Psalms 89 — Lao Bible 2012 (ພຣະຄຳພີສັກສິ)

1ຂ້າແດ່ພຣະເຈົ້າຢາເວ ຂ້ານ້ອຍຈະຂັບຮ້ອງບົດເພງ ເຖິງພຣະຄຸນຄວາມດີຢູ່ເລື້ອຍໆ. ຂ້ານ້ອຍຈະປະກາດຄວາມສັດຊື່ຂອງພຣະອົງ ຕະຫລອດໄປເປັນນິດ.

2ຂ້ານ້ອຍຮູ້ວ່າຄວາມຮັກຂອງພຣະອົງມີຢູ່ຕະຫຼອດເວລາ ແລະຄວາມສັດຊື່ຂອງພຣະອົງກໍຍືນຍົງຢູ່ຟ້າສະຫວັນ.

3ພຣະອົງກ່າວວ່າ, “ເຮົາເຮັດພັນທະສັນຍາໄວ້ ກັບມະນຸດທີ່ເຮົາໄດ້ເລືອກເອົາພວກເຂົານັ້ນ ຄືໄດ້ເຮັດໄວ້ກັບດາວິດຜູ້ຮັບໃຊ້ຂອງເຮົາ, ເຮົາໄດ້ໃຫ້ຄຳສັນຍາກັບລາວດັ່ງນີ້:

4‘ເຊື້ອສາຍເຈົ້າຄົນໜຶ່ງຈະເປັນກະສັດເລື້ອຍໄປ ເຊື້ອວົງເຈົ້າຈະຖືກສະຫງວນໄວ້ຕະຫລອດໄປ.”’

5ຂ້າແດ່ພຣະເຈົ້າຢາເວ ຟ້າສະຫວັນຮ້ອງຍົກຍ້ອງ ສັນລະເສີນສິ່ງງຶດງໍ້ອັດສະຈັນຂອງພຣະອົງ ຜູ້ບໍຣິສຸດກໍຍົກຍ້ອງສັນລະເສີນຄວາມສັດຊື່ຂອງພຣະອົງ.

6ໃນສະຫວັນບໍ່ມີຜູ້ໃດເໝືອນພຣະເຈົ້າຢາເວ ບໍ່ມີຊາວສະຫວັນຄົນໃດຈະເທົ່າທຽມພຣະເຈົ້າຢາເວໄດ້.

7ພຣະເຈົ້າຊົງເປັນທີ່ຢ້ານກົວໃນຊຸມຊົນຂອງພວກບໍຣິສຸດທັງຫຼາຍ ແລະທຸກຄົນກໍຢືນຢູ່ຢ່າງເກງກົວສຸດຂີດຕໍ່ພຣະອົງນັ້ນ.

8ພຣະເຈົ້າຢາເວ ພຣະເຈົ້າອົງຊົງຣິດອຳນາດຍິ່ງໃຫຍ່ເອີຍ ບໍ່ມີຜູ້ໃດທີ່ມີອຳນາດຍິ່ງໃຫຍ່ດັ່ງພຣະອົງໄດ້. ພຣະເຈົ້າຢາເວເອີຍ ພຣະອົງຊົງສັດຊື່ ໃນສັບພະທຸກສິ່ງ.

9ພຣະອົງປົກຄອງທະເລກວ້າງທີ່ມີກຳລັງແຮງ ແລະເຮັດໃຫ້ຄື້ນແຫ່ງຄວາມໂມໂຫງຽບລົງໄດ້.

10ພຣະອົງໄດ້ຢຽບມັງກອນຣາຮາບ ແລະຂ້າໃຫ້ຕາຍ ໄດ້ເອົາຊະນະພວກສັດຕູດ້ວຍຣິດທານຸພາບຂອງພຣະອົງ.

11ຈັກກະວານແລະແຜ່ນດິນໂລກເປັນຂອງພຣະອົງ ພຣະອົງໄດ້ສ້າງໂລກແລະທຸກສິ່ງທີ່ຢູ່ໃນນັ້ນ.

