Deuteronomy 7

Mossi MPBU (WẼNNAAM SEBRE 2014)

← Chapter 6 Jump to: Chapter 8 →

1Sẽn-Ka-Saab sẽn yaa yãmb Wẽnnaamã sã n wa tall yãmb n tɩ kẽes tẽng ning yãmb sẽn na n soogã pʋgẽ, bãmb sã n wa rig buud wʋsg nins sẽn be f taoorã sẽn yaa Hɛt-rãmbã ne Girgaaz-rãmbã la Amoor-dãmbã ne Kana-rãmbã la Ferɛɛz-rãmbã ne Hevi-rãmbã la Zebuuz-rãmbã, buud a yopoe wã sẽn yaa wʋsg n tar pãng n yɩɩd yãmbã,

2Sẽn-Ka-Saab sẽn yaa yãmb Wẽnnaamã sã n wa kɩt tɩ y tõog bãmba, bɩ y sãam-b zãnga. Ra maan-y kaool ne bãmba, la y ra zoe b nimbãaneg ye.

3Ra maan yi-kãadem ne bu-bãmb ye. Da rɩk f bi-pugl n kõ bãmb tɩ b maan b pag ye. La ra peeg bãmb bi-pugl n kõ f kamb tɩ b maan b pag ye.

4Bala, b na n kɩtame tɩ yãmb kambã bas maam n tɩ tũ wẽnnaam-dãmb a taaba. La Sẽn-Ka-Saab sũur na n puuga ne yãmb tɩ b sãam yãmb tao-tao.

5Ad yãmb sẽn na n maan bãmb bũmb ninga: Yãmb na n wã b tẽn-kugã la y kɛ b ra-lugdsã, la y yõog b bõn-naandsã b sẽn peesã bugum.

6Bala, yãmb yaa buud sẽn welg toor Sẽn-Ka-Saab sẽn yaa yãmb Wẽnnaamã yĩnga. Sẽn-Ka-Saab sẽn yaa yãmb Wẽnnaamã yãka yãmb buud nins sẽn be tẽngã zugã sʋk tɩ y yɩ bãmb nebã.

7Ka yãmb sẽn yaa wʋsg n yɩɩd buud a taabã fãa wã yĩng la Sẽn-Ka-Saab sẽn nong yãmb n yãk yãmbã ye. Sɩda, yãmb yaa bilf n yɩɩd buud a taabã fãa.

8Yaa Sẽn-Ka-Saab sẽn nong yãmbã yĩnga, la yaa bãmb sẽn dag n dat n pids b pʋlengã ne y yaab-rãmbã yĩng la Sẽn-Ka-Saab sẽn yiis yãmb yembdã pʋgẽ ne nug sẽn tar pãngã, n fãag yãmb Faarõ sẽn yaa Ezɩpt rĩmã nugẽ wã.

9Bɩ y bãng tɩ Sẽn-Ka-Saab sẽn yaa yãmb Wẽnnaamã n yaa Wẽnnaam menga. Bãmb yaa sɩd Wẽnnaam. Bãmb pidsda b kaoolã, n nong neb nins sẽn nong bãmb la b sakd bãmb tõodã hal tɩ ta zamaan tusri.

10La bãmb sɩbgda neb nins sẽn kis-b bãmbã, n menesd bãmb tao-tao. Bãmb ka kaoosd n sɩbg bãmb ye. Bãmb sɩbgda bãmb tao-tao.

11Dẽ yĩnga, bɩ y gũus neer n sak tõodã la minindã ne no-tũuds nins mam sẽn kõ yãmb dũndã wã.

12Yãmb sã n kelg tõ-kãensã n sak bãmba, Sẽn-Ka-Saab sẽn yaa yãmb Wẽnnaamã na n pidsa nonglem kaool ning bãmb sẽn dag n maan ne yãmb yaab-rãmbã.

