Nehemiah 12

Lao Bible 2012 (ພຣະຄຳພີສັກສິ)

← Chapter 11 Jump to: Chapter 13 →

1ຕໍ່ໄປນີ້ແມ່ນບັນຊີລາຍຊື່ຂອງພວກປະໂຣຫິດແລະຊາວເລວີ ທີ່ໄດ້ກັບຄືນມາຈາກການເປັນຊະເລີຍໃນຕ່າງຖິ່ນນຳເຊຣຸບບາເບນລູກຊາຍຂອງເຊອານຕີເອນ ແລະນຳມະຫາປະໂຣຫິດເຢຊູອາ ມີດັ່ງນີ້:

2ພວກປະໂຣຫິດ: ເສຣາອີຢາ, ເຢເຣມີຢາ, ເອຊະຣາ, ອາມາຣີຢາ, ມັນລຸກ, ຮັດຕຸຊະ, ເຊການີຢາ, ເຣຮຸມ, ເມເຣໂມດ, ອິດໂດ, ກິນເນໂທອີ, ອາບີຢາ, ມີຢາມິນ, ມາອາດີຢາ, ບີນກາ, ເຊມາອີຢາ, ໂຢອີອາຣິບ, ເຢດາອີຢາ, ສານລູ, ອາມົກ, ຮິນກີຢາ ແລະເຢດາອີຢາ. ຄົນເຫຼົ່ານີ້ແມ່ນພວກຜູ້ນຳໃນທ່າມກາງພີ່ນ້ອງປະໂຣຫິດຂອງພວກເຂົາທັງໝົດ ຢູ່ໃນສະໄໝຂອງມະຫາປະໂຣຫິດເຢຊູອາ.

8ຊາວເລວີ: ພວກທີ່ຮັບຜິດຊອບຮ້ອງເພງໂມທະນາຂອບພຣະຄຸນ ມີດັ່ງນີ້: ເຢຊູອາ, ບິນນູອີ, ກາດມີເອນ, ເຊເຣບີຢາ, ຢູດາ ແລະມັດຕານີຢາ.

9ພວກທີ່ຕັ້ງກຸ່ມຮ້ອງເພງສະຫລັບກັນ ມີດັ່ງນີ້: ບັກບຸກີຢາ, ອັນໂນ ແລະພີ່ນ້ອງຊາວເລວີຄົນອື່ນໆຂອງພວກເຂົາ.

10ເຢຊູອາເປັນພໍ່ຂອງໂຢອີອາກິມ; ໂຢອີອາກິມເປັນພໍ່ຂອງເອລີອາຊິບ; ເອລີອາຊິບເປັນພໍ່ຂອງໂຢອີອາດາ;

11ໂຢອີອາດາເປັນພໍ່ຂອງໂຢນາທານ; ໂຢນາທານເປັນພໍ່ຂອງຢັດດູອາ.

12ເມື່ອໂຢອີອາກິມໄດ້ເປັນມະຫາປະໂຣຫິດ ບັນດາປະໂຣຫິດທີ່ມີຊື່ດັ່ງຕໍ່ໄປນີ້ ແມ່ນເປັນຫົວໜ້າຂອງຕະກຸນຕ່າງໆ ດັ່ງນີ້: ເມຣາອີຢາ ເສຣາອີຢາ; ຮານານີຢາ ເຢເຣມີຢາ; ເມຊຸນລຳ ເອຊະຣາ; ເຢໂຮຮານານ ອາມາຣີຢາ; ໂຢນາທານ ມັນລູກີ; ໂຢເຊັບ ເຊບານີຢາ; ອັດນາ ຮາຣິມ; ເຮນໄກ ເມຣາອີໂຢດ; ເຊກາຣີຢາ ອິດໂດ; ເມຊຸນລຳ ກິນເນໂທນ; ຊີກະຣີ ອາບີຢາ; ... ມີນີອາມິນ; ປີນໄຕ ໂມອາດີຢາ; ຊາມມູອາ ບີນກາ; ເຢໂຮນາທານ ເຊມາອີຢາ; ມັດເຕໄນ ໂຢອີອາຣິບ; ອຸດຊີ ເຢດາອີຢາ; ກັນໄລ ສານໄລ; ເອເບ ອາມົກ; ຮາຊາບີຢາ ຮິນກີຢາ; ເນທາເນນ ເຢດາອີຢາ;

22ໄດ້ມີບັນທຶກສະບັບໜຶ່ງຂອງຫົວໜ້າຄອບຄົວຊາວເລວີແລະຂອງພວກປະໂຣຫິດ ໄດ້ຖືກຮັກສາໄວ້ນຳມະຫາປະໂຣຫິດໃນສະໄໝທີ່ພວກເຂົາຄອງຕຳແໜ່ງ ມີດັ່ງນີ້: ເອລີອາຊິບ, ໂຢອີອາດາ, ໂຢນາທານ ແລະຢັດດູອາ. ບົດບັນທຶກນີ້ເຮັດສຳເລັດ ເມື່ອກະສັດດາຣິອຸດຂຶ້ນເປັນຈັກກະພັດແຫ່ງເປີເຊຍ.

