Genesis 36

Madurese Bible 1994 (ALKETAB E DHALEM BASA MADURA)

← Chapter 35 Jump to: Chapter 37 →

1Areya' toronanna Esau aliyas Edom.

2Esau binena tatello', babine' dhari Kana'an, iya areya: Ada, ana'na Elon, oreng Het; Oholibama ana'na Ana kompoyya Zibeyon, oreng Hewi;

3Basmat, ana'na Isma'il, ale'na Nebayot.

4Ada andhi' ana' Elifas, Basmat andhi' ana' Rehuwel,

5ban Oholibama andhi' ana' Yeus, Yaelam ban Korah. Na'-kana' jareya kabbi lahir e Kana'an.

6Saellana jareya Esau laju ngalle ka nagara laen ta' apolong ban Yakub, ana' binena egiba kabbi, bariya keya sakabbinna oreng se badha e bengkona, ebinna ban dhi'-andhi'na ollena se alako e Kana'an.

7Kan apesa dhari Yakub polana tana se ekennengnge ekadhuwai ban Yakub la ta' nyokobi ka kaparlowanna se kadhuwa jareya. Sabab ebinna la padha ce' bannya'na, daddi Esau ban Yakub ta' ngenneng akompol terros.

8Daddi Esau laju ngalle ka kennengngan se anyama Edom e pagunongan Seir.

9Areya' toronanna Esau, bangatowana oreng Edom.

10Binena se anyama Ada andhi' ana' lalake' kasorang, nyamana Elifas. Ban Elifas andhi' ana' lalake' kalema, iya areya: Téman, Omar, Zefo, Gaetam ban Kenas. Elifas andhi' seller, nyamana Timna. Timna andhi' ana' lalake' nyamana Amalek. Binena Esau se anyama Basmat andhi' ana' lalake' kasorang se anyama Rehuwel. Ban Rehuwel andhi' ana' lalake' kaempa, iya areya Nahat, Zerah, Syama ban Miza.

14Binena se anyama Oholibama, iya areya ana'na Ana, kompoyya Zibeyon, andhi' ana' lalake' katello, iya areya Yeus, Yaelam ban Korah.

15Areya' kapalana ku-suku toronanna Esau: Elifas, ana' sareyangnga Esau, bangatowana ku-suku se kasebbut e baba reya: Téman, Omar, Zefo, Kenas, Korah, Gaetam ban Amalek.

16Ku-suku jareya kabbi toronanna Ada, binena Esau.

17Rehuwel, ana'na Esau, bangatowana ku-suku se kasebbut e baba reya: Nahat, Zerah, Syama ban Miza. Ku-suku jareya kabbi toronanna Basmat, binena Esau.

18Ku-suku se kasebbut e baba reya toronanna Esau dhari binena se anyama Oholibama ana'na Ana, iya areya: Yeus, Yaelam ban Korah.

19Ku-suku jareya kabbi toronanna Esau.

20Pandhudhu' aslina Tana Edom ebagi daddi ku-suku toronanna Seir, oreng Hori. Ku-suku jareya iya areya: Lotan, Syobal, Zibeyon, Ana, Disyon, Ezer ban Disyan.

22Lotan reya bangatowana marga Hori ban Heman. (Lotan andhi' taretan bine', iya areya Timna.)

23Syobal reya bangatowana marga: Alwan, Manahat, Ebal, Syefo ban Onam.

24Zibeyon andhi' ana' lalake' kadhuwa, iya areya Aya ban Ana. (Ana jareya se nemmo ber-somberra aeng panas e ra-ara, e bakto aba'na parappa'na ngowan mar-hemarra eppa'na.)

25Ana reya eppa'na Disyon, ban Disyon bangatowana marga: Hemdan, Esyban, Yitran ban Keran. Ana andhi' keya ana' bine' kasorang, nyamana Oholibama.

27Ezer bangatowana marga: Bilhan, Za'awan ban Akan.

28Disyan bangatowana marga Us ban Aran.

29Areya' ku-suku Hori e nagara Edom: Lotan, Syobal, Zibeyon, Ana, Disyon, Ezer ban Disyan.

31Sabellunna badha rato se marenta e Isra'il, to-rato se kasebbut e baba reya alir-gilir marenta Tana Edom: Bela ana'na Beor dhari Dinhaba. Yobab ana'na Zera dhari Bozra. Husyam dhari dhaera Téman. Hadad ana'na Bedad dhari Awit (Hadad jareya se makala oreng Midian e dhalem paperrangan e dhaera Mo'ab). Samla dhari Masreka. Saul dhari Rehobot e penggir songay. Ba'al-Hanan ana'na Akhbor. Hadar dhari Pahu (binena anyama Mehetabe'el, ana'na Matred, kompoyya Mezahab).

40Esau reya bangatowana ku-suku Edom reya: Timna, Alwa, Yetet, Oholibama, Ela, Pinon, Kenas, Téman, Mibzar, Magdiyel ban Iram. Saneyap tana se ekennengnge ku-suku jareya enyamae menorot nyamana suku jareya.

← Chapter 35 Jump to: Chapter 37 →