Psalms 9

Lao Bible 2012 (ພຣະຄຳພີສັກສິ)

← Chapter 8 Jump to: Chapter 10 →

1ຂ້າແດ່ພຣະເຈົ້າຢາເວ ຂ້ານ້ອຍຈະໂມທະນາຂອບພຣະຄຸນ ດ້ວຍໝົດຫົວໃຈຂອງຂ້ານ້ອຍ ຂ້ານ້ອຍຈະບອກເຖິງສິ່ງຍິ່ງໃຫຍ່ ທັງໝົດຊຶ່ງພຣະອົງໄດ້ກະທຳນັ້ນ.

2ຂ້ານ້ອຍຈະຮ້ອງດ້ວຍຄວາມຊົມຊື່ນຍິນດີ ແລະຈະຍົກຍໍພຣະນາມຂອງພຣະອົງຊົງຍິ່ງໃຫຍ່ສູງສຸດ.

3ເມື່ອພຣະອົງມາປາກົດ ເຫຼົ່າສັດຕູຂອງຂ້ານ້ອຍກໍຖອຍໜີໄປ, ພວກເຂົາລົ້ມລົງແລະສູນຫາຍຕາຍໄປສິ້ນ.

4ພຣະອົງຕັດສິນຢ່າງສັດຊື່ແລະຍຸດຕິທຳ ພຣະອົງໄດ້ຕັດສິນເຂົ້າຂ້າງຂ້ານ້ອຍແລ້ວ.

5ພຣະອົງໄດ້ຕັດສິນລົງໂທດຄົນບໍ່ນັບຖືພຣະອົງ ທຳລາຍຄົນຊົ່ວຈົນບໍ່ມີຜູ້ໃດຈົດຈຳພວກເຂົາຕໍ່ໄປອີກ.

6ສັດຕູພວກຂ້ານ້ອຍໄດ້ດັບສິ້ນຕະຫລອດໄປ ເມືອງຂອງເຂົາຖືກທຳລາຍແລະລືມໄລໄປສິ້ນ.

7ແຕ່ອົງພຣະຜູ້ເປັນເຈົ້າເປັນກະສັດສືບໆໄປ ຊົງຕັ້ງພຣະບັນລັງສຳລັບການຕັດສິນລົງໂທດ.

8ພຣະອົງປົກຄອງໂລກດ້ວຍຄວາມສັດຊື່ ຊົງຕັດສິນບັນດາຊົນຊາດຢ່າງຍຸດຕິທຳ.

9ພຣະເຈົ້າຢາເວເປັນທີ່ເພິ່ງຂອງຜູ້ທີ່ຖືກຂົ່ມເຫັງ ເປັນບ່ອນປອດໄພໃນຄາວເດືອດຮ້ອນ.

10ຜູ້ທີ່ຮູ້ຈັກພຣະນາມຂອງພຣະອົງກໍວາງໃຈໃນພຣະອົງ ຜູ້ທີ່ມາຫາພຣະເຈົ້າຢາເວຈະບໍ່ຖືກປະຖິ້ມຈັກເທື່ອ.

11ຈົ່ງຮ້ອງເພງຍ້ອງຍໍສັນລະເສີນພຣະເຈົ້າຢາເວເຖີດ ຜູ້ປົກຄອງໃນພູເຂົາຊີໂອນເອີຍ ຈົ່ງບອກທຸກຊົນຊາດໃຫ້ໄດ້ຍິນທຸກສິ່ງ ທີ່ພຣະອົງໄດ້ກະທຳນັ້ນ

12ພຣະເຈົ້າຊົງແກ້ແຄ້ນແທນເລືອດທີ່ຕົກ ພຣະອົງບໍ່ລືມໄລ ແຕ່ຕອບຄຳຮ້ອງໄຫ້ຂອງຜູ້ທີ່ຖືກກົດຂີ່.

13ຂ້າແດ່ພຣະເຈົ້າຢາເວ ຂໍຊົງໂຜດເມດຕາແດ່ທ້ອນ ໂຜດເບິ່ງຄວາມທົນທຸກທີ່ສັດຕູກໍ່ຂຶ້ນນັ້ນ ຂໍຊົງໂຜດຊ່ວຍກູ້ເອົາ ຂ້ານ້ອຍໃຫ້ພົ້ນຈາກຕາຍແດ່ທ້ອນ

14ເພື່ອວ່າຂ້ານ້ອຍຈະໄດ້ກ່າວຄຳຍ້ອງຍໍສັນລະເສີນພຣະອົງ ໃນປະຕູທັງຫຼາຍຂອງລູກສາວຊີໂອນ. ຂ້ານ້ອຍກໍຈະຊົມຊື່ນຍິນດີຫລາຍ ເພາະພຣະອົງໄດ້ຊ່ວຍຂ້ານ້ອຍໃຫ້ພົ້ນໄພແລ້ວ.

15ຄົນບໍ່ນັບຖືພຣະເຈົ້າກໍຕົກຫລຸມທີ່ພວກເຂົາຂຸດເອງ ພວກເຂົາຖືກດັກຈັບໃນບ່ອນທີ່ພວກເຂົາໄດ້ຫ້າງໄວ້ເອງ.

16ພຣະເຈົ້າຢາເວເປີດເຜີຍພຣະອົງເອງດ້ວຍການຕັດສິນອັນຍຸດຕິທຳ ຄົນຊົ່ວຮ້າຍກໍຖືກຈັບໂດຍສິ່ງທີ່ຕົນເອງໄດ້ກະທຳໄວ້.

17ຄວາມຕາຍຄືຈຸດຈົບຂອງຄົນຊົ່ວຮ້າຍທຸກຄົນ ເປັນຂອງຄົນທີ່ບໍ່ຍອມຮັບເອົາພຣະເຈົ້າ.

18ຄົນຂັດສົນຈະບໍ່ຖືກປະຖິ້ມຢູ່ເລື້ອຍໄປ ຄົນຈົນຈະບໍ່ຖືກທຳລາຍໄປຕະຫລອດ.

19ຂ້າແດ່ພຣະເຈົ້າຢາເວ ຂໍຊົງໂຜດດຳເນີນການເຖີດ ຢ່າປ່ອຍໃຫ້ມະນຸດທ້າທາຍພຣະອົງໄດ້ ໂຜດນຳຄົນບໍ່ນັບຖືພຣະເຈົ້າມາຢູ່ຊ້ອງໜ້າພຣະອົງ ແລະປະກາດການຕັດສິນລົງໂທດເຂົາເຈົ້າ.

20ຂ້າແດ່ພຣະເຈົ້າຢາເວ ຂໍຊົງໂຜດເຮັດໃຫ້ພວກເຂົາຢ້ານ ໂຜດເຮັດໃຫ້ພວກເຂົາຮູ້ວ່າ ພວກເຂົາເປັນພຽງແຕ່ມະນຸດເທົ່ານັ້ນ.

← Chapter 8 Jump to: Chapter 10 →

Recommended Reading

Commentary Psalms Commentaries → Devotional Psalms Devotional Guide → Get This Bible Lao Bible (ພຣະຄຳພີສັກສິ) Study Bible →