Psalms 119 — Lao Bible 2012 (ພຣະຄຳພີສັກສິ)

1ຄວາມສຸກເປັນຂອງຜູ້ທີ່ດຳເນີນຊີວິດ ຢ່າງບໍ່ມີຄວາມຜິດ ຄືຜູ້ທີ່ດຳເນີນຊີວິດຕາມກົດບັນຍັດຂອງພຣະເຈົ້າຢາເວ.

2ຄວາມສຸກເປັນຂອງຜູ້ທີ່ເຮັດຕາມຄຳສັ່ງຂອງພຣະອົງ ຜູ້ທີ່ສະແຫວງຫາພຣະອົງດ້ວຍສຸດຈິດສຸດໃຈ.

3ພວກເຂົາບໍ່ເຄີຍປະພຶດຜິດພາດຈັກເທື່ອເລີຍ ແຕ່ເດີນຕາມທາງຂອງພຣະອົງ.

4ພຣະອົງໄດ້ມອບກົດບັນຍັດໃຫ້ ແລະບອກໃຫ້ພວກຂ້ານ້ອຍເຊື່ອຟັງກົດບັນຍັດນັ້ນຢ່າງສັດຊື່.

5ຂ້ານ້ອຍຫວັງວ່າຈະໄດ້ສັດຊື່ສະເໝີໄປ ໂດຍການຖືຮັກສາຂໍ້ຄຳສັ່ງສອນຂອງພຣະອົງນັ້ນ.

6ຖ້າຂ້ານ້ອຍເອົາໃຈໃສ່ຕໍ່ຂໍ້ຄຳສັ່ງທຸກຢ່າງຂອງພຣະອົງ ຂ້ານ້ອຍກໍຈະບໍ່ໄດ້ຖືກອັບອາຍຂາຍໜ້າ.

7ເມື່ອຮຽນຮູ້ການຕັດສິນອັນຊອບທຳຂອງພຣະອົງ ຂ້ານ້ອຍຈະຍົກຍໍພຣະອົງດ້ວຍຈິດໃຈອັນບໍຣິສຸດ.

8ຂ້ານ້ອຍຈະຢຶດໝັ້ນຕາມກົດບັນຍັດຂອງພຣະອົງ ຂໍຢ່າປະປ່ອຍຂ້ານ້ອຍຈັກເທື່ອເລີຍ.

9ຄົນໜຸ່ມສາວຮັກສາຊີວິດໃຫ້ບໍຣິສຸດໄດ້ຢ່າງໃດ? ກໍໂດຍເຊື່ອຟັງຂໍ້ຄຳສັ່ງຂອງພຣະເຈົ້າ.

10ຂ້ານ້ອຍສະແຫວງຫາຮັບໃຊ້ພຣະອົງດ້ວຍສຸດໃຈ ຂໍຊົງໂຜດຮັກສາຂ້ານ້ອຍຢ່າໃຫ້ຝ່າຝືນກົດບັນຍັດຂອງພຣະອົງ.

11ຂ້ານ້ອຍຖືຮັກສາຖ້ອຍຄຳຂອງພຣະອົງໄວ້ຢູ່ໃນຈິດໃຈ ເພື່ອວ່າຈະບໍ່ໄດ້ເຮັດບາບຕໍ່ສູ້ພຣະອົງ.

12ຂ້າແດ່ພຣະເຈົ້າຢາເວ ຂ້ານ້ອຍຍ້ອງຍໍສັນລະເສີນພຣະອົງ ຂໍຊົງໂຜດສັ່ງສອນວິທີທາງຂອງພຣະອົງໃຫ້ຂ້ານ້ອຍດ້ວຍ.

13ຂ້ານ້ອຍຈະປະກາດເຖິງກົດໝາຍທີ່ພຣະອົງໄດ້ຊົງກ່າວນັ້ນທຸກປະການ.

14ຂ້ານ້ອຍຍິນດີຂັບຕາມຂໍ້ຄຳສັ່ງຂອງພຣະອົງ ຫລາຍກວ່າຍິນດີໃນຄວາມຮັ່ງມີອັນໃຫຍ່ຫລວງນັ້ນ.

15ຂ້ານ້ອຍສຶກສາຄັກແນ່ຄຳສອນທັງຫລາຍຂອງພຣະອົງ ຂ້ານ້ອຍພິຈາລະນາເຖິງຄຳສັ່ງສອນທັງຫລາຍຂອງພຣະອົງ.

16ຂ້ານ້ອຍປິຕິຍິນດີໃນກົດບັນຍັດທັງຫລາຍຂອງພຣະອົງ ຂ້ານ້ອຍຈະບໍ່ລືມໄລຖ້ອຍຄຳຂອງພຣະອົງຢ່າງເດັດຂາດ.

17ຂໍຊົງໂຜດພໍພຣະໄທໃນຜູ້ຮັບໃຊ້ຂອງພຣະອົງ ເພື່ອຂ້ານ້ອຍຈະມີຊີວິດຢູ່ ແລະເຊື່ອຟັງຄຳສັ່ງສອນຂອງພຣະອົງ.

18ຂໍຊົງໂຜດເປີດຕາຂອງຂ້ານ້ອຍ ເພື່ອຂ້ານ້ອຍຈະໄດ້ເຫັນ ຄວາມຈິງອັນອັດສະຈັນຢູ່ໃນກົດບັນຍັດນັ້ນ.

19ຂ້ານ້ອຍຢູ່ໃນແຜ່ນດິນໂລກພຽງແຕ່ຊົ່ວຄາວ ຂໍຢ່າປິດບັງກົດບັນຍັດຂອງພຣະອົງຈາກຂ້ານ້ອຍເລີຍ.

20ຈິດໃຈຂອງຂ້ານ້ອຍກໍລະທົມທຸກດ້ວຍຄວາມປາຖະໜາ ຢາກຮູ້ການຕັດສິນຂອງພຣະອົງທຸກເວລາ.

21ພຣະອົງຕິຕຽນວ່າກ່າວຄົນຈອງຫອງ ສາບແຊ່ງຄົນບໍ່ເຊື່ອຟັງຂໍ້ຄຳສັ່ງດ້ວຍ.

22ຂໍປົດປ່ອຍຂ້ານ້ອຍໃຫ້ພົ້ນຈາກຄົນນິນທາ ເພາະຂ້ານ້ອຍໄດ້ຮັກສາກົດບັນຍັດ.

23ພວກຜູ້ປົກຄອງຮ່ວມໃຈກັນປອງຮ້າຍຂ້ານ້ອຍ ແຕ່ຂ້ານ້ອຍຈະພາວັນນາຂໍ້ຄຳສັ່ງຂອງພຣະອົງ.

24ຄຳແນະນຳຂອງພຣະອົງເຮັດໃຫ້ຂ້ານ້ອຍຍິນດີ ຈຶ່ງຢຶດຖືເປັນທີ່ປຶກສາທີ່ດີມາຕະຫລອດ.

