍ manˇ pfuhˍ piˇ htaˇ yehˇ tuˬ ve naˍ manˇ hawnˉ, tuˉ tanˇ tuˬ ve sha hawnˉ,

9paw hkuˇ ve aˉ po‸ zuhˬ ma leh nyi ma pui beh tuˬ ve hta‸ tawˉ keu piˇ tuˬ ve shehnˉ shiˍ laiˉ ceuˬ hpeh‸ ve yoˬ.

10Nawˬ hui awˬ hkʼaw lo la‸shaˉmaˉ puiˉ ve chaw teˇ hpaˍ tawˆ la leh, Gʼuiˬsha kʼoˆ laˇ taˍ ve awˬ ceuˬ teˇ hpaˍ hta‸ gʼa ca te la ve yoˬ.

11Aˉ po kʼo bon yehˬ oˇ ve hta‸ beh tuˬ kʼuˉ kʼaweh‸ teˇ hpaˍ, suhˆ baˉ teˇ hpaˍ, awˬ hkaˆ teˇ hpaˍ, yehˬ hkuiˉ dawˬ teˇ hpaˍ, la‸ kawˬ teˇ hpaˍ,

12ka ti‸ shaˉ caˆ ta kʼoˍ leh oˇ ve hta‸ keu taˆ tuˬ ve suhˆ taˬ teˇ hpaˍ, ta kʼoˍ awˬ hoˆ, ko tuˬ ve hpa,

13hpui lawˇ leh oˇ ve hta‸ keu taˆ tuˬ ve suhˆ taˬ teˇ hpaˍ, leh awˬ nu ve mawˇ teˇ hpaˍ Gʼuiˬsha hta‸ tanˇ piˇ tuˬ ve hkaoˍmonˇ,

14aˬ miˍ tuˉ teh kuiˬ hpui lawˇ, kawˆ faiˇ leh naˍ manˇ,

15sha hawnˉ tuˉ tanˇ kuiˬ leh oˇ ve hta‸ keu taˆ tuˬ ve suhˆ taˬ teˇ hpaˍ, naˍ manˇ pfuhˍ piˇ htaˇ yehˇ tuˬve naˍ manˇ, sha hawnˉ teˇ hpaˍ, aˉ po kʼo bon yehˬ yehˬmiˉhpe‸ lo ko taˍ tuˬ ve hpa,

16to nuˇ to shaˆ tuˉ tanˇ kuiˬ, oˇ ve hta‸ caˉ da‸ ve kuiˇ, keu taˆ tuˬ ve suhˆ taˬ teˇ hpaˍ, awˬ hkʼeun hkʼa cawˬ ve hkʼa peu-eˬ, hkehˇ pe le, hkehˇ taˍ kuiˬ,

17aˉ po kʼo bon yehˬ hta‸ ko tuˬ ve hpa, yehˬ hkuiˉ daw leh la‸ kawˬ teˇ hpaˍ, aˉ po kʼo bon yehˬ taˍ meu‸ hpe‸ lo ko taˍ tuˬ ve hpa,

18aˉ po kʼo bon yehˬ hta‸ keu tuˬ ve juˇ teˇ hpaˍ leh aˉ caˆ hkeh teˇ hpaˍ,

19Aˍronˍ leh yawˇ ve yaˇ teˇ hpaˍ da‸ kehˬ ve chehˇ kuiˬ hkʼaw lo‸-e htaˇ veu‸ deh tuˬ ve da‸ kehˬ ve veu‸ kʼaˇ, chi teˇ hpaˍ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

20Oˇ ve hkʼaw‸ nawˉ, Iˉsaˍreˍlaˆ chaw moˍ lonˉ Moˉseˍ geh tawˆ kʼai ve yoˬ.

21A shu yawˇ nyi ma cawˬ ve hkʼe, aˉ po kʼo bon yehˬ awˬ pon awˬ kaˍ awˬ nu loˍ ve mawˇ teˇ hpaˍ te tuˬ awˬ pon, leh da‸ kehˬ ve veu‸ kʼaˇ te tuˬ awˬ pon tanˇ tuˬ teˇ hpaˍ Gʼuiˬsha geh yuˬ laˬ ve yoˬ.

22Hkʼa tanˇ gaˇ ve hawˉ hkʼaˆ yaˇ miˇ teˇ hpaˍ lehˬ, a shu yawˇ ve naˍ vawˇ, la‸ peˍ, shi caˆ, oˉ kʼoˍ choˆ tuˬ hta‸ tanˬ leh hpu hkʼeun shi hkʼeun laiˉ ceuˬ ve yuˬ laˬ leh, Gʼuiˬsha hta‸ ca tanˇ la ve yoˬ.

