bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Madurese
/
Madurese Bible 1994 (ALKETAB E DHALEM BASA MADURA)
/
Genesis 24
Genesis 24
Madurese Bible 1994 (ALKETAB E DHALEM BASA MADURA)
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 25 →
1
Ibrahim la ce' seppona, ban eberkadi PANGERAN e dhalem parkara apa'a bai.
2
E settong are Ibrahim adhabu ka kabulana se paleng towa, se epassrae ngoros sakabbinna dhi'-andhi'na, “Mara saba' tanangnga ba'na e antarana tang kang-pekang. Mara sateya ba'na asompa kalaban asmana PANGERAN, Allah se ngobasane langnge' ban bume, ja' bi' ba'na tang ana' ta' enyareyagiya bine ana'na oreng e nagara Kana'an reya.
4
Ba'na kodu entar ka tang kampong; nyareyagi paraban se egabaya binena Ishak, dhari tang la-bala dibi'.”
5
Kabulana jareya mator, “Kadi ponapa manabi parabanna ta' poron adinggallagi nagarana kaangguy noro' abdina ka ka'dhinto? Ponapa pottrana panjennengngan epakona meyos ka nagara asalla panjennengngan?”
6
Dhabuna Ibrahim, “Senga'! Ja' sampe' tang ana' egiba dha' essa' maske baramma'a!
7
PANGERAN, Allah se ngobasane langnge' abakta sengko' kalowar dhari bengkona tang eppa' ban dhari nagarana tang la-bala; PANGERAN la asompa marengngagiya nagara reya ka sengko' ban ka tang na' poto. Daddi PANGERAN masthe ngotos malaekadda epanolonge ba'na sopaja ba'na bisa'a nemmo paraban se egabaya binena tang ana'.
8
Mon paraban jareya ta' endha' noro' ba'na dha' enna', ba'na bebas dhari sompana. Tape, maske baramma'a, tang ana' ta' olle giba dha' essa'.”
9
Daddi kabulana Ibrahim jareya pas nyaba' tanangnga e antarana kang-pekangnga Ibrahim lorana, pas asompa ajalannagiya apa se epakonnagi Ibrahim jareya.
10
Kabulana Ibrahim jareya laju ngala' ontana lorana sapolo meggi', sarta acem-macem barang laenna se aji, pas mangkat ka kottha kennengnganna bengkona Nahor; iya areya e dhaja'anna Mesopotamia.
11
Sanapa'na, ta-ontana epaambu e seddi'anna somor e lowarra kottha. E bakto jareya baja asar, baktona babine'an entar nyello' aeng ka somor.
12
Kabulana Ibrahim jareya nyo'on ka Allah, oca'na, “Adhu, Guste PANGERAN, Allah se esemba Ibrahim lora abdidalem, nyo'ona tolong sopaja e are mangken abdidalem kengenga ajalannagi papakonna lora abdidalem.
13
Samangken abdidalem manjeng e seddi'na somor se badhi eentare ban-paraban se nyello'a aeng.
14
Abdidalem ngoca'a sapaneka ka sala settonga paraban se nyello' aeng gapaneka, ‘Mara, ra, patoron kelmo'na, sengko' menta'a aengnga, ngenoma.’ Manabi babine' gapaneka nyaot, ‘Ngereng eatore. Ontana sampeyan bi' kaula engala'agiya aeng jugan,’ sareng abdidalem gapaneka eanggebba menangka tandha ja' paraban gapaneka se epele Junandalem kaagem rajina Ishak, abdiepon Junandalem. Abdidalem tanto pas oneng ja' Junandalem pajat neptebbi parjanjiyannepon sareng Ibrahim, lora abdidalem.”
15
Sabellunna mare se adu'a pas badha babine', nyamana Ribka, nyo'on kelmo'na. Ribka jareya ana'na Betuwel, reng towana Betuwel jareya Nahor ban Milka, dineng Nahor reya kaka'na Ibrahim.
16
Ribka jareya ce' raddinna, gi' ngodha ban paraban. Ribka entar ka somor jareya, ngesse'e kelmo'na, samarena laju ajalan, moleya.
17
Kabulana Ibrahim gella' berka' nyander ka seddi'anna, pas ngoca', “Mara, ra, Na', sengko' menta'a aengnga se e kelmo'na jareya, sengko' terro ngenoma.”
18
Saodda Ribka, “Ngereng eatore.” Kelmo'na laju epatoron. Kabulana Ibrahim gella' ngenom, nyordhuk aengnga dhari kelmo'na se eteggu'i Ribka.
19
Samarena oreng jareya ngenom, Ribka ngoca', “Ontana sampeyan bi' kaula engala'agiya aeng jugan, me' olle padha ngenom epatobuk.”
20
Aeng e kelmo'na rowa pas etotta' ka baddhana pangenomanna ontana. Saellana jareya, Ribka pas berka' ka somor nyello' aeng pole sampe' ta-onta jareya padha tobuk kabbi se ngenom.