23ເຖິງຢ່າງໃດກໍຕາມ ບັນດາຫົວໜ້າຂອງຄອບຄົວຊາວເລວີໄດ້ຖືກບັນທຶກໄວ້ເປັນທາງການ ພຽງແຕ່ໃນສະໄໝຂອງໂຢນາທານ ຫລານຊາຍຂອງເອລີອາຊິບເທົ່ານັ້ນ.

24ພາຍໃຕ້ການຊີ້ນຳຂອງຮາຊາບີຢາ, ເຊເຣບີຢາ, ເຢຊູອາ, ບິນນູອີ, ແລະກາດມີເອນ, ຊາວເລວີໄດ້ຖືກຈັດຕັ້ງກັນເປັນຫລາຍໝວດ. ສອງໝວດຈະຕົກຜຽນກັນເພື່ອຮ້ອງເພງສຳລັບການສັນລະເສີນແລະການໂມທະນາຂອບພຣະຄຸນ ຕາມຄຳແນະນຳທີ່ກະສັດດາວິດຄົນຂອງພຣະເຈົ້າໄດ້ມອບໝາຍໃຫ້.

25ພວກຄົນເຝົ້າຍາມທີ່ມີໜ້າທີ່ຮັບຜິດຊອບບ່ອນມ້ຽນເຄື່ອງທາງປະຕູເຂົ້າພຣະວິຫານ ມີດັ່ງນີ້: ມັດຕານີຢາ, ບັກບຸກີຢາ, ໂອບາດີຢາ, ເມຊຸນລຳ, ຕານໂມນ ແລະອັກກຸບ.

26ປະຊາຊົນເຫຼົ່ານີ້ໄດ້ມີຊີວິດຢູ່ໃນສະໄໝຂອງໂຢອີອາກິມລູກຊາຍຂອງເຢຊູອາຫລານຊາຍຂອງໂຢຊາດັກ ແລະໃນສະໄໝຂອງຜູ້ປົກຄອງເນເຫມີຢາ ແລະສະໄໝຂອງເອຊະຣາຜູ້ທີ່ເປັນປະໂຣຫິດທັງເປັນນັກຮຽນຮູ້ດ້ານກົດບັນຍັດ.

27ເວລາອຸທິດຖວາຍກຳແພງຂອງນະຄອນເຢຣູຊາເລັມນັ້ນ ຊາວເລວີແມ່ນໄດ້ຖືກນຳມາຈາກທົ່ວທຸກບ່ອນທີ່ພວກເຂົາອາໄສຢູ່ ເພື່ອພວກເຂົາຈະສາມາດຮ່ວມໃນພິທີສະຫລອງຂອງການອຸທິດຖວາຍໃນຄັ້ງນີ້ ໂດຍຮ້ອງເພງໂມທະນາຂອບພຣະຄຸນພ້ອມດ້ວຍສຽງແສ່ງແລະສຽງພິນ.

28ຄອບຄົວຂອງພວກນັກຮ້ອງຊາວເລວີໄດ້ຖືກນຳມາເຕົ້າໂຮມກັນ ຈາກບ່ອນທີ່ພວກເຂົາໄດ້ຕັ້ງຖິ່ນຖານຢູ່ອ້ອມແອ້ມນະຄອນເຢຣູຊາເລັມ ແລະຈາກເມືອງເລັກເມືອງນ້ອຍຕ່າງໆອ້ອມແອ້ມເມືອງເນໂຕຟາ,

29ແລະຈາກເບັດກິນການ, ເກບາ ແລະອາຊະມາເວດ.

30ພວກປະໂຣຫິດແລະຊາວເລວີໄດ້ປະກອບພິທີຊຳລະສຳລັບຕົນເອງ, ປະຊາຊົນ, ປະຕູຕ່າງໆຂອງກຳແພງເມືອງ ແລະກຳແພງນະຄອນເຢຣູຊາເລັມ.

31ຂ້າພະເຈົ້າໄດ້ເຕົ້າໂຮມພວກຜູ້ນຳຂອງແຂວງຢູດາຍທີ່ເທິງກຳແພງເມືອງ ແລະມອບໝາຍໃຫ້ພວກເຂົາຄວບຄຸມສອງໝວດໃຫຍ່ ເດີນເປັນຂະບວນອ້ອມຮອບຕົວເມືອງ ເພື່ອໂມທະນາຂອບພຣະຄຸນພຣະເຈົ້າ. ໝວດທີໜຶ່ງໃຫ້ຍ່າງເທິງກຳແພງເບື້ອງຂວາ ໄປສູ່ປະຕູກອງຂີ້ເຫຍື້ອ.