12ພຣະອົງໄດ້ສ້າງທິດໃຕ້ທິດເໜືອພູຕາໂບກັບເຮີໂມນ ຕ່າງກໍຮ້ອງຢ່າງຊົມຊື່ນຍິນດີຍົກຍໍພຣະອົງດ້ວຍ.

13ພຣະອົງຊົງຣິດອຳນາດເຫລືອຫລາຍທີ່ສຸດ ກຳລັງຂອງພຣະອົງກໍຍິ່ງໃຫຍ່ຫລາຍແທ້ໆ.

14ຄວາມຊອບທຳກັບຄວາມຍຸດຕິທຳນັ້ນແມ່ນ ຮາກຖານແຫ່ງອານາຈັກຂອງພຣະອົງ ຄວາມຮັກແລະຄວາມສັດຊື່ກໍກ້າວເດີນໄປ ຂ້າງໜ້າພຣະອົງ.

15ຂ້າແດ່ພຣະເຈົ້າຢາເວ ຄວາມສຸກເປັນຂອງຜູ້ທີ່ນະມັດສະການພຣະອົງດ້ວຍສຽງເພງ ພວກເຂົາດຳເນີນຢູ່ໃນຄວາມສະຫວ່າງ ແຫ່ງພຣະເມດຕາຂອງພຣະອົງ.

16ຍ້ອນພຣະອົງ ພວກເຂົາຈຶ່ງຊົມຊື່ນຍິນດີຕະຫລອດວັນ ແລະພວກເຂົາຍ້ອງຍໍສັນລະເສີນຄວາມຍຸດຕິທຳຂອງພຣະອົງ.

17ພຣະອົງໃຫ້ພວກຂ້ານ້ອຍມີໄຊຢ່າງໃຫຍ່ຫລວງ ໃນຄວາມຮັກຂອງພຣະອົງ ເຮັດໃຫ້ພວກຂ້ານ້ອຍມີກຳລັງຂຶ້ນ.

18ແທ້ຈິງແລ້ວ ໂລ້ກຳບັງຂອງເຮົາທັງຫຼາຍຄືພຣະເຈົ້າຢາເວ ພຣະມະຫາກະສັດອົງບໍຣິສຸດແຫ່ງຊາດອິດສະຣາເອນ ໄດ້ໃຫ້ກະສັດແກ່ພວກຂ້ານ້ອຍ.

19ດົນນານມາແລ້ວທີ່ພຣະອົງກ່າວທາງນິມິດຄວາມຝັນ ຕໍ່ບັນດາຜູ້ຮັບໃຊ້ທີ່ສັດຊື່ຂອງພຣະອົງນັ້ນວ່າ, “ເຮົາໄດ້ຖອກເທພະກຳລັງໃຫ້ນັກຮົບຄົນໜຶ່ງທີ່ມີຊື່ສຽງດີ ແລະມອບບັນລັງໃຫ້ຜູ້ໜຶ່ງທີ່ເຮົາໄດ້ເລືອກໄວ້ຈາກໄພ່ພົນທັງປວງ.

20ເຮົາໄດ້ເຮັດໃຫ້ດາວິດຜູ້ຮັບໃຊ້ຂອງເຮົາເປັນກະສັດ ໂດຍໃຊ້ນໍ້າມັນສັກສິດຫົດສົງແຕ່ງຕັ້ງ.

21ກຳລັງອຳນາດຂອງເຮົາຈະຢູ່ກັບລາວເລື້ອຍໆໄປ ຣິດອຳນາດຂອງເຮົາຈະໃຫ້ລາວເຂັ້ມແຂງດ້ວຍ.

22ສັດຕູຂອງລາວຈະໂຈມຕີລາວ ແຕ່ຈະບໍ່ສຳເລັດເລີຍ ຄົນຊົ່ວຮ້າຍຈະເອົາຊະນະລາວບໍ່ໄດ້ຈັກເທື່ອ.

23ເຮົາຈະຢຽບຢໍ່າທຳລາຍພວກສັດຕູຂອງລາວ ແລະຂ້າທຸກໆຄົນທີ່ກຽດຊັງລາວຖິ້ມ.

24ເຮົາຈະຮັກແລະສັດຊື່ຕໍ່ລາວ ຈະໃຫ້ລາວໄຊຊະນະເໜືອສັດຕູຢູ່ເລື້ອຍໆ.