23Chaw teˇ gʼaˇ le le, a shu yawˇ geh cawˬ taˍ ve awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh, da‸ jaˇ ve hpa, aˉ che‸ awˬ mvuh yuˬ te taˍ ve hpa, nyiˉ-ehˍ haw taˍ ve yawˬ ehˉ awˬ gʼuiˬ kʼuˉ, da‸ jaˇ ve shaˍ guiˬ kʼuˉ teˇ hpaˍ yuˬ laˬ ve yoˬ.

24Hkʼa tanˇ gaˇ ve chaw teˇ gʼaˇ le le, hpu leh kuiˇ yuˬ laˬ leh Gʼuiˬsha hta‸ ca tanˇ la ve yoˬ. Aˍhkeˇshaˍ suhˆ cawˬ ve chaw teˇ hpaˍ htawˇ, suhˆ oˇ ve hta‸ yuˬ laˬ ve yoˬ.

25Hpa te chiˇ puiˉ ve chaw teˇ hpaˍ htawˇ, awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ ve gʼo‸ hkeh teˇ hpaˍ leh da‸ jaˇ ve hpa teˇ hpaˍ yuˬ laˬ ve yoˬ.

26Nyi ma pfuhˇ leh te puiˉ ve yaˇ miˇ teˇ hpaˍ lehˬ, aˉ che‸ awˬ mvuh yuˬ leh hpa te chiˇ ve yoˬ.

27Awˬ hoˉ awˬ naˬ teˇ hpaˍ lehˬ, aˉ po‸ zuhˬ ma leh nyi ma pui beh tuˬ hta‸ keu tuˬ ve shehnˉ shiˍ laiˉ ceuˬ yuˬ laˬ ve yoˬ.

28Yawˇ hui lehˬ, kawˆ faiˇ awˬ pon naˍ manˇ, naˍ manˇ pfuhˍ piˇ htaˇ yehˇ tuˬ ve naˍ manˇ, sha hawnˉ teˇ hpaˍ yuˬ laˬ ve yoˬ

29Gʼuiˬsha Moˉseˍ hta‸ kʼoˆ piˇ taˍ ve hkʼe, nyi ma pfuhˇ ve Iˉsaˍreˍlaˆ chaw teˇ hpaˍ lehˬ, Gʼuiˬsha ve aˉ po kʼo bon yehˬ te tuˬ awˬ pon a shu yawˇ ve tanˇ tuˬ yuˬ laˬ leh, Gʼuiˬsha hta‸ tanˇ piˇ ve yoˬ.

30Oˇ htaˇ Moˉseˍ Iˉsaˍreˍlaˆ chaw hui hta‸ kʼoˆ piˇ ve, Yuˇda‸ awˬ ceuˬ awˬ hkʼaˇ Huˇraˆ ve awˬ hawehˍ, Uˇriˆ ve yaˇ Beˍshaˍleˍlaˆ hta‸ Gʼuiˬsha leuˆ yuˬ taˍ ve yoˬ.

31Gʼuiˬsha yawˇ hta‸ cuˇ yiˍ piˇ taˍ leh, yawˇ lehˬ kanˉ laiˉ ceuˬ te puiˉ ve chaw hpeh‸ ve yoˬ. Yawˇ lehˬ cheuˬ jaˇ ve la‸shaˉmaˉ, la‸ meuˇ puiˉ ve chaw,

32cheuˬ jaˇ ve ca liˉ paˍ, hpu, shi, kuiˇ hta‸ hkʼa deh‸ htawˆ puiˉ te puiˉ ve chaw,

33aˉ po‸ hta‸ keu tuˬve shehnˉ shiˍ hta‸ hkʼa deh‸ te puiˉ ve chaw, suhˆ hkʼaw htawˆ puiˉ ve chaw leh nyi sha ve kanˉ laiˉ ceuˬ te puiˉ ve chaw hpeh‸ ve yoˬ.

34Yawˇ geh teˇ geh kanˉ te tuˬ, Gʼuiˬsha lehˬ Danˍ awˬ ceuˬ awˬ hkʼaˇ Aˍbiˆ saˍmehˆ ve yaˇ Aˍhawˇleˍbaˆ hta‸ htawˇ oˇ ve hkʼa shuˍ cuˇ yiˍ piˇ taˍ ve yoˬ.

35Yawˇ huiˉ maˬ lehˬ, kanˉ te paˍ, awˬ han te paˍ, suhˆ hkʼaw htawˆ paˍ, naˆ tsuhˇ shehˆ paˍ, awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve hpa te chiˇ puiˉ ve chaw hui hta‸ hkʼa deh maˍ piˇ leh sheh kʼai piˇ gʼa tuˬ, Gʼuiˬsha yawˇ huiˉ maˬ hta‸ cuˇ yiˍ piˇ taˍ ve yoˬ.

← Chapter 34 Jump to: Chapter 36 →