21
Kabulana Ibrahim gella' pera' ngabassagi malolo, ta' ca'-ngoca' pa-apa, terro taowa apa bi' PANGERAN eparenge partolongan sopaja ehteyarra ahasela.
22
Saellana ontana mare eenome kabbi, kabulana Ibrahim jareya laju makalowar anteng emmas se larang, epasang ka elongnga Ribka, ban gellang emmas se ja-raja dhadhuwa', epasang ka lengngenna.
23
Ca'na oreng jareya, “Sapa eppa'na ba'na, Na'? E compo'na eppa'na ba'na ba' badha'a kennengngan mon sengko' sakanca ngamponga ngenep?”
24
Saodda Ribka, “Eppa' kaula nyamana Betuwel, pottrana Nahor sareng Milka.
25
Manabi sampeyan kelemma, e compo' badha kennengngan. Jugan bannya' darameyan sareng pakanna ebin.”
26
Kabulana Ibrahim jareya pas asojud amolja'agi PANGERAN,
27
oca'na, “Molja'agi PANGERAN, Allah se esemba Ibrahim, tang lora. Sabab PANGERAN neptebbi janjina ka Ibrahim, tang lora; sengko' etonton epatemmo ban balana.”
28
Babine' gella' laju berka' ka bengkona ebuna pas nyareta'agi sakabbinna kadaddiyan gella'.
29
Ribka jareya andhi' taretan lalake', nyamana Laban. Laban nangale'e anteng e elongnga ale'na ban gellang e lengngenna, sarta ngedhing caretana ale'na parkara sabarang se ekoca'agi lalake' gella'. Daddi Laban laju gancangan kalowar dhari bengkona entar ka kabulana Ibrahim se gi' jeng-manjeng ban ta-ontana e seddi'anna somor rowa.
31
Ca'na Laban, “Ngereng eatore lenggi ka compo'. Sampeyan eberkadi PANGERAN! Aponapa me' gi' ngadek e ka'iya? Ngereng kelem e compo'. E ka'issa' ampon esadhiya'agi kennengngan, jugan ampon esadhiya'agi kennengnganna ta-ontana.”
32
Daddi kabulana Ibrahim jareya laju maso' ka bengkona Laban. Bi' Laban mowadanna ontana epatoron, ontana epakane ban eberri'i darameyan. Kabulana Ibrahim sakanca padha engala'agi aeng bacco.
33
E bakto eangka'e kakanan, kabulana Ibrahim jareya ngoca', “Kaula gi' ta' neddha'a manabi gi' ta' manapa' pessenna lora kaula.” Ca'na Laban, “Ngereng, eatore.”
34
“Kaula paneka kabulana Ibrahim,” ca'na oreng jareya molae acareta.
35
“PANGERAN apareng berkat se talebat rajana ka lora kaula. Lora kaula epasogi. Eparenge dumba sareng embi', sape, onta sareng hemar, emmas sareng salaka, sareng dunor lalake'an sareng babine'an.
36
Sara, rajina, kaagungan pottra lalake' e bakto Ibrahim ampon talebat seppona. Sadajana harta kaagunganna sareng Ibrahim esangkollagi ka pottrana gapaneka.
37
Sareng Ibrahim kaula epakon asompa ja' kaula atoro'a ka papakonna. Ca'epon dhabuna, ‘Senga', tang ana' ja' nyareyagi bine ana'na oreng e nagara Kana'an reya.
38
Nyareyagi balana kaomma tang eppa' bai. Daddi kassa' sateya ba'na entar ka nagarana tang eppa'.’
39
Kaula atanya, ‘Kadi ponapa manabi parabanna ta' poron noro' abdina ka ka'dhinto?’
40
Lora kaula adhabu sapaneka, ‘PANGERAN se esemba sengko' molae lamba' tanto ngotos malaekadda epakon nolonge ba'na sopaja ba'na ahasela nyareyagi bine tang ana', paraban dhari tang bangsa, iya areya la-balana tang eppa'.
41
Mon ba'na la entar ka tang bala, tape ba'na etolak, ba'na bebas dhari sompana.’
42
E bakto kaula gella' napa' ka somor ka'issa', kaula nyo'on sapaneka ka PANGERAN, ‘Adhu, Guste PANGERAN, Allah se esemba Ibrahim, lora abdidalem, nyo'ona tolong, Guste, sopaja abdidalem ahasela e dhalem ajalannagi papakon ka'dhinto.
43
Samangken abdidalem badha e seddi'anna somor ka'dhinto. Manabi badha paraban dhateng nyello'a aeng, abdidalem ngoca'a: Mara, ra, sengko' menta'a aengnga sakone', nyordhuga dhari kelmo'na.
44
Manabi paraban gapaneka nyaot: Ngereng eatore. Ontana sampeyan bi' kaula engala'agiya aeng jugan, me' olle padha ngenom epatobuk, sareng abdidalem eanggebba menangka tandha ja' paraban gapaneka peleyanna Junandalem kaagem pottrana lora abdidalem.’
