Song of Solomon 3

Lao Bible 2012 (ພຣະຄຳພີສັກສິ)

← Chapter 2 Jump to: Chapter 4 →

1ຢູ່ເທິງທີ່ນອນຂອງຂ້ອຍໃນຍາມຄໍ່າຄືນ ຂ້ອຍມີແຕ່ຝັນຫາຄົນຮັກຂອງຂ້ອຍ; ຂ້ອຍຊອກຄົ້ນຫາຄົນທີ່ຂ້ອຍຮັກ ແຕ່ຂ້ອຍກໍຊອກຫາລາວບໍ່ພົບເລີຍ

2ຂ້ອຍໄດ້ໄປທ່ຽວຊອກຫາລາວຢູ່ໃນເມືອງ ຕາມຫົນທາງ ແລະຕາມຮ່ອມຕາມແຈດ້ວຍ. ຂ້ອຍຊອກຄົ້ນຫາຜູ້ໜຶ່ງທີ່ຂ້ອຍຮັກຫລາຍ ຂ້ອຍຊອກແນມຫາແຕ່ກໍບໍ່ພົບລາວຊໍ້າ.

3ຄົນຍາມທີ່ເລາະລຽບໄດ້ເຫັນຂ້ອຍໃນເມືອງ ຂ້ອຍຖາມພວກເຂົາເຈົ້າວ່າ, “ເຫັນຄົນຮັກຂອງຂ້ອຍບໍ?”

4ພໍຂ້ອຍຈາກພວກເຂົາໄປແລ້ວ ຂ້ອຍກໍໄດ້ພົບລາວ ຂ້ອຍດຶງເອົາລາວ ແລະບໍ່ຍອມໃຫ້ລາວໜີຫ່າງ ຈົນກວ່າຂ້ອຍໄດ້ຄຽງຂ້າງພາລາວໄປເຮືອນມານດາ ແລະພາເຂົ້າໄປໃນຫ້ອງບ່ອນທີ່ຂ້ອຍເກີດມານັ້ນ.

5ສາວນະຄອນເຢຣູຊາເລັມເອີຍ ຈົ່ງສັນຍາຂ້ອຍເຖີດ ໃນນາມກວາງ ແລະເຍືອງເຖິກທີ່ວ່ອງໄວໃຈກ້າ ຈົ່ງສາບານໄວ້ວ່າພວກເຈົ້າຈະບໍ່ກຸກກວນ ຄວາມຮັກຂອງພວກຂ້ອຍ.

6ແມ່ນຫຍັງນໍ ກຳລັງມາຈາກຖິ່ນແຫ້ງແລ້ງກັນດານ ດຸດດັ່ງຄວັນທີ່ເປັນເສົາພຸ່ງຂຶ້ນ ແມ່ນກິ່ນຊວນຊື່ນເຄື່ອງຫອມແລະກຳຍານບໍ? ຊຶ່ງພໍ່ຄ້າທັງຫລາຍໄດ້ນຳມາຂາຍນັ້ນ.

7ເບິ່ງພຸ້ນດູ ແມ່ນຂະບວນແຫ່ໂຊໂລໂມນ ມີນັກຮົບຜູ້ກ້າຫານຫົກສິບຄົນ ໃນອິດສະຣາເອນພ້ອມ.

8ທຸກຄົນສາມາດໃຊ້ດາບຢ່າງຊຳນິຊຳນານ ເປັນນັກຮົບຜ່ານເສິກມາຢ່າງຊຸກຊົນທັງນັ້ນ. ແຕ່ລະຄົນໃນພວກເຂົາເຈົ້າຕ່າງກໍຖືດາບໃນມື ຕຽມພ້ອມປະເຊີນການໂຈມຕີໃນກາງຄືນໄດ້.

9ກະສັດໂຊໂລໂມນນັ່ງເທິງບັນລັງທີ່ມີຄົນແບກຫາມ ຊຶ່ງຖືກສ້າງຂຶ້ນມາດ້ວຍໄມ້ດີທີ່ສຸດທັງນັ້ນ.

10ຄານຫາມຂອງບັນລັງນີ້ແມ່ນໂອບດ້ວຍເງິນ ຊຶ່ງໃຊ້ດ້າຍປົນຄຳຫຍິບແສ່ວຢ່າງດີທີ່ສຸດດ້ວຍ. ບ່ອນນັ່ງທີ່ເພິ່ນນັ່ງແມ່ນໃຊ້ຜ້າສີມ່ວງຫຸ້ມປົກ ເປັນຜ້າທີ່ງົດງາມຕໍ່າໂດຍສາວແຫ່ງນະຄອນທັງສິ້ນ.

11ສາວພູຊີໂອນເອີຍ ມາເບິ່ງກະສັດໂຊໂລໂມນເຖີດ ເພິ່ນສວມມົງກຸດອັນງາມທີ່ແມ່ເພິ່ນສຸບໃສ່ໃຫ້ ແມ່ສຸບໃສ່ໃຫ້ເພິ່ນໃນວັນທີ່ກະສັດແຕ່ງງານ ໃນວັນອັນປິຕິຍິນດີ ແລະຊົມຊື່ນທີ່ສຸດຂອງເພິ່ນ.

← Chapter 2 Jump to: Chapter 4 →