Deuteronomy 17

Mossi MPBU (WẼNNAAM SEBRE 2014)

← Chapter 16 Jump to: Chapter 18 →

1Da-y rɩk-y naaf bɩ pesgo, wall bʋʋg sẽn tar zang bɩ bãnde, n maan maoong Sẽn-Ka-Saab sẽn yaa yãmb Wẽnnaamã yĩng ye. Bala, bõn-kãng na n yɩɩ yel-beed Sẽn-Ka-Saab sẽn yaa yãmb Wẽnnaamã nifẽ.

2Sã n mikame tɩ tẽms nins Sẽn-Ka-Saab sẽn yaa yãmb Wẽnnaamã sẽn kõ yãmbã pʋga, rao bɩ pag n be tẽng a yembr pʋgẽ, n maand sẽn yaa wẽng Sẽn-Ka-Saab sẽn yaa yãmb Wẽnnaamã nifẽ, n bas b kaoolã,

3n kẽng n tɩ wõgemd wẽnnaam-dãmb a taab taoor n waoog-ba, wall a waoog wĩndgã bɩ kiuugã wall ãdsã, n kɩɩs noor ning mam sẽn kõ wã,

4tɩ ned sã n togs yãmba, bɩ yãmb n wʋm tɩ b gomd a yelle, bɩ y fees n bao n bãnge: dẽ yĩnga yel-be-kãngã sɩd maanã Israyɛll pʋgẽ sɩda? Yãmb sã n mik tɩ bõn-wẽng a woto n sɩd maan Israyɛll nebã sʋka,

5bɩ y yiis raoã bɩ pag ning sẽn maan-a yel-wẽn-kãngã wã tẽngã noor n lob-a ne kug t'a ki. Sã n yaa raoa wall paga, bɩ b lob-a ne kug t'a ki.

6Ned sã n segd ne kũum, b tog n kʋ-a lame, la yaa neb a yiib bɩ a tãab kaset yĩnga. B ka tog n kʋ a soabã nin-yend kaset yĩng ye.

7Kaset-dãmbã n tog n yɩ pipi n lobg-a kugrã tɩ neb a taabã yaool n pʋgle. Woto, yãmb na n yiisa wẽngã yãmb sʋka.»

8«Nin-kʋʋre, bɩ zabre, wall sãmpogr yell sã n wa beẽ, tɩ b tall n wa y tẽmsã rignoy tɩ bʋʋdã kaoob yaa toogo, bɩ y yik n kẽng zĩig ning Sẽn-Ka-Saab sẽn yaa yãmb Wẽnnaamã sẽn na n yãkã.

9Fo na n tɩ yãnda Leevi neb nins sẽn yaa maan-kʋʋdbã, la ned ning sẽn yaa-a bʋ-kaood wakat-kãngã n wilg bãmb yellã, tɩ b kao bʋʋdã n kõ yãmba.

10Maan-y wa bãmb sẽn kao bʋʋdã to-to n kõ yãmb zĩig ning Sẽn-Ka-Saab sẽn na n yãkã pʋgẽ. Sak-y n maan-y bũmbã fãa wa bãmb sẽn yeel yãmbã kɛpɩ.

11Maan-y wa sẽn zems tõog ning bãmb sẽn na n wilg yãmbã, la a wa sẽn zems bãmb sẽn na n kao bʋʋdã to-to n kõ yãmbã. Ra bʋdg-y goabg bɩ rɩtg n bas bũmb ning bãmb sẽn na n yeel yãmbã ye.

12Ned sã n maan tɩtaam n kɩɩs maan-kʋʋd ning sẽn be beenẽ n maand Sẽn-Ka-Saab tʋʋmdã ne bʋ-kaoodã n ka sak n maan wa b sẽn yeelã, b tog n kʋʋ nin-kãngã! Woto, yãmb na n yiisa wẽngã Israyɛll nebã sʋka.

13Dẽ, nebã fãa na n wʋmame n zoe rabeem, la bãmb kõn leb n maan tɩtaam ye.»

14Yãmb sã n wa tɩ kẽ tẽng ning Sẽn-Ka-Saab sẽn yaa yãmb Wẽnnaamã sẽn kõ yãmbã pʋg n soog-a n zĩndi, n yeele: «Tõnd data rĩm t'a soog tõnd wa buud nins sẽn gũbg tõndã,»

15yaa ned ning Sẽn-Ka-Saab sẽn yaa yãmb Wẽnnaamã sẽn na n yãkã n tog n yɩ yãmb dĩma. Yaa yãmb saam-biisã sʋk la y na n yãk ned t'a lebg y rĩmã. Yãmb ka tog n yãk sãan sẽn ka yãmb buudã ned t'a yɩ yãmb naab ye.

16Yẽnda ka tog n tall wiid wʋsg ye, sẽn na n yɩlẽ t'a ra wa tall nebã n leb Ezɩpt soolmẽ, a sẽn tar wiid wʋsgã yĩng ye. Bala, Sẽn-Ka-Saab yeela yãmb tɩ y ra leb n tũ so-kãng yɛs ye.

17Yẽnda ka tog n peeg pagb wʋsg tɩ b wa kɩt t'a bʋdg ye. La a ka tog n tall wanzuri ne sãnem wʋsg me tɩ loog ye.

18Rĩmã sã n wa zĩnd a naamã geer zugu, bɩ a kɩt tɩ Leevi buudã wa ne tõogã sebre, t'a kɩt tɩ b gʋls tõ-kãng sebr a to zug yẽnda mengã yĩnga, tɩ yɩ tõogã sebr a to.

19Yẽnda tog n tara tõogã sebrã a nengẽ, n karemd-a daar fãa n tãag a yõor tɛka, sẽn na n yɩlẽ n zãms tɩ zoe Sẽn-Ka-Saab sẽn yaa yẽnda Wẽnnaamã, la a sak tõodã goamã fãa, ne a no-tũud-kãens fãa, la a ning-b b nao-kẽndr zugu,

20sẽn na n yɩlẽ t'a ra wa wuk a meng ne a saam-biisã n bʋdg goabg bɩ rɩtg n bas tõ-kãensã ye. Woto, yẽnda ne a kambã na n paama yõ-woko, Israyɛll soolmã pʋgẽ.

← Chapter 16 Jump to: Chapter 18 →