25ຂ້ານ້ອຍນອນຢຽດຢູ່ຢ່າງພ່າຍແພ້ໃນຂີ້ຝຸ່ນດິນ ຂໍຊົງໂຜດໃຫ້ຊີວິດໃໝ່ ຕາມທີ່ພຣະອົງຊົງສັນຍາໄວ້ດ້ວຍ.

26ຂ້ານ້ອຍຍອມຮັບທຸກສິ່ງທີ່ໄດ້ກະທຳມາ ຂໍຊົງໂຜດສັ່ງສອນຂ້ານ້ອຍໃຫ້ຮູ້ວິຖີທາງຂອງພຣະອົງດ້ວຍ.

27ຂໍຊົງໂຜດຊ່ວຍຂ້ານ້ອຍໃຫ້ເຂົ້າໃຈໃນກົດບັນຍັດທັງຫລາຍ ເພື່ອຈະໄດ້ລຳລຶກເຖິງຄຳສັ່ງສອນ ອັນດີເລີດ.

28ຈິດໃຈຂອງຂ້ານ້ອຍອິດອ່ອນຍ້ອນຄວາມໂສກເສົ້າ ຂໍຊົງໂຜດໃຫ້ກຳລັງຂ້ານ້ອຍ ຕາມຖ້ອຍຄຳຂອງພຣະອົງສັນຍາໄວ້ດ້ວຍ.

29ຂໍຊົງໂຜດຮັກສາຂ້ານ້ອຍໄວ້ບໍ່ໃຫ້ເດີນໄປໃນທາງຜິດ ແລະດ້ວຍພຣະຄຸນຄວາມດີຂອງພຣະອົງ ຂໍຊົງໂຜດສັ່ງສອນກົດບັນຍັດໃຫ້ຂ້ານ້ອຍດ້ວຍ.

30ຂ້ານ້ອຍໄດ້ເລືອກທາງແຫ່ງຄວາມເຊື່ອຟັງ ແລະຍອມຮັບເອົາການຕັດສິນຂອງພຣະອົງ.

31ຂ້າແດ່ພຣະເຈົ້າຢາເວ ຂ້ານ້ອຍເຮັດຕາມທີ່ພຣະອົງໄດ້ແນະນຳ ຂໍຢ່າໃຫ້ຂ້ານ້ອຍໄດ້ຮັບຄວາມອັບອາຍເລີຍ.

32ຂ້ານ້ອຍຈະເຊື່ອຟັງຂໍ້ຄຳສັ່ງຂອງພຣະອົງຢ່າງຮ້ອນຮົນ ເພາະພຣະອົງຈະໃຫ້ຂ້ານ້ອຍເຂົ້າໃຈຕື່ມອີກ.

33ຂ້າແດ່ພຣະເຈົ້າຢາເວ ຂໍຊົງໂຜດສັ່ງສອນຂ້ານ້ອຍໃຫ້ຮູ້ ຄວາມໝາຍຂອງກົດບັນຍັດ ເພື່ອຈະໄດ້ປະຕິບັດຕາມຈົນເຖິງທີ່ສຸດ.

34ຂໍຊົງໂຜດອະທິບາຍກົດບັນຍັດນັ້ນເພື່ອຈະໄດ້ເຮັດຕາມ ຂ້ານ້ອຍຈະຖືຮັກສາກົດບັນຍັດນັ້ນດ້ວຍສຸດຈິດສຸດໃຈ.

35ຂໍຊົງໂຜດຮັກສາຂ້ານ້ອຍໃຫ້ເຮັດຕາມຂໍ້ຄຳສັ່ງຂອງພຣະອົງ ເພາະໃນນັ້ນຂ້ານ້ອຍໄດ້ພົບຄວາມສຸກ.

36ຂໍຊົງໂຜດໃຫ້ຂ້ານ້ອຍມີໃຈປາຖະໜາຢາກເຊື່ອຟັງກົດບັນຍັດຂອງພຣະອົງ ແທນທີ່ຈະຢາກໄດ້ແຕ່ຄວາມຮັ່ງມີ.

37ຂໍຊົງໂຜດຮັກສາຂ້ານ້ອຍບໍ່ໃຫ້ເອົາໃຈໃສ່ຕໍ່ສິ່ງອະນິຈັງ ຂໍຊົງໂຜດຮັກສາຊີວິດຂອງຂ້ານ້ອຍຕາມພຣະທຳຂອງພຣະອົງ.

38ຂໍຊົງໂຜດຮັກສາກົດບັນຍັດໄວ້ກັບຜູ້ຮັບໃຊ້ຂອງພຣະອົງ ຄືຄຳສັນຍາທີ່ຊົງມີໄວ້ກັບຜູ້ທີ່ເຊື່ອຟັງພຣະອົງ.

39ຂໍຊົງໂຜດຊ່ວຍໃຫ້ພົ້ນຈາກຄຳດູຖູກອັນໜ້າຢ້ານກົວ ເພາະຂໍ້ຄຳສັ່ງຂອງພຣະອົງນັ້ນດີ.

40ຂ້ານ້ອຍຕ້ອງການເຊື່ອຟັງຂໍ້ຄຳສັ່ງຂອງພຣະອົງ ເພາະພຣະອົງຊອບທຳໂຜດປະທານຊີວິດໃໝ່ດ້ວຍ.

41ຂ້າແດ່ພຣະເຈົ້າຢາເວ ຂໍຊົງໂຜດສຳແດງໃຫ້ຂ້ານ້ອຍຮູ້ວ່າ ພຣະອົງຮັກຂ້ານ້ອຍຫລາຍສໍ່າໃດດ້ວຍ. ໂຜດຊ່ວຍຂ້ານ້ອຍໃຫ້ໄດ້ພົ້ນໄພ ຕາມຄຳສັນຍາຂອງພຣະອົງດ້ວຍ.

42ແລ້ວຂ້ານ້ອຍກໍຈະຕອບຄົນທີ່ດູຖູກໄດ້ສົມໃຈ ເພາະຂ້ານ້ອຍໄວ້ວາງໃຈໃນຖ້ອຍຄຳຂອງພຣະອົງ.

43ໂຜດໃຫ້ຂ້ານ້ອຍເວົ້າແຕ່ຄວາມຈິງທຸກເວລາ ເພາະຄວາມຫວັງມີຢູ່ໃນການຕັດສິນຂອງພຣະເຈົ້າ.

44ຂ້ານ້ອຍຈະເຊື່ອຟັງກົດບັນຍັດຕະຫລອດເວລາ ແລະຈະບໍ່ລືມໄລກົດບັນຍັດນັ້ນຈັກເທື່ອ.

45ຂ້ານ້ອຍຈະໃຊ້ຊີວິດໃນເສລີພາບຢ່າງຄົບເຕັມ ເພາະຂ້ານ້ອຍພະຍາຍາມເຮັດຕາມຂໍ້ຄຳສັ່ງຂອງພຣະອົງ.