32ໂຮຊາອີຢາຍ່າງທາງຫລັງຂອງນັກຮ້ອງ ຕິດຕາມດ້ວຍບັນດາຜູ້ນຳຂອງຊາວຢູດາເຄິ່ງໜຶ່ງ.

33ປະໂຣຫິດຜູ້ທີ່ຍ່າງຕາມແລະເຮັດໜ້າທີ່ເປົ່າແກ ມີດັ່ງນີ້: ອາຊາຣີຢາ, ເອຊະຣາ, ເມຊຸນລຳ,

34ຢູດາ, ເບັນຢາມິນ, ເຊມາອີຢາ ແລະເຢເຣມີຢາ.

35ຕໍ່ມາແມ່ນເຊກາຣີຢາລູກຊາຍຂອງໂຢນາທານແລະຫລານຊາຍຂອງເຊມາອີຢາ. (ບັນພະບຸລຸດຂອງເພິ່ນມີດັ່ງນີ້: ມັດຕານີຢາ, ມີກາອີຢາ ແລະຊັກກູເຣ, ຈາກຕະກຸນອາສັບ.)

36ຕິດຕາມເພິ່ນມາແມ່ນສະມາຊິກຄົນອື່ນໆໃນຕະກຸນ ມີດັ່ງນີ້: ເຊມາອີຢາ, ອາຊາເຣນ, ມີລາໄລ, ກີລາໄລ, ມາໄອ, ເນທາເນນ, ຢູດາ ແລະຮານານີ; ທັງໝົດລ້ວນແຕ່ຖືເຄື່ອງດົນຕຼີຊະນິດທີ່ຖືກກຳນົດໃຫ້ຫລີ້ນ ໂດຍກະສັດດາວິດຄົນຂອງພຣະເຈົ້າ. ເອຊະຣານັກຮຽນຮູ້ດ້ານກົດບັນຍັດເປັນຜູ້ນຳຂະບວນ.

37ເມື່ອມາຮອດປະຕູນໍ້າພຸ ພວກເຂົາຂຶ້ນຂັ້ນໄດທີ່ນຳໄປສູ່ເມືອງຂອງດາວິດ ຜ່ານວັງຂອງກະສັດດາວິດ ແລະກໍກັບມາທາງກຳແພງຂອງປະຕູນໍ້າ ທາງດ້ານທິດຕາເວັນອອກຂອງຕົວເມືອງ.

38ສ່ວນອີກໝວດໜຶ່ງກໍໃຫ້ໂມທະນາຂອບພຣະຄຸນ ເດີນເປັນຂະບວນໄປທາງຊ້າຍລຽບຕາມກຳແພງ ໂດຍມີຂ້າພະເຈົ້າເອງ ແລະປະຊາຊົນອີກເຄິ່ງໜຶ່ງຕິດຕາມໄປ. ພວກເຮົາເດີນເປັນຂະບວນຜ່ານຫໍຄອຍເຕົາອົບ ໄປສູ່ກຳແພງກວ້າງ

39ແລະຈາກທີ່ນັ້ນພວກເຮົາຜ່ານໄປທາງປະຕູເອຟຣາອິມ, ປະຕູເຢຊານາ, ປະຕູປາ, ຫໍຄອຍຂອງຮານາເນນ, ກັບຫໍຄອຍຂອງຄົນໜຶ່ງຮ້ອຍ, ສູ່ປະຕູແກະ. ພວກເຮົາຕ່າງກໍເດີນເປັນຂະບວນ ແລະມາຢຸດຢູ່ໃກ້ກັບປະຕູເຂົ້າຂອງພຣະວິຫານ.

40ດັ່ງນັ້ນ ທັງສອງໝວດຊຶ່ງໂມທະນາຂອບພຣະຄຸນພຣະເຈົ້າ ຈຶ່ງໄດ້ມາຮອດບໍລິເວນວິຫານຂອງພຣະເຈົ້າ. ນອກຈາກບັນດາຜູ້ນຳທີ່ມາກັບຂ້າພະເຈົ້າແລ້ວ

41ໝວດຂອງຂ້າພະເຈົ້າຍັງປະກອບດ້ວຍປະໂຣຫິດທີ່ເຮັດໜ້າທີ່ເປົ່າແກ ມີດັ່ງນີ້: ເອລີອາກິມ, ມາອາເສອີຢາ, ມີນີອາມິນ, ມີກາອີຢາ, ເອລີໂອນາຍ, ເຊກາຣີຢາ ແລະຮານານີຢາ;

42ແລະຜູ້ຕິດຕາມພວກເຂົາມີດັ່ງນີ້: ມາອາເສອີຢາ, ເຊມາອີຢາ, ເອເລອາຊາ, ອຸດຊີ, ເຢໂຮຮານານ, ມັນກີຢາ, ເອລາມ ແລະເອເຊ. ນັກຮ້ອງຕ່າງໆທີ່ນຳໂດຍເຢຊະຣາຮີຢາ ກໍຮ້ອງເພງຈົນສຸດສຽງຂອງພວກເຂົາ.

