Deuteronomy 15

Mossi MPBU (WẼNNAAM SEBRE 2014)

← Chapter 14 Jump to: Chapter 16 →

1Yʋʋm a yopoe fãa, bɩ y bas y sam-dãmbã taale.

2Ad b sẽn na n bas sama taal to-to: B sã n wa moon bas taal yʋʋmdã, ned ning fãa sẽn peng a to bũmb tog n basa taale. A ka tõe n leb n modg a to, wall a ba-biig t'a lebs-a a bũmbã wakat ning b sẽn zoe n moon bas-taal yʋʋmdã Sẽn-Ka-Saab yĩngã ye.

3Yãmb tõe n modga sãan t'a yao yãmb y samde, la y bas sam nins y saam-biisã sẽn tarã taale.

4Nimbãan-ned ka na n zĩnd yãmb sʋk ye. Bala, Sẽn-Ka-Saab na n ninga tẽngã barka, tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã.

5Yãmb sã n sak n kelg Sẽn-Ka-Saab sẽn yaa yãmb Wẽnnaamã koɛɛgã n gũus n maan bũmb nins fãa mam sẽn kõ yãmb dũndã wã,

6Sẽn-Ka-Saab sẽn yaa yãmb Wẽnnaamã na n ninga yãmb bark wa b sẽn yeel yãmbã. Buud wʋsg na n gãnega bũmb ne yãmb n paam n peng bũmb yãmb nengẽ, la yãmb ka na n bõos bãmb bũmb ye. Yãmb na n sooga buud wʋsgo, la bãmb ka na n tol n soog yãmb ye.

7Fo saam-biisã sʋk ned sã n yaa naong soab n be yãmb tẽmsã tẽng a yembr sẽn yaa Sẽn-Ka-Saab sẽn yaa yãmb Wẽnnaamã sẽn kõ yãmbã tɩ y soogã pʋga, bɩ f ra keng f sũur n mong f ba-biigã sẽn yaa naong soabã bũmb ye.

8Puk f nug n peng-a bũmb ning a sẽn datã.

9Gũus f meng n da wa paam tags-yood n yeele: «Yʋʋm a yopoe yʋʋmdã sẽn yaa bas taal yʋʋmdã kolgdame» n ka zoe f saam-biigã sẽn yaa naong soabã nimbãanega, n mong-a bũmbu, fo yĩng sã n kɩt t'a yãb ne Sẽn-Ka-Saabo, fo na n konga bʋʋm.

10Kõ-a ne yamleoogo, la ka ne rok-m-zugẽ ye. Dẽ, Sẽn-Ka-Saab sẽn yaa yãmb Wẽnnaamã na n ninga foom bark f tʋʋmã, ne bũmb nins fãa fo sẽn dat n maanã pʋga.

11Bala, naong rãmb na n zĩnda tẽngã pʋgẽ wakat fãa. Yaa rẽndã yĩng la mam yet yãmb tɩ y tẽeg y nug n sõng y saam-biigã, ne naong soabã la nimbãan-dãmb sẽn be yãmb tẽngẽ wã.

12Fo saam-biig sẽn yaa Ebre neda, sã n yaa rao bɩ paga, sã n koos a meng ne foom, bɩ a tʋm fo tʋʋmd yʋʋm a yoobe. La yʋʋm a yopoe wã yʋʋmd sã n ta, bɩ f kõ-a lohorem.

13Fo sã n kõ-a lohorem n bas-a t'a na n yi fo zakẽ wã, bɩ f ra bas-a t'a loog nug-zaal ye.

14Yãk rũm-bãooneg ne bõn-koaadla, la bũmb ning sẽn be fo reezẽ rãam wẽkr zĩigẽ wã, n kõ-a wa sẽn zems bark ning Sẽn-Ka-Saab sẽn kõ foomã.

15Tẽeg-y tɩ yãmb me rag n yaa yembs Ezɩpt tɩ Sẽn-Ka-Saab sẽn yaa yãmb Wẽnnaamã fãag yãmba. Yaa rẽndã yĩng la m kõt yãmb no-kãngã rũndã.

16Baoosgo, yambã sã n yeel foom: «Mam ka rat n yi yãmb zakẽ wã ye,» a sẽn nong foom ne f yirã rãmbã yĩnga, t'a sẽn be fo zakẽ wã noom-a lame,

17bɩ f rɩk pĩim n dɩdg a tʋbrã ne lugr n vʋdg t'a lebg f yamb wakat fãa. Bɩ f maan f yem-poak me woto.

18Fo sã n bas-a, bɩ f ra zoe bõn ye. Bala, yʋʋm a yoobã pʋgẽ, yẽnda tʋmame n naf foom naoor a yiib n yɩɩd ned sẽn tʋmd n baood ligdi. La Sẽn-Ka-Saab sẽn yaa yãmb Wẽnnaamã na n ninga yãmb bark ne bũmb nins fãa yãmb sẽn na n maanã.

19Bɩ f rɩk f rũm-bɛdã ne f rũm-bãoonegã kom-dẽems nins sẽn yaa raadã fãa n kõ Sẽn-Ka-Saab sẽn yaa yãmb Wẽnnaamã. Da rɩk f niig kom-dẽems n maan nag-koods ye. La f ra wõrs f piis kom-dẽems kõbd ye.

20Bɩ foom ne f zakã rãmb rɩ rũm-bãmb yʋʋmd fãa yʋʋmd fãa Sẽn-Ka-Saab sẽn yaa yãmb Wẽnnaamã taoore, zĩig ning Sẽn-Ka-Saab sẽn na n yãkã pʋga.

21Rũngã sã n tar zang n yaa woabg bɩ zõanga, wall zang buud a to, bɩ f ra rɩk-a n maan maoong Sẽn-Ka-Saab sẽn yaa yãmb Wẽnnaamã yĩng ye.

22Bɩ f rɩ-a f meng tẽmsã pʋse. Ned sẽn yaa rẽgd ne ned sẽn yaa yɩlemd tõe n dɩ-a-la wa walg ne yĩisri.

23Da rɩ a zɩɩmã ye, raag-a tẽng wa koom.

← Chapter 14 Jump to: Chapter 16 →