46ຂ້ານ້ອຍຈະປະກາດຂໍ້ຄຳສັ່ງແກ່ກະສັດ ແລະຈະບໍ່ອັບອາຍຢ່າງໃດທັງສິ້ນ.

47ຂ້ານ້ອຍສຸກໃຈໃນການເຊື່ອຟັງຂໍ້ຄຳສັ່ງຂອງພຣະອົງ ເພາະຂ້ານ້ອຍຮັກຂໍ້ຄຳສັ່ງນັ້ນຫລາຍ.

48ຂ້ານ້ອຍເຄົາຣົບແລະຮັກຂໍ້ຄຳສັ່ງຂອງພຣະອົງ ແລະຈະພາວັນນາເຖິງຂໍ້ຄຳແນະນຳນັ້ນ.

49ຂໍຊົງໂຜດຈື່ຈຳພຣະສັນຍາທີ່ມີກັບຜູ້ຮັບໃຊ້ຂອງພຣະອົງ ຊຶ່ງໃຫ້ຄວາມຫວັງແກ່ຂ້ານ້ອຍໄດ້.

50ແມ່ນແຕ່ໃນຍາມລຳບາກກໍໄດ້ຮັບຄຳໜູນໃຈ ເພາະພຣະສັນຍາໃຫ້ຊີວິດແກ່ຂ້ານ້ອຍໄດ້.

51ຄົນຈອງຫອງຫຍໍ້ຫຍັນຂ້ານ້ອຍສະເໝີມາ ແຕ່ຂ້ານ້ອຍບໍ່ໄດ້ຫັນໜີຈາກກົດບັນຍັດ.

52ຂ້າແດ່ພຣະເຈົ້າຢາເວ ຂ້ານ້ອຍຈື່ຈຳການຕັດສິນຂອງພຣະອົງຜ່ານມາ ສິ່ງນັ້ນຍັງໜູນໃຈຈົນເຖິງບັດນີ້.

53ເມື່ອເຫັນຄົນຊົ່ວຮ້າຍຝ່າຝືນກົດບັນຍັດຂອງພຣະອົງ ຂ້ານ້ອຍເອງກໍເຕັມໄປດ້ວຍຄວາມໂກດຮ້າຍ.

54ຊົ່ວຊີວິດອັນສັ້ນໆໃນໂລກທີ່ຂ້ານ້ອຍດຳລົງຢູ່ ມີເພງຫລາຍບົດກ່າວເຖິງຂໍ້ຄຳສັ່ງທີ່ຂ້ານ້ອຍປະພັນ.

55ຂ້າແດ່ພຣະເຈົ້າຢາເວ ກາງຄືນຂ້ານ້ອຍຄິດເຖິງພຣະອົງ ແລະຕຶກຕອງເຖິງກົດບັນຍັດນັ້ນ.

56ຂ້ານ້ອຍຄົ້ນພົບຄວາມສຸກຂອງຂ້ານ້ອຍໂດຍການເຊື່ອຟັງ ຂໍ້ຄຳສັ່ງຂອງພຣະອົງ.

57ຂ້າແດ່ພຣະເຈົ້າຢາເວ ພຣະອົງຄືທຸກສິ່ງທີ່ຂ້ານ້ອຍຕ້ອງການ ຂ້ານ້ອຍຂໍສັນຍາວ່າຈະເຊື່ອຟັງຖ້ອຍຄຳຂອງພຣະອົງ.

58ຂ້ານ້ອຍທູນຂໍຕໍ່ພຣະອົງດ້ວຍສຸດຈິດສຸດໃຈ ຂໍຊົງໂຜດເມດຕາຂ້ານ້ອຍ ຕາມທີ່ພຣະອົງໄດ້ສັນຍາໄວ້ນັ້ນ.

59ຂ້ານ້ອຍພິຈາລະນາຄວາມປະພືດທີ່ຜ່ານມາ ຈຶ່ງຂໍສັນຍາວ່າຈະເຮັດຕາມຖ້ອຍຄຳຂອງພຣະອົງ.

60ດັ່ງນັ້ນ ໂດຍບໍ່ຊັກຊ້າຂ້ານ້ອຍຈຶ່ງຟ້າວລົງມື ຄືເຊື່ອຟັງຂໍ້ຄຳສັ່ງຂອງພຣະອົງ.

61ຄົນຊົ່ວຫ້າງແຮ້ວໃສ່ຂ້ານ້ອຍເລື້ອຍມາ ແຕ່ຂ້ານ້ອຍບໍ່ໄດ້ລືມໄລກົດບັນຍັດ.

62ກາງຄືນຂ້ານ້ອຍລຸກມາຖວາຍຄຳຍ້ອງຍໍສັນລະເສີນພຣະອົງ ສຳລັບການຕັດສິນອັນຍຸດຕິທຳຂອງພຣະອົງ.

63ຂ້ານ້ອຍເປັນເພື່ອນກັບທຸກຄົນທີ່ຮັບໃຊ້ພຣະອົງ ແລະກັບທຸກຄົນທີ່ເຊື່ອຟັງກົດບັນຍັດດ້ວຍ.

64ຂ້າແດ່ພຣະເຈົ້າຢາເວ ແຜ່ນດິນໂລກເຕັມດ້ວຍຄວາມຮັກອັນໝັ້ນຄົງຂອງພຣະອົງ ຂໍຊົງໂຜດສັ່ງສອນຂໍ້ຄຳສັ່ງໃຫ້ຂ້ານ້ອຍດ້ວຍ.

65ຂ້າແດ່ພຣະເຈົ້າຢາເວ ພຣະອົງຮັກສາຄຳສັນຍາຂອງພຣະອົງ ແລະພຣະອົງຊົງດີຕໍ່ຂ້ານ້ອຍ ຊຶ່ງເປັນຜູ້ຮັບໃຊ້ຂອງພຣະອົງ.

66ຂໍພຣະອົງປະທານປັນຍາ ແລະຄວາມຮູ້ຄວາມເຂົ້າໃຈໃຫ້ແກ່ຂ້ານ້ອຍ ເພາະຂ້ານ້ອຍໄວ້ວາງໃຈໃນຂໍ້ຄຳສັ່ງຂອງພຣະອົງ.

67ແຕ່ກ່ອນ ພຣະອົງລົງໂທດເພາະຂ້ານ້ອຍໄດ້ເຮັດຜິດ ແຕ່ບັດນີ້ ຂ້ານ້ອຍເຊື່ອຟັງຖ້ອຍຄຳຂອງພຣະອົງ.

68ພຣະອົງມີໃຈເຜື່ອແຜ່ເພາະພຣະຄຸນຄວາມດີ ຂໍຊົງໂຜດສັ່ງສອນຂໍ້ຄຳສັ່ງແກ່ຂ້ານ້ອຍດ້ວຍ.

69ຄົນຈອງຫອງຫາແຕ່ເລື່ອງຕົວະໃສ່ຂ້ານ້ອຍ ແຕ່ຂ້ານ້ອຍເຊື່ອຟັງຂໍ້ຄຳສັ່ງຂອງພຣະອົງດ້ວຍສຸດຈິດສຸດໃຈ.

