Song of Solomon 7

Lao Bible 2012 (ພຣະຄຳພີສັກສິ)

← Chapter 6 Jump to: Chapter 8 →

1ນ້ອງນາງຊ່າງເປັນຍິງສາວທີ່ງາມຫລາຍ ຕີນນ້ອງທີ່ສຸບເກີບສາຍພາຍກໍງາມຫລາຍແທ້ ບັ້ນແອວນ້ອງກິ່ວແລະໜ້າທ້ອງຂອງນາງ ກໍງາມເທົ່າກັບສີມືນັກສິນລະປິນປັ້ນແຕ່ງ.

2ສ່ວນສະບືນ້ອງກໍເປັນດັ່ງຖ້ວຍໃບໜຶ່ງມົນໆ ບ່ອນທີ່ມີກິ່ນເຫຼົ້າອະງຸ່ນຫອມບໍ່ຈາງຈັກເທື່ອ. ໜ້າທ້ອງນ້ອງເປັນດັ່ງກອງເຂົ້າບະເລ ທີ່ມີດອກລີລາອ້ອມຮອບເຕັມຢູ່.

3ນົມທັງສອງຂອງນ້ອງງາມດັ່ງລູກກວາງສອງໂຕ ງາມດັ່ງເຍືອງສອງໂຕທີ່ເປັນລູກຝາແຝດ.

4ລຳຄໍນ້ອງກໍເປັນດັ່ງຫໍຄອຍສູງ ຊຶ່ງກ້ຽງກົມ ແລະຂາວງາມດັ່ງງາຊ້າງ. ຕານ້ອງທັງສອງເປັນດັ່ງສະນໍ້າທີ່ເຮັດຊະໂບນ ທີ່ຢູ່ໃກ້ປະຕູເຂົ້າໄປສູ່ເມືອງໃຫຍ່ນັ້ນ. ດັງນ້ອງກໍງາມດັ່ງຫໍຄອຍສູງທີ່ເລບານອນ ທີ່ເປັນບ່ອນເຝົ້າຍາມຢູ່ກົງກັບດາມັສກັດພຸ້ນ.

5ສ່ວນຫົວນ້ອງນັ້ນສູງສົ່ງຢ່າງຜຶງຜາຍ ສູງດັ່ງພູກາເມນທີ່ຕັ້ງຢູ່ຢ່າງສູງສົ່ງ. ຜົມເປຍນ້ອງສີແດງເຂັ້ມເປັນສີສັນງາມສະຫງ່າ ຄວາມງາມນັ້ນ ເຮັດໃຫ້ກະສັດຄົນໜຶ່ງຕົກເປັນຈຳເລີຍ.

6ນ້ອງນາງຊ່າງງາມແທ້ ນ້ອງນາງຊ່າງງາມຫລາຍ ຄວາມຮັກຂອງນາງ ຊ່າງພາໃຫ້ຍິນດີຢ່າງເຕັມລົ້ນ.

7ຊັດສ່ວນນ້ອງນາງນັ້ນກໍງາມສະຫງ່າດັ່ງຕົ້ນຕານ ນົມນ້ອງທັງສອງເປັນດັ່ງແຊງໝາກຕານອ້ອຍຕ້ອຍ.

8ອ້າຍຈະຄ່ອຍປີນກະດືບຂຶ້ນໄປຕາມລຳຕົ້ນຕານ ອ້າຍຈະໃຊ້ມືຈັບໝາກຕານທັງແຊງໄວ້. ສຳລັບອ້າຍ ນົມນ້ອງນັ້ນເປັນດັ່ງພົ້ວໝາກອະງຸ່ນ ສ່ວນລົມຫາຍໃຈ ກໍສໍ່າກິ່ນໝາກຈອງຫອມຫວນຍິ່ງ.

9ສ່ວນປາກນ້ອງນັ້ນເຮັດໃຫ້ອ້າຍຊາບຊຶ້ງ ເໝືອນດັ່ງເຫຼົ້າອະງຸ່ນຊັ້ນດີຢູ່ໃນປາກ. ຖ້າດັ່ງນັ້ນ ຂໍໃຫ້ເຫຼົ້າອະງຸ່ນໄຫລສູ່ຄົນຮັກຂ້ອຍໂດຍກົງ ໂດຍໃຫ້ໄຫລຕົງໄປສູ່ຮີມສົບແລະສູ່ແຂ້ວດ້ວຍ.

10ຂ້ອຍເປັນກຳມະສິດຂອງຄົນຮັກຂອງຂ້ອຍ ແລະຄົນຮັກຂອງຂ້ອຍກໍເປັນກຳມະສິດຂອງຂ້ອຍ.

11ມາພີ້ທີ່ຮັກຂອງນ້ອງ ໃຫ້ພວກເຮົາໄປຍັງຊົນນະບົດ ອອກໄປສູ່ໝູ່ບ້ານຕ່າງໆ ແລະນອນຄ້າງຄືນຢູ່ທີ່ນັ້ນ.

12ພວກເຮົາຈະລຸກແຕ່ເຊົ້າເພື່ອໄປເບິ່ງເຄືອອະງຸ່ນ ເບິ່ງວ່າເຄືອອະງຸ່ນປົ່ງຍອດແລ້ວຫລືບໍ່ ເລາະເບິ່ງຕົ້ນໄມ້ ເບິ່ງຕົ້ນໝາກພີລາທີ່ນັ້ນຄືກັນ ແລະນ້ອງຈະມອບຄວາມຮັກໃຫ້ແກ່ອ້າຍທີ່ນັ້ນ.

13ອ້າຍຈະໄດ້ດົມກິ່ນຫອມຂອງໝາກເຂືອສຸກ ໝາກໄມ້ທຸກຊະນິດທີ່ໃຫ້ພວກເຮົາພໍໃຈໃກ້ປະຕູບ້ານ. ສຸດທີ່ຮັກເອີຍ ນ້ອງເກັບມັນໄວ້ໃຫ້ອ້າຍພຽງຜູ້ດຽວ ຄືເກັບຄວາມຍິນດີອັນດັ້ງເດີມແລະໃໝ່ອ່ຽມ.

← Chapter 6 Jump to: Chapter 8 →