25ເຮົາຈະໃຫ້ອານາຈັກຂອງລາວແຜ່ຂະຫຍາຍອອກໄປ ຈາກທະເລເມດີແຕຣາເນເຖິງແມ່ນໍ້າເອີຟຣັດ.

26ລາວຈະຮ້ອງຕໍ່ເຮົາວ່າ, ‘ພຣະອົງເປັນພຣະບິດາ ແລະເປັນພຣະເຈົ້າຂອງຂ້ານ້ອຍ ແລະເປັນພຣະສີລາແຫ່ງຄວາມພົ້ນຂອງຂ້ານ້ອຍ.’

27ເຮົາຈະເຮັດໃຫ້ລາວເປັນລູກຊາຍກົກຂອງເຮົາ ເປັນຜູ້ຍິ່ງໃຫຍ່ກວ່າບັນດາກະສັດທັງສິ້ນ.

28ເຮົາຈະຮັກສາຄຳສັນຍາຂອງເຮົາທີ່ມີຕໍ່ລາວໄວ້ສະເໝີ ແລະພັນທະສັນຍາຂອງເຮົາຈະຢູ່ກັບລາວຕະຫລອດໄປ.

29ຜູ້ໜຶ່ງໃນເຊື້ອສາຍຂອງລາວຈະເປັນກະສັດປົກຄອງເລື້ອຍໄປ ແລະເຊື້ອສາຍຂອງລາວກໍຈະຍືນຍົງຢູ່ທີ່ຟ້າສະຫວັນ.

30ແຕ່ຖ້າເຊື້ອສາຍລາວບໍ່ເຊື່ອຟັງກົດບັນຍັດຂອງເຮົາ ແລະບໍ່ດຳເນີນຊີວິດຕາມຂໍ້ຄຳສັ່ງຂອງເຮົານັ້ນ.

31ຖ້າພວກເຂົາບໍ່ເອົາໃຈໃສ່ຕໍ່ຄຳແນະນຳຂອງເຮົາ ແລະທັງບໍ່ຮັກສາຂໍ້ຄຳສັ່ງຂອງເຮົາດ້ວຍ.

32ແລ້ວເຮົາກໍຈະລົງໂທດຍ້ອນການບາບຂອງພວກເຂົາ ເຮົາຈະເຮັດໃຫ້ໄດ້ທົນທຸກຍ້ອນຄວາມຜິດນັ້ນ.

33ແຕ່ເຮົາຈະບໍ່ຢຸດຢັ້ງທີ່ຈະໃຫ້ຄວາມຮັກແກ່ດາວິດ ຫລືລົບລ້າງຄຳສັນຍາທີ່ມີກັບລາວນັ້ນຖິ້ມ.

34ເຮົາຈະບໍ່ລະເມີດພັນທະສັນຍາທີ່ມີໄວ້ກັບລາວ ຫລືຖອນຄຳສັນຍາທີ່ເຮົາເຮັດໄວ້ກັບລາວນັ້ນ.

35ເຮົາສາບານຢ່າງເດັດຂາດໂດຍຄວາມບໍຣິສຸດຂອງເຮົາວ່າ, ເຮົາຈະບໍ່ຕົວະດາວິດຈັກເທື່ອ.

36ເຊື້ອສາຍຂອງລາວກໍຈະສືບຕໍ່ແພ່ຜາຍໄປຕະຫຼອດ ອານາຈັກກໍຈະຜ່ອງໃສດັ່ງຕາເວັນສ່ອງແຈ້ງ.

37ອານາຈັກນັ້ນຈະຍືນຍົງຢູ່ເໝືອນດັ່ງດວງຈັນ ທີ່ເປັນພະຍານອັນສັດຊື່ຢູ່ເທິງທ້ອງຟ້າ.”

38ແຕ່ພຣະອົງໂກດຮ້າຍຕໍ່ກະສັດທີ່ພຣະອົງເລືອກເອົາ ພຣະອົງໄດ້ປະຖິ້ມລາວແລະບໍ່ຮັບເອົາລາວດ້ວຍ.