70ຄົນເຫຼົ່ານີ້ບໍ່ໄດ້ມີຄວາມເຂົ້າໃຈຫຍັງເລີຍ ແຕ່ຂ້ານ້ອຍພົບຄວາມສຸກໃນກົດບັນຍັດຂອງພຣະອົງ.

71ການຖືກລົງໂທດນັ້ນເປັນການດີແກ່ຂ້ານ້ອຍ ເພາະເຮັດໃຫ້ຂ້ານ້ອຍຮຽນຮູ້ເຖິງຂໍ້ຄຳສັ່ງຂອງພຣະອົງ.

72ກົດບັນຍັດທີ່ພຣະອົງໃຫ້ ມີຄວາມໝາຍແກ່ຂ້ານ້ອຍ ຫລາຍກວ່າເງິນຄຳທັງໝົດທີ່ມີຢູ່ໃນໂລກນີ້.

73ພຣະອົງໄດ້ສ້າງຂ້ານ້ອຍທັງຮັກສາຂ້ານ້ອຍໃຫ້ປອດໄພ ຂໍຊົງໂຜດໃຫ້ຂ້ານ້ອຍເຂົ້າໃຈ ເພື່ອຮຽນຮູ້ເອົາກົດບັນຍັດຂອງພຣະອົງ.

74ພວກທີ່ຢ້ານຢຳພຣະອົງເມື່ອເຫັນຂ້ານ້ອຍກໍຈະດີໃຈ ເພາະຂ້ານ້ອຍໄວ້ວາງໃຈໃນຄຳສັນຍາຂອງພຣະອົງນັ້ນ.

75ຂ້າແດ່ພຣະເຈົ້າຢາເວ ຂ້ານ້ອຍຮູ້ວ່າພຣະອົງຕັດສິນທ່ຽງທຳ ຂ້ານ້ອຍຖືກລົງໂທດກໍເພາະພຣະອົງຊົງສັດຊື່.

76ຂໍໃຫ້ຄວາມຮັກອັນໝັ້ນຄົງນັ້ນເລົ້າໂລມໃຈຂ້ານ້ອຍ ດັ່ງທີ່ພຣະອົງໄດ້ສັນຍາກັບຂ້ານ້ອຍຜູ້ຮັບໃຊ້ຂອງພຣະອົງ.

77ຂໍຊົງໂຜດເມດຕາຂ້ານ້ອຍດ້ວຍເພື່ອຂ້ານ້ອຍຈະມີຊີວິດຢູ່ ຍ້ອນກົດບັນຍັດຂອງພຣະອົງນັ້ນຂ້ານ້ອຍຈຶ່ງພົບຄວາມສຸກ.

78ຂໍໃຫ້ຄົນຈອງຫອງຖືກຂາຍໜ້າຍ້ອນຫາເລື່ອງບໍ່ຈິງໃສ່ຂ້ານ້ອຍ ຂ້ານ້ອຍຈະພາວັນນາຂໍ້ຄຳສັ່ງສອນຂອງພຣະອົງນັ້ນ.

79ຂໍໃຫ້ຜູ້ທີ່ຢຳເກງພຣະອົງມາຫາຂ້ານ້ອຍ ຄືທຸກຄົນທີ່ຮູ້ຈັກຄຳສັ່ງຂອງພຣະເຈົ້າ.

80ຂໍຊົງໂຜດໃຫ້ຂ້ານ້ອຍໄດ້ເຊື່ອຟັງຂໍ້ຄຳສັ່ງຂອງພຣະອົງຢ່າງຄົບຖ້ວນ ແລະໃຫ້ຂ້ານ້ອຍຫວິດຈາກການອັບອາຍຂາຍໜ້າ.

81ຈິດໃຈຂອງຂ້ານ້ອຍອິດອ່ອນ ຍ້ອນຄອຍຖ້າໃຫ້ພຣະອົງມາຊ່ວຍເຫລືອ ຂ້ານ້ອຍມອບຄວາມໄວ້ວາງໃຈຂອງຂ້ານ້ອຍ ໃນຖ້ອຍຄຳຂອງພຣະອົງ.

82ຕາຂອງຂ້ານ້ອຍກໍອິດເມື່ອຍຍ້ອນລໍຖ້າພຣະສັນຍາ, ຂ້ານ້ອຍຖາມວ່າ, “ເວລາໃດນໍ ພຣະອົງຈະຊ່ວຍຂ້ານ້ອຍໃຫ້ພົ້ນໄພ?”

83ຂ້ານ້ອຍໃຊ້ການບໍ່ໄດ້ດັ່ງຖົງເຫຼົ້າອະງຸ່ນໄຮ້ຄ່າ, ແຕ່ປານນັ້ນ ຂ້ານ້ອຍກໍບໍ່ໄດ້ລືມໄລຂໍ້ຄຳສັ່ງຂອງພຣະອົງ.

84ຂ້ານ້ອຍຈະຕ້ອງລໍຖ້າຢູ່ດົນປານໃດ? ເມື່ອໃດນໍ ພຣະອົງຈະຕັດສິນ ລົງໂທດຜູ້ທີ່ມັກຂົ່ມເຫັງນັ້ນ?

85ຄົນຈອງຫອງຄືຜູ້ທີ່ບໍ່ເຊື່ອຟັງກົດບັນຍັດຂອງພຣະອົງ ຍາດກັນຂຸດຂຸມເພື່ອຈະດັກຈັບຂ້ານ້ອຍໄວ້.

86ຂໍ້ຄຳສັ່ງທັງໝົດລ້ວນແຕ່ເປັນຄວາມຈິງ ຂ້ານ້ອຍຖືກຄົນຂີ້ຕົວະຂົ່ມເຫັງໂຜດຊ່ວຍຂ້ານ້ອຍດ້ວຍ.

87ພວກເຂົາເກືອບສັງຫານຂ້ານ້ອຍໄດ້ຢ່າງສຳເລັດຜົນ ແຕ່ຂ້ານ້ອຍບໍ່ໄດ້ລືມໄລຂໍ້ຄຳສັ່ງຂອງພຣະອົງເລີຍ.

88ຍ້ອນຄວາມຮັກອັນໝັ້ນຄົງຂອງພຣະອົງ ຂໍຊົງໂຜດພຣະຄຸນຄວາມດີໃຫ້ຂ້ານ້ອຍດ້ວຍ ເພື່ອວ່າຂ້ານ້ອຍຈະໄດ້ເຊື່ອຟັງກົດບັນຍັດຂອງພຣະອົງນັ້ນ.

89ຂ້າແດ່ພຣະເຈົ້າຢາເວ ຖ້ອຍຄຳຂອງພຣະອົງນັ້ນດຳລົງຢູ່ສືບໄປ ເປັນພຣະຄຳອັນຊົ່ວນິຣັນໃນຟ້າສະຫວັນ.