45
Kaula gi' ta' lastare se nyo'on e dhalem ate, Ribka dhateng nyo'on kelmo', laju entar ka somor nyello'a aeng. Kaula ngoca' ka kana' ganeka, ‘Na', mara, ra, sengko' menta'a aengnga sakone', terro ngenoma.’
46
Kana' gapaneka duli matoron kelmo'na, laju ngoca', ‘Ngereng, eatore, ta-ontana sampeyan bi' kaula eenomana jugan.’ Daddi kaula pas ngenom, dineng Ribka ngenome ta-onta kaula.
47
Kaula pas atanya, ‘Sapa eppa'na ba'na, Na'?’ Saodda, ‘Eppa' kaula Betuwel, pottrana Nahor sareng Milka.’ Kaula laju masang anteng ka elongnga, sareng gellang ka lengngenna.
48
Kaula pas asojud abakte ka PANGERAN, amolja'agi PANGERAN, Allah se esemba Ibrahim lora kaula, se nonton kaula epatapanggi sareng balana lora kaula; kantos kaula tapanggi sareng pottra bine'na sampeyan, se sareng kaula eso'ona badhi judhuna pottrana lora kaula.
49
Samangken, ngereng dhabuwagi, ponapa sampeyan kasokan noduwagi kataresna'an sareng kaestowan ka lora kaula; manabi bunten, dhabuwagi jugan, sopaja kaula onenga pas aponapa'a kaula paneka.”
50
Laban ban Betuwel nyaot, “Parkara paneka dhari PANGERAN asalla, daddi banne kaula se kodu motose.
51
Paneka' Ribka badha e ka'iya; eatore bakta, badhi binena pottrana lorana sampeyan, menorot se edhabuwagi PANGERAN dibi'.”
52
E bakto ngedhing jawaban jareya, kabulana Ibrahim jareya laju asojud abakte ka PANGERAN.
53
Saellana jareya pas makalowar kalambi se rang-larang, pareyasan dhari emmas ban salaka, se pas ebagi ka Ribka. Kaka' ban ebuna eberri'i rang-barang se rang-larang keya.
54
Saellana jareya, kabulana Ibrahim ban ca-kancana pas ngakan ban ngenom, terros pas ngenep e jadhiya. E bakto la jaga kalagguwanna, kabulana Ibrahim jareya ngoca', “Kaula palemana ka compo'na lora kaula.”
55
Kaka' ban ebuna Ribka ngoca', “Diggal Ribka me' gi' enneng ban kaula dhimen samenggu otaba sapolo are aggi', saamponna ganeka kengeng bakta.”
56
Tape kabulana Ibrahim ngoca', “Ampon kaula ja' panante' pole. Sareng PANGERAN parjalanan kaula eparenge ahasel; daddi samangken kaula palemana.”
57
Saodda kaka' ban ebuna Ribka, “Samangken Ribka saos olok. Kadi ponapa ca'epon Ribka.”
58
Daddi Ribka pas eolok. Ca'na kaka' ban ebuna, “Ba'na endha' noro' oreng reya?” Saodda Ribka, “Enggi, poron.”
59
Daddi kaka' ban ebuna ngedine Ribka noro' kabulana Ibrahim ban reng-orengnga, Ribka ebarengnge anjuna se la towa se la abit ngabula ka oreng towana.
60
Kaka' ban ebuna aberkadi Ribka, oca'na, “Ribka, ba'na mandar bannya'a toronanna! Na' potona ba'na mandar ngobasa'ana tha-kotthana so-mosona!”
61
Ribka ban bareng babine'anna pas padha akes-rengkes, saellana jareya laju padha ongga ka ontana bang-sebang, terros mangkat noro' kabulana Ibrahim.
62
Sabatara jareya Ishak teppa'na dhateng dhari ra-ara, lebat e somor se anyama “Lahai-Roi”, se artena “Somorra Pangeran Se Ajaga Sengko'”. Ishak jareya kalenggiyanna e Tana Negeb e bagiyan lao'na Kana'an.
63
E settong are e baja asar Ishak kalowar dhari kemahna, laju lan-jalanan e talon, pas ngoladi badha ta-onta dhateng ka jadhiya.
64
E bakto nangale'e Ishak, Ribka toron dhari ontana,
65
pas atanya ka kabulana Ibrahim, “Pasera lalake' se ajalan ka'anja e talon ka'issa'?” “Ka'issa' lora kaula,” saodda kabulana Ibrahim. Ribka laju ngala' salendhangnga, etopowagi ka mowana.
66
Kabulana Ibrahim laju nyareta'agi ka Ishak sabarang se la elakone aba'na.
67
Ishak laju ngeba Ribka maso' ka kemahna se lamba' ekalenggi'i Sara, ebuna. Ribka pas ekabine Ishak. Ishak neser ka Ribka, daddi atena talepor maske ebuna la seda.
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 25 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50