Psalms 95

Lao Bible 2012 (ພຣະຄຳພີສັກສິ)

← Chapter 94 Jump to: Chapter 96 →

1ຈົ່ງມາຍ້ອງຍໍສັນລະເສີນພຣະເຈົ້າຢາເວເຖີດ ຈົ່ງຮ້ອງເພງຖວາຍແດ່ພຣະຜູ້ຄຸ້ມຄອງຢ່າງຊົມຊື່ນຍິນດີ.

2ຈົ່ງເຂົ້າມາເຝົ້າພຣະອົງດ້ວຍການໂມທະນາຂອບພຣະຄຸນ ຮ້ອງເພງຢ່າງຊື່ນໃຈຍ້ອງຍໍສັນລະເສີນພຣະອົງ.

3ເພາະພຣະເຈົ້າຢາເວຄືພຣະເຈົ້າອົງຊົງຣິດຍິ່ງໃຫຍ່ ເປັນກະສັດອົງຊົງຍິ່ງໃຫຍ່ເໜືອພະທັງປວງ.

4ພຣະອົງປົກຄອງຢູ່ເໜືອແຜ່ນດິນໂລກທັງໝົດ ຈາກຖໍ້າເລິກສຸດຈົນເຖິງຍອດພູສູງສຸດພຸ້ນ.

5ພຣະອົງປົກຄອງເໜືອນໍ້າທະເລທີ່ພຣະອົງໄດ້ສ້າງ ຕະຫລອດທັງແຜ່ນດິນທີ່ພຣະຫັດຂອງພຣະອົງໄດ້ສ້າງ.

6ຈົ່ງເຂົ້າມາກົ້ມຂາບນະມັດສະການພຣະອົງ ຄຸເຂົ່າລົງຕໍ່ໜ້າພຣະຜູ້ສ້າງຂອງພວກເຮົາ ຄືພຣະເຈົ້າຢາເວ.

7ດ້ວຍວ່າ, ພຣະອົງເປັນພຣະເຈົ້າຂອງເຮົາທັງຫລາຍ ແລະພວກເຮົາກໍເປັນປະຊາຊົນຂອງພຣະອົງດ້ວຍ ຄືເປັນໄພ່ພົນທີ່ພຣະອົງຊົງເຝົ້າເບິ່ງຮັກສາ ເປັນຝູງແກະທີ່ຊົງລ້ຽງດູ.

8ວັນນີ້ ຈົ່ງເຊື່ອຟັງສິ່ງທີ່ພຣະອົງກ່າວ “ຢ່າດື້ດ້ານດັ່ງປູ່ຍ່າຕາຍາຍຂອງພວກເຈົ້າ ໄດ້ເຮັດທີ່ເມຣີບານັ້ນ ເໝືອນດັ່ງພວກເພິ່ນໄດ້ເຮັດໃນ ຖິ່ນແຫ້ງແລ້ງກັນດານທີ່ມັດສານັ້ນ.

9ທີ່ນັ້ນ ພວກເຂົາໄດ້ພິສູດແລະທົດລອງເບິ່ງເຮົາ ເຖິງວ່າໄດ້ເຫັນສິ່ງທີ່ເຮົາໄດ້ກະທຳແກ່ພວກເຂົາແລ້ວກໍຕາມ.

10ຕະຫລອດສີ່ສິບປີເຮົາເບື່ອໜ່າຍປະຊາຊົນເຫຼົ່ານີ້ ເຮົາຈຶ່ງກ່າວວ່າ, ‘ພວກເຂົາບໍ່ສັດຊື່ແລະຝ່າຝືນຂໍ້ຄຳສັ່ງຢູ່ເລື້ອຍ.’

11ສະນັ້ນ ດ້ວຍຄວາມໂກດຮ້າຍເຮົາຈຶ່ງສັນຍາວ່າ ‘ພວກເຈົ້າຈະບໍ່ໄດ້ເຂົ້າໄປສູ່ບ່ອນພັກເຊົາຂອງເຮົາຈັກເທື່ອ.”’

← Chapter 94 Jump to: Chapter 96 →

Recommended Reading

Commentary Psalms Commentaries → Devotional Psalms Devotional Guide → Get This Bible Lao Bible (ພຣະຄຳພີສັກສິ) Study Bible →