90ຄວາມສັດຊື່ຂອງພຣະອົງດຳລົງຢູ່ທຸກຍຸກທຸກສະໄໝ ພຣະອົງຕັ້ງໂລກໃນທີ່ຂອງມັນ ແລະຍັງຢູ່ທີ່ນັ້ນ.

91ທຸກສິ່ງທີ່ມີຢູ່ເຖິງທຸກວັນນີ້ກໍຍ້ອນຂໍ້ຄຳສັ່ງຂອງພຣະອົງ ເພາະທຸກສິ່ງລ້ວນແຕ່ເປັນເຄື່ອງມືຮັບໃຊ້ພຣະອົງ.

92ຖ້າກົດບັນຍັດຂອງພຣະອົງບໍ່ເປັນບໍ່ເກີດໃຫ້ຄວາມຊົມຊື່ນຍິນດີ ຂ້ານ້ອຍກໍມີແຕ່ຈະຕາຍໄປຍ້ອນຄວາມທົນທຸກ.

93ຂ້ານ້ອຍຈະບໍ່ປະຖິ້ມຄຳແນະນຳຂອງພຣະອົງຈັກເທື່ອ ເພາະຄຳແນະນຳນັ້ນຊົງຊ່ວຍໃຫ້ຊີວິດແກ່ຂ້ານ້ອຍ.

94ໂຜດຊ່ວຍຂ້ານ້ອຍໃຫ້ພົ້ນແດ່ ຂ້ານ້ອຍເປັນຂອງພຣະອົງ ແລະຂ້ານ້ອຍພະຍາຍາມທີ່ຈະເຮັດຕາມຂໍ້ຄຳສັ່ງຂອງພຣະອົງ.

95ຄົນຊົ່ວຮ້າຍຄອຍຖ້າສັງຫານຂ້ານ້ອຍເລື້ອຍໄປ ແຕ່ຂ້ານ້ອຍໄດ້ຕຶກຕອງເຖິງກົດບັນຍັດຂອງພຣະອົງ.

96ຂ້ານ້ອຍໄດ້ຮຽນຮູ້ວ່າທຸກສິ່ງມີຂອບເຂດຈຳກັດ ແຕ່ຂໍ້ຄຳສັ່ງຂອງພຣະອົງສົມບູນດີເລີດ.

97ຂ້ານ້ອຍຮັກກົດບັນຍັດຂອງພຣະອົງຫລວງຫລາຍທີ່ສຸດ ຂ້ານ້ອຍພາວັນນາເຖິງກົດບັນຍັດຢູ່ຕະຫລອດວັນ.

98ຂໍ້ຄຳສັ່ງຂອງພຣະອົງນັ້ນຢູ່ກັບຂ້ານ້ອຍຕະຫລອດມາ ແລະເຮັດໃຫ້ມີປັນຍາກວ່າເຫຼົ່າສັດຕູໄດ້.

99ຂ້ານ້ອຍເຂົ້າໃຈຫລາຍກວ່າຄູອາຈານ ເພາະຂ້ານ້ອຍພາວັນນາເຖິງຄຳແນະນຳຂອງພຣະອົງ.

100ຂ້ານ້ອຍມີປັນຍາກວ່າຄົນເຖົ້າແກ່ຊະຣາ ເພາະຂ້ານ້ອຍຍອມເຊື່ອຟັງຂໍ້ຄຳສັ່ງຂອງພຣະອົງ.

101ຂ້ານ້ອຍໄດ້ເວັ້ນຈາກການກະທຳຊົ່ວທຸກຢ່າງ ເພາະຂ້ານ້ອຍຕ້ອງການເຊື່ອຟັງຖ້ອຍຄຳຂອງພຣະອົງ.

102ຂ້ານ້ອຍບໍ່ໄດ້ປະຖິ້ມຂໍ້ແນະນຳຈັກຢ່າງເລີຍ. ດ້ວຍວ່າ, ຄູສອນຂອງຂ້ານ້ອຍຄືພຣະອົງ.

103ຣົດຊາດແຫ່ງຖ້ອຍຄຳຂອງພຣະອົງຫວານຊື່ນເຫລືອຫລາຍ ບໍ່ມີສິ່ງໃດປຽບປານ ຄືຫວານຫລາຍກວ່ານໍ້າເຜິ້ງທີ່ຢູ່ໃນປາກຂອງຂ້ານ້ອຍ.

104ຂ້ານ້ອຍມີປັນຍາໄດ້ກໍຍ້ອນກົດບັນຍັດຂອງພຣະອົງ ດັ່ງນັ້ນ ຂ້ານ້ອຍຈຶ່ງກຽດຊັງການກະທຳຊົ່ວທຸກຢ່າງ.

105ຖ້ອຍຄຳຂອງພຣະອົງເປັນແສງໂຄມນຳທາງໃຫ້ຂ້ານ້ອຍ ແລະແສງແຈ້ງສຳລັບທາງເດີນໃຫ້ຂ້ານ້ອຍ.

106ຂ້ານ້ອຍຈະຢຶດໝັ້ນຄຳສັນຍາທີ່ໄດ້ມີໄວ້ ແລະເຊື່ອຟັງຄຳແນະນຳອັນຖືກຕ້ອງຂອງພຣະອົງ.

107ຂ້າແດ່ພຣະເຈົ້າຢາເວ ຂ້ານ້ອຍຖືກລຳບາກ ຂໍຊົງໂຜດຮັກສາຊີວິດຂ້ານ້ອຍຕາມທີ່ພຣະອົງໄດ້ສັນຍາໄວ້ດ້ວຍ.

108ຂ້າແດ່ພຣະເຈົ້າຢາເວ ຂໍຊົງໂຜດຮັບຄຳໂມທະນາຂອບພຣະຄຸນ ແລະໂຜດສັ່ງສອນກົດບັນຍັດຂອງພຣະອົງໃຫ້ຂ້ານ້ອຍດ້ວຍ.

109ຂ້ານ້ອຍພ້ອມແລ້ວທີ່ຈະສ່ຽງຊີວິດສະເໝີໄປ, ແຕ່ຂ້ານ້ອຍ ບໍ່ໄດ້ລືມໄລກົດບັນຍັດຂອງພຣະອົງ.

110ເຖິງແມ່ນຄົນຊົ່ວຮ້າຍຫ້າງແຮ້ວໃສ່ຂ້ານ້ອຍກໍຕາມ ແຕ່ຂ້ານ້ອຍກໍບໍ່ໄດ້ຝ່າຝືນຂໍ້ຄຳສັ່ງຂອງພຣະອົງ.

111ບັນດາກົດບັນຍັດຂອງພຣະອົງເປັນມໍຣະດົກຂອງຂ້ານ້ອຍຕະຫລອດໄປ. ຊຶ່ງເປັນຄວາມຊົມຊື່ນຍິນດີໃນຈິດໃຈຂອງຂ້ານ້ອຍຢູ່ເລື້ອຍ.