39ພຣະອົງຍົກເລີກພັນທະສັນຍາກັບຜູ້ຮັບໃຊ້ຂອງພຣະອົງ ແລະໂຍນມົງກຸດຂອງລາວໃສ່ຂີ້ຕົມດ້ວຍ.

40ສ່ວນກຳແພງເມືອງຂອງລາວນັ້ນພຣະອົງກໍມ້າງລົງ ປ່ອຍໃຫ້ປ້ອມຍາມເມືອງຮົກຮ້າງເພພັງໝົດສິ້ນ.

41ທຸກຄົນທີ່ຍ່າງຜ່ານກໍລັກເອົາເຄື່ອງຂອງ ແລະເພື່ອນບ້ານທັງໝົດກໍຫົວເຍາະເຍີ້ຍ.

42ພຣະອົງໄດ້ເຮັດໃຫ້ເຫຼົ່າສັດຕູໄດ້ມີໄຊ ໂດຍເຮັດໃຫ້ພວກເຂົາດີໃຈທຸກຖ້ວນໜ້າ.

43ພຣະອົງໃຫ້ອາວຸດຂອງລາວໃຊ້ການບໍ່ໄດ້ເລີຍ ພຣະອົງໄດ້ໃຫ້ລາວເສຍໄຊຢູ່ໃນສະໜາມຮົບ.

44ສ່ວນຍົດສັກແຫ່ງກະສັດ ກໍຖືກເອົາໜີໄປ ແລະໂຄ່ນລົ້ມບັນລັງລົງເຖິງພື້ນ.

45ພຣະອົງເຮັດໃຫ້ລາວເຖົ້າແກ່ໄວກວ່າອາຍຸສັງຂານ ແລະໃຫ້ພົບພານກັບຄວາມອັບອາຍຢ່າງຫລາຍເຫຼືອລົ້ນ.

46ຂ້າແດ່ພຣະເຈົ້າຢາເວ ພຣະອົງຈະລີ້ໜ້າໄປດົນປານໃດ? ຄວາມໂກດຮ້າຍຂອງພຣະອົງຈະລຸກໄໝ້ໄປດົນປານໃດອີກ?

47ຂໍຊົງໂຜດລະນຶກເຖິງຂ້ານ້ອຍວ່າຊີວິດນີ້ສັ້ນຫລາຍ ຈົ່ງຈົດຈຳໄວ້ວ່າ ມະນຸດຖືກສ້າງໃຫ້ຕາຍເປັນທຸກຄົນ.

48ແມ່ນຜູ້ໃດຈະມີຊີວິດຢູ່ຄໍ້າຟ້າໄດ້? ມະນຸດຈະຮັກສາຕົນໃຫ້ພົ້ນຈາກ ຂຸມຝັງສົບໄດ້ຢ່າງໃດແດ່?

49ຂ້າແດ່ອົງພຣະຜູ້ເປັນເຈົ້າ ຄວາມຮັກອັນໝັ້ນຄົງຂອງພຣະອົງແຕ່ກ່ອນນັ້ນໄປໃສໝົດ? ຄຳສັນຍາທີ່ພຣະອົງມີໄວ້ກັບດາວິດນັ້ນຢູ່ໃສແລ້ວ?

50ຂ້າແດ່ອົງພຣະຜູ້ເປັນເຈົ້າ ຂໍຢ່າລືມວ່າຂ້ານ້ອຍຜູ້ຮັບໃຊ້ຖືກດູໝິ່ນສໍ່າໃດ ແລະທົນຕໍ່ຄຳສາບແຊ່ງ ຂອງຄົນບໍ່ເຊື່ອພຣະເຈົ້າ.

51ຂ້າແດ່ອົງພຣະຜູ້ເປັນເຈົ້າ ພວກສັດຕູຂອງພຣະອົງໄດ້ໝິ່ນປະໝາດກະສັດ ຜູ້ທີ່ພຣະອົງໄດ້ເລືອກເອົາໃນທຸກບ່ອນທີ່ເພິ່ນໄປນັ້ນ.

52ຈົ່ງຍ້ອງຍໍສັນລະເສີນພຣະເຈົ້າຢາເວຕະຫລອດໄປເປັນນິດ. ອາແມນ ອາແມນ.