43ໃນມື້ນັ້ນ ພວກເຮົາໄດ້ຖວາຍເຄື່ອງບູຊາຫລາຍຢ່າງ ແລະປະຊາຊົນຕ່າງກໍຊົມຊື່ນຍິນດີທີ່ສຸດ; ເພາະພຣະເຈົ້າເຮັດໃຫ້ພວກເຮົາສຸກສະບາຍໃນຈິດໃຈ. ຜູ້ຍິງແລະເດັກນ້ອຍກໍຮ່ວມໃນການສະຫລອງຄັ້ງນີ້ດ້ວຍ ແລະສຽງຂອງພວກເຂົາໄດ້ຍິນໄປໄກຫລາຍກິໂລແມັດ.

44ໃນເວລານັ້ນ ພວກເຂົາໄດ້ຊອກຫາຜູ້ຮັບຜິດຊອບບ່ອນມ້ຽນເຄື່ອງຂອງ ທີ່ຄົນນຳມາບໍລິຈາກສຳລັບພຣະວິຫານ ຊຶ່ງປະກອບດ້ວຍໜຶ່ງສ່ວນສິບ, ຜົນລະປູກເທື່ອທຳອິດຂອງພືດຜົນເປັນເມັດ ແລະໝາກໄມ້ສຸກເທື່ອທຳອິດໃນຕົ້ນປີ. ຄົນເຫຼົ່ານີ້ແມ່ນຮັບຜິດຊອບຮວບຮວມເຄື່ອງປູກຂອງຝັງ ຈາກໄຮ່ນາໃກ້ຄຽງໃນເມືອງຕ່າງໆທີ່ນຳມາບໍລິຈາກ ສຳລັບພວກປະໂຣຫິດແລະຊາວເລວີ ຕາມທີ່ກົດບັນຍັດໄດ້ກຳນົດໄວ້. ປະຊາຊົນຊາວຢູດາທັງໝົດຕ່າງກໍພໍໃຈນຳພວກປະໂຣຫິດແລະຊາວເລວີ

45ເພາະວ່າພວກເຂົາໄດ້ປະກອບພິທີຊຳລະຕ່າງໆ ແລະພິທີອື່ນໆອີກທີ່ພຣະເຈົ້າໄດ້ສັ່ງ. ນັກຮ້ອງກັບພວກຄົນເຝົ້າຍາມ ກໍເຮັດໜ້າທີ່ຂອງພວກເຂົາເຊັ່ນດຽວກັນ ຕາມກົດລະບຽບທີ່ກະສັດດາວິດ ແລະກະສັດໂຊໂລໂມນລູກຊາຍຂອງກະສັດດາວິດໄດ້ວາງໄວ້.

46ເປັນເວລາດົນນານມາແລ້ວ ນັບຕັ້ງແຕ່ສະໄໝຂອງກະສັດດາວິດ ແລະນັກດົນຕຼີອາສັບທີ່ພວກນັກຮ້ອງໄດ້ຮ້ອງເພງສັນລະເສີນ ແລະໂມທະນາຂອບພຣະຄຸນພຣະເຈົ້າ.

47ໃນສະໄໝຂອງເຊຣຸບບາເບນ ແລະໃນສະໄໝຂອງເນເຫມີຢາເຊັ່ນກັນ ປະຊາຊົນອິດສະຣາເອນທຸກຄົນກໍໄດ້ບໍລິຈາກຂອງຂວັນປະຈຳວັນ ເພື່ອສະໜັບສະໜູນພວກນັກຮ້ອງ ແລະພວກເຝົ້າຍາມ. ປະຊາຊົນໄດ້ມອບຂອງຖວາຍອັນສັກສິດນີ້ໃຫ້ແກ່ຊາວເລວີ ແລະຊາວເລວີໄດ້ມອບສ່ວນທີ່ຕ້ອງການ ຕາມທີ່ໄດ້ບົ່ງໄວ້ນັ້ນ ໃຫ້ພວກປະໂຣຫິດ.

← Chapter 11 Jump to: Chapter 13 →