112ຂ້ານ້ອຍໄດ້ຕັດສິນໃຈແລ້ວທີ່ຈະເຊື່ອຟັງ ກົດບັນຍັດຈົນເຖິງວັນທີ່ຂ້ານ້ອຍຕາຍໄປ.

113ຂ້ານ້ອຍກຽດຊັງຄົນໜ້າໄຫວ້ຫລັງຫລອກທີ່ສຸດ ແຕ່ຂ້ານ້ອຍຮັກສຸດໃຈກົດບັນຍັດຂອງພຣະອົງ.

114ພຣະອົງເປັນຜູ້ປົກປ້ອງຄຸ້ມຄອງແຕ່ໃດໆມາ ຂ້ານ້ອຍຈຶ່ງຝາກຄວາມຫວັງໄວ້ໃນຄຳສັນຍາຂອງພຣະອົງ.

115ຈົ່ງໜີຈາກຂ້ອຍເຖີດ ເຈົ້າຄົນຊົ່ວຮ້າຍເອີຍ ຝ່າຍຂ້ອຍຈະເຊື່ອຟັງຂໍ້ຄຳສັ່ງພຣະເຈົ້າຂອງຂ້ອຍ.

116ຂໍຊົງໂຜດໃຫ້ກຳລັງຂ້ານ້ອຍຕາມທີ່ພຣະອົງໄດ້ສັນຍາໄວ້ ເພື່ອຈະມີຊີວິດຢູ່ ແລະຢ່າໃຫ້ຂ້ານ້ອຍອັບອາຍຂາຍໜ້າໃນຄວາມຫວັງຂອງຂ້ານ້ອຍ.

117ຂໍຊົງໂຜດອູ້ມຊູຂ້ານ້ອຍໄວ້ ແລະຈະປອດໄພ ຂ້ານ້ອຍຈະເອົາໃຈໃສ່ຕໍ່ຂໍ້ຄຳສັ່ງຂອງພຣະອົງຢູ່ເລື້ອຍໄປ.

118ພຣະອົງໄດ້ປະຖິ້ມຄົນທີ່ບໍ່ເຊື່ອຟັງກົດບັນຍັດຂອງພຣະອົງ ແຜນການຫລອກລວງຂອງພວກເຂົາກໍໄຮ້ປະໂຫຍດ.

119ພຣະອົງໂຍນຄົນຊົ່ວດັ່ງຄົນໂຍນຂີ້ເຫຍື້ອຖິ້ມໄປ ດ້ວຍເຫດນີ້ຂ້ານ້ອຍຈຶ່ງຮັກຄຳແນະນຳຂອງພຣະອົງ.

120ຂ້ານ້ອຍຢ້ານພຣະອົງຈົນຕົວສັ່ນ ແລະຂ້ານ້ອຍຢ້ານການຕັດສິນຂອງພຣະອົງຫລາຍທີ່ສຸດ.

121ຂ້ານ້ອຍເຮັດສິ່ງທີ່ຖືກຕ້ອງແລະຍຸດຕິທຳ ຂໍຢ່າປະຖິ້ມຂ້ານ້ອຍໃຫ້ພວກສັດຕູຂອງຂ້ານ້ອຍ.

122ຈົ່ງສັນຍາວ່າ ພຣະອົງຈະຊ່ວຍຜູ້ຮັບໃຊ້ຂອງພຣະອົງ ຢ່າປ່ອຍໃຫ້ຄົນຈອງຫອງຂົ່ມເຫັງຂ້ານ້ອຍທ້ອນ

123ຕາກໍອິດເມື່ອຍຍ້ອນຄອງຫາໃຫ້ຊ່ວຍເຫລືອ ເພື່ອປົດປ່ອຍໃຫ້ເປັນເສລີຕາມທີ່ໄດ້ສັນຍາໄວ້.

124ຂໍຊົງໂຜດກະທຳດ້ວຍຄວາມຮັກອັນໝັ້ນຄົງຂອງພຣະອົງຕໍ່ຂ້ານ້ອຍ ໂຜດສິດສອນຂໍ້ຄຳສັ່ງຂອງພຣະອົງໃຫ້ຂ້ານ້ອຍດ້ວຍ.

125ຂ້ານ້ອຍເປັນຜູ້ຮັບໃຊ້ຂອງພຣະອົງ ໂຜດໃຫ້ຄວາມເຂົ້າໃຈ ເພື່ອຂ້ານ້ອຍຈະໄດ້ຮູ້ຂໍ້ຄຳສັ່ງຂອງພຣະອົງ.

126ເຖິງເວລາແລ້ວທີ່ພຣະເຈົ້າຢາເວຕ້ອງລົງມື ເພາະມະນຸດບໍ່ເຊື່ອຟັງກົດບັນຍັດຂອງພຣະອົງ.

127ຂ້ານ້ອຍຮັກຂໍ້ຄຳສັ່ງຫລາຍກວ່າຄຳ ຮັກຂໍ້ຄຳສັ່ງແທ້ໆຫລາຍກວ່າຄຳນໍ້າໜຶ່ງ.

128ດັ່ງນັ້ນ ຂ້ານ້ອຍຈຶ່ງເຮັດຕາມທຸກຄຳແນະນຳຂອງພຣະອົງ ເພາະວ່າຂ້ານ້ອຍກຽດຊັງການປະພຶດຜິດທຸກຢ່າງ.

129ຄຳສັ່ງສອນຂອງພຣະອົງເປັນທີ່ອັດສະຈັນ ຂ້ານ້ອຍເຊື່ອຟັງດ້ວຍສຸດຈິດສຸດໃຈ.

130ການອະທິບາຍຂໍ້ຄຳສັ່ງສອນຂອງພຣະອົງໃຫ້ແສງສະຫວ່າງ ແລະນຳປັນຍາໃຫ້ແກ່ພວກຄົນໂງ່ຈ້າດ້ວຍ.

131ຂ້ານ້ອຍປາຖະໜາຢາກໄດ້ຂໍ້ຄຳສັ່ງຂອງພຣະອົງ ແລະຂ້ານ້ອຍອ້າປາກດ້ວຍຄວາມຫິວກະຫາຍ.

132ໂຜດແລເບິ່ງຂ້ານ້ອຍດ້ວຍຄວາມເມດຕາ ເໝືອນດັ່ງພຣະອົງກະທຳຕໍ່ທຸກຄົນທີ່ຮັກພຣະອົງນັ້ນ.

133ໂຜດຮັກສາຂ້ານ້ອຍບໍ່ໃຫ້ລົ້ມຕາມທີ່ພຣະອົງໄດ້ສັນຍາ ຢ່າໃຫ້ສິ່ງຊົ່ວຮ້າຍມີໄຊຊະນະເໜືອຂ້ານ້ອຍ.

134ຂໍຊົງໂຜດຊ່ວຍຂ້ານ້ອຍຈາກຄົນມັກກົດຂີ່ ເພື່ອວ່າຈະໄດ້ເຊື່ອຟັງຂໍ້ຄຳສັ່ງຂອງພຣະອົງ.

135ຂໍຊົງໂຜດສະຖິດຢູ່ນຳຂ້ານ້ອຍທັງອວຍພອນຂ້ານ້ອຍດ້ວຍ. ແລະສັ່ງສອນຂ້ານ້ອຍໃຫ້ຮູ້ກົດບັນຍັດຂອງພຣະອົງແດ່ທ້ອນ.

136ນໍ້າຕາຂ້ານ້ອຍໄຫລຫລັ່ງດັ່ງສາຍລຳທານ ຍ້ອນມະນຸດບໍ່ເຊື່ອຟັງກົດບັນຍັດຂອງພຣະອົງ.

137ຂ້າແດ່ພຣະເຈົ້າຢາເວ ພຣະອົງຊົງຍຸດຕິທຳ ແລະກົດບັນຍັດທັງຫລາຍຂອງພຣະອົງກໍຍຸດຕິທຳດ້ວຍ.

138ບັນດາກົດລະບຽບທີ່ພຣະອົງໄດ້ໃຫ້ມາ ເປັນມາດຕາທີ່ທ່ຽງທຳແລະຖືກຕ້ອງ.

139ຂ້ານ້ອຍໂກດຮ້າຍຫຼາຍດັ່ງໄຟເຜົາຜານ ເພາະເຫຼົ່າສັດຕູໄດ້ເມີນເສີຍຕໍ່ຂໍ້ຄຳສັ່ງຂອງພຣະອົງ.

140ຄຳສັນຍາຂອງພຣະອົງນັ້ນຄັກແນ່ແທ້ ຂ້ານ້ອຍຮັກພຣະສັນຍາຫລາຍທີ່ສຸດ.

141ຂ້ານ້ອຍຄົນຕໍ່າຕ້ອຍຖືກດູໝິ່ນຫຍໍ້ຫຍັນ, ແຕ່ເຊື່ອໝັ້ນໃນຄຳສັ່ງສອນຂອງພຣະອົງ.

142ຄວາມຍຸດຕິທຳຂອງພຣະອົງຈະຍືນຍົງຢູ່ສືບໄປ ແລະກົດບັນຍັດຂອງພຣະອົງກໍເປັນຄວາມຈິງຢູ່ເລື້ອຍ.

143ຂ້ານ້ອຍເດືອດຮ້ອນແລະໂສກເສົ້າເຕັມທີ, ແຕ່ຂໍ້ຄຳສັ່ງຂອງພຣະອົງໄດ້ນຳຄວາມເບີກບານໃຈມາໃຫ້.

144ຄຳແນະນຳຂອງພຣະອົງນັ້ນ ເປັນຄວາມຈິງຢູ່ສືບໄປ ໂຜດໃຫ້ຂ້ານ້ອຍໄດ້ເຂົ້າໃຈແລະຈະມີຊີວິດຢູ່.

145ຂ້າແດ່ພຣະເຈົ້າຢາເວ ຂ້ານ້ອຍຮ້ອງຫາດ້ວຍສຸດໃຈ ໂຜດຕອບຂ້ານ້ອຍດ້ວຍ ເພື່ອຈະໄດ້ເຊື່ອຟັງຂໍ້ຄຳສັ່ງຂອງພຣະອົງ.

146ຂ້ານ້ອຍຮ້ອງຫາໃຫ້ຊ່ວຍຊູໂຜດຊ່ວຍດ້ວຍ ແລະຂ້ານ້ອຍກໍຈະໄດ້ຖືຮັກສາກົດບັນຍັດຂອງພຣະອົງ.

147ກ່ອນຕາເວັນຂຶ້ນ ຂ້ານ້ອຍກໍຮ້ອງຫາພຣະອົງໃຫ້ຊ່ວຍເຫຼືອ ຂ້ານ້ອຍຂໍຝາກຄວາມຫວັງໄວ້ໃນພຣະສັນຍາຂອງພຣະອົງດ້ວຍ.

148ຂ້ານ້ອຍນອນບໍ່ໄດ້ ແລະຕື່ນຂຶ້ນທັງຄືນ ຂ້ານ້ອຍມີແຕ່ພາວັນນາເຖິງຄຳແນະນຳຂອງພຣະອົງ.

149ຂ້າແດ່ພຣະເຈົ້າຢາເວ ຍ້ອນຄວາມຮັກອັນໝັ້ນຄົງນັ້ນ ໂຜດຟັງທັງເມດຕາແລະຮັກສາຊີວິດຂອງຂ້ານ້ອຍໄວ້ດ້ວຍ.

150ຜູ້ຂົ່ມເຫັງທີ່ໂຫດຮ້າຍຫຍັບເຂົ້າມາໃກ້ເຕັມທີ ຄືພວກທີ່ບໍ່ເຄີຍຖືຮັກສາກົດບັນຍັດຂອງພຣະອົງ.

151ຂ້າແດ່ພຣະເຈົ້າຢາເວ ແຕ່ພຣະອົງຢູ່ໃກ້ຊິດຂ້ານ້ອຍ ຄຳສັ່ງທຸກຂໍ້ຂອງພຣະອົງລ້ວນແຕ່ຍືນຍົງຢູ່ຕະຫລອດ.

152ຂ້ານ້ອຍໄດ້ຮຽນຮູ້ເຖິງຄຳແນະນຳຂອງພຣະອົງແຕ່ດົນ ພຣະອົງເຮັດໃຫ້ຄຳແນະນຳເຫຼົ່ານັ້ນດຳລົງຢູ່ຕະຫລອດໄປ.

153ຂໍຊົງໂຜດເບິ່ງຂ້ານ້ອຍທົນທຸກແລະຊ່ວຍຂ້ານ້ອຍໃຫ້ພົ້ນແດ່ ເພາະຂ້ານ້ອຍບໍ່ໄດ້ປະຖິ້ມກົດບັນຍັດຂອງພຣະອົງ.

154ຂໍຊົງໂຜດເປັນທະນາຍຄວາມແກ້ຄະດີໃຫ້ຂ້ານ້ອຍ ແລະປ່ອຍຂ້ານ້ອຍໃຫ້ເປັນອິດສະຫລະ. ໂຜດຊ່ວຍໃຫ້ພົ້ນຕາມທີ່ໄດ້ສັນຍາໄວ້ດ້ວຍ.

155ຄົນຊົ່ວຮ້າຍຈະບໍ່ໄດ້ຖືກຊ່ວຍກູ້ໃຫ້ພົ້ນໄພ ເພາະພວກເຂົາບໍ່ໄດ້ເຊື່ອຟັງກົດບັນຍັດຂອງພຣະອົງ.

156ຂ້າແດ່ພຣະເຈົ້າຢາເວ ຄວາມເອັນດູຂອງພຣະອົງນັ້ນກໍຍິ່ງໃຫຍ່ ໂຜດສຳແດງຄວາມເມດຕາຂອງພຣະອົງ ແລະຊ່ວຍຂ້ານ້ອຍໃຫ້ພົ້ນໄພດ້ວຍ.

157ສັດຕູແລະຜູ້ຂົ່ມເຫັງນັ້ນມີຢູ່ຫລວງຫລາຍ ແຕ່ຂ້ານ້ອຍບໍ່ລະເລີຍທີ່ຈະເຊື່ອຟັງກົດບັນຍັດຂອງພຣະອົງ.

158ເມື່ອເບິ່ງຄົນທໍລະຍົດນີ້ກໍໜ້າເບື່ອເຕັມທີ ເພາະວ່າພວກເຂົາບໍ່ໄດ້ເຊື່ອຟັງຂໍ້ຄຳສັ່ງຂອງພຣະອົງ.

159ຂ້າແດ່ພຣະເຈົ້າຢາເວ ພຣະອົງຮູ້ວ່າຂ້ານ້ອຍຮັກຄຳແນະນຳຂອງພຣະອົງຫລາຍເທົ່າໃດ ຄວາມຮັກຂອງພຣະອົງບໍ່ເຄີຍປ່ຽນແປງ ສະນັ້ນ ຂໍຊົງໂຜດຊ່ວຍຂ້ານ້ອຍໃຫ້ພົ້ນໄພດ້ວຍເຖີດ.

160ແກ່ນແທ້ຂອງກົດບັນຍັດລ້ວນແຕ່ເປັນຄວາມຈິງ ການຕັດສິນອັນຍຸດຕິທຳຂອງພຣະອົງກໍດຳລົງຢູ່ສືບໄປເປັນນິດ.

161ຄົນທີ່ມີອຳນາດໂຈມຕີຂ້ານ້ອຍຢ່າງບໍ່ຍຸດຕິທຳ ແຕ່ຂ້ານ້ອຍເຄົາຣົບນັບຖືຖ້ອຍຄຳຂອງພຣະອົງ.

162ຂ້ານ້ອຍສຸກໃຈຍ້ອນຖ້ອຍຄຳຂອງພຣະອົງ ມີຄວາມສຸກຫລາຍເໝືອນດັ່ງຄົນທີ່ພົບສົມບັດອັນມັ່ງຄັ່ງ.

163ຂ້ານ້ອຍກຽດຊັງການຕົວະຍົວະທຸກປະການ, ແຕ່ຂ້ານ້ອຍຮັກກົດບັນຍັດຂອງພຣະອົງ.

164ຂ້ານ້ອຍໂມທະນາຂອບພຣະຄຸນພຣະອົງມື້ໜຶ່ງເຈັດເທື່ອ ຍ້ອນການຕັດສິນອັນຍຸດຕິທຳຂອງພຣະອົງນັ້ນ.

165ຄົນທີ່ຮັກກົດບັນຍັດກໍມີຄວາມປອດໄພດີ ແລະບໍ່ມີສິ່ງໃດທີ່ເຮັດໃຫ້ພວກເຂົາລົ້ມລົງໄດ້.

166ຂ້າແດ່ພຣະເຈົ້າຢາເວ ຂ້ານ້ອຍລໍຖ້າພຣະອົງຊ່ວຍໃຫ້ພົ້ນໄພ ສະນັ້ນ ຂ້ານ້ອຍຈຶ່ງໄດ້ເຮັດຕາມຂໍ້ຄຳສັ່ງຂອງພຣະອົງ.

167ຈິດວິນຍານຂອງຂ້ານ້ອຍເຊື່ອຟັງຄຳສັ່ງຂອງພຣະອົງ ແລະຮັກຄຳສັ່ງສອນນັ້ນຢ່າງສຸດຈິດສຸດໃຈ.

168ຂ້ານ້ອຍຂັບຕາມຂໍ້ຄຳສັ່ງຂອງພຣະອົງ ແລະຄຳແນະນຳຂອງພຣະອົງ ພຣະອົງຊົງຮູ້ເຫັນທຸກສິ່ງທີ່ຂ້ານ້ອຍກະທຳນັ້ນ.

169ຂ້າແດ່ພຣະເຈົ້າຢາເວ ຂໍຊົງໂຜດໃຫ້ສິ່ງທີ່ທູນຂໍນັ້ນຂຶ້ນເຖິງພຣະອົງ ໂຜດໃຫ້ຂ້ານ້ອຍເຂົ້າໃຈຕາມທີ່ໄດ້ສັນຍາໄວ້ດ້ວຍ.

170ໂຜດຮັບຟັງຄຳພາວັນນາອະທິຖານຂໍຂອງຂ້ານ້ອຍດ້ວຍ ໂຜດຊ່ວຍຂ້ານ້ອຍໃຫ້ພົ້ນຕາມຄຳສັນຍາຂອງພຣະອົງດ້ວຍ.

171ຂ້ານ້ອຍຈະຍ້ອງຍໍສັນລະເສີນພຣະອົງຢູ່ສະເໝີໄປ ເພາະພຣະອົງສັ່ງສອນຂ້ານ້ອຍໃຫ້ຮູ້ກົດບັນຍັດຂອງພຣະອົງ.

172ຂ້ານ້ອຍຈະຮ້ອງເພງທີ່ກ່າວເຖິງກົດບັນຍັດ ເພາະຂໍ້ຄຳສັ່ງຂອງພຣະອົງຖືກຕ້ອງແລະທ່ຽງທຳ.

173ຂໍພຣະອົງຕຽມພ້ອມມາຊ່ວຍເຫລືອຂ້ານ້ອຍ ເພາະຂ້ານ້ອຍໄດ້ເລືອກທີ່ຈະເຮັດຕາມຂໍ້ຄຳສັ່ງຂອງພຣະອົງ.

174ຂ້າແດ່ພຣະເຈົ້າຢາເວ ຂ້ານ້ອຍຄອງຄອຍການໂຜດຊ່ວຍຂອງພຣະອົງ ຫວັງແຕ່ໃຫ້ພຣະອົງຊ່ວຍຊູ. ຂ້ານ້ອຍພົບຄວາມສຸກໃນກົດບັນຍັດຂອງພຣະອົງ.

175ຂໍຊົງໂຜດຮັກສາຊີວິດຂອງຂ້ານ້ອຍໄວ້ດ້ວຍ ເພື່ອຈະສາມາດຍ້ອງຍໍສັນລະເສີນພຣະອົງ ຂໍໃຫ້ຂໍ້ຄຳແນະນຳຂອງພຣະອົງຊ່ວຍເຫຼືອຂ້ານ້ອຍດ້ວຍ.

176ຂ້ານ້ອຍຫລົງທາງເໝືອນດັ່ງແກະທີ່ຫລົງເສຍໄປ. ສະນັ້ນ ຂໍພຣະອົງຊອກຫາຂ້ານ້ອຍແດ່ທ້ອນ ຄືຊອກຫາຜູ້ຮັບໃຊ້ຂອງພຣະອົງ ເພາະຂ້ານ້ອຍບໍ່ໄດ້ປະຖິ້ມຂໍ້ຄຳສັ່ງຂອງພຣະອົງຈັກເທື່ອ.