13Bãmb na n nonga yãmba, b na n ning-y-la barka, n kɩt tɩ y lebg wʋsgo. Bãmb na n kɩtame tɩ y kambã paam barka, la b kɩt tɩ y tẽngã bõn-koaadl ne ki wã, la y reezẽ rãamã ne y kaamã, la y rũm-bɛdã ne y rũm-bãoonegã kamb zĩnd bark tẽng ning bãmb sẽn dag n wẽen n yeel y yaab-rãmbã tɩ b na n kõo bãmbã pʋgẽ.

14Yãmb na n paama bark n yɩɩd buud a taabã fãa. B ka na n yãnd rao bɩ pag yãmb sʋk t'a yaa kiiri, wall rũms sẽn yaa kiir y rũmsã sʋk me ye.

15Sẽn-Ka-Saab sẽn yaa yãmb Wẽnnaamã na n zãag-y-la ne bãas buud fãa. Bãmb ka na n kɩt tɩ Ezɩpt bã-wẽns nins yãmb sẽn mi wã yõk yãmb ye. Bãmb na n kɩtame tɩ b yõk neb nins sẽn kis-b yãmbã.

16Fo na n sãama buud nins fãa Sẽn-Ka-Saab sẽn yaa fo Wẽnnaamã sẽn na n kɩt tɩ f tõogã. Ra zoe b nimbãaneg ye. Ra tũ-b wẽnnaam-dãmbã ye. Bala, na n yɩ bẽdg fo yĩnga.

17Yãmb sã n wa yeel y sũurẽ: «Bu-bãmbã yaa wʋsg n yɩɩd tõndo, tõnd ka tõe n tõog-b ye.»

18Bɩ y ra zoe bãmb ye. Tẽeg-y bũmb ning Sẽn-Ka-Saab sẽn yaa yãmb Wẽnnaamã sẽn dag n maan Faarõ ne Ezɩpt nebã fãa wã yelle.

19Yaa to-kãsems nins yãmb sẽn yãndã, ne bãn la bõn-bãnã, Sẽn-Ka-Saab sẽn yaa yãmb Wẽnnaamã pãngã ne b nugã sẽn zẽk n yiis yãmb be wã. Yaa woto la bãmb na n maan buud nins fãa yãmb sẽn zoetã.

20Sẽn paase, Sẽn-Ka-Saab sẽn yaa fo Wẽnnaamã na n kɩtame tɩ kãnenkãas wãb neb nins sẽn ket n vɩ n solgd n dat n põsã hal tɩ b wa menem zãnga.

21Ra zoe-y bãmb rabeem ye. Bala, Sẽn-Ka-Saab sẽn yaa yãmb Wẽnnaamã sẽn be yãmb sʋkã yaa Wẽnnaam kãsenga, la b seka zoeese.

22Sẽn-Ka-Saab sẽn yaa yãmb Wẽnnaamã na n diga bu-kãens yãmb taoor bilf-bilfu. Yãmb ka na n tõog n sãam bãmb fãa wakat a yembr ye. Sã n ka rẽ, we-rũmsã na n lebga wʋsg n yɩɩd yãmba.

23Sẽn-Ka-Saab sẽn yaa yãmb Wẽnnaamã na n sõnga yãmb tɩ y tõog-ba. B na n kɩtame tɩ yɛɛsg yõk bãmb hal tɩ b wa sãam zãnga.

24Bãmb na n sõnga yãmb tɩ y tõog bãmb rĩm-dãmbã, la yãmb na n kɩtame tɩ b yʋʋr menem tẽng zugu. Bãmb ned baa a yembr ka na n tõog n yals n zab ne yãmba, hal tɩ yãmb wa sãam-b zãnga.

25Yãmb na n yõoga bãmb wẽn-naandsã bugum. Ra zoe-y bõn n wʋk wanzuri wã ne sãnemã sẽn be wẽn-naandsã zutã, tɩ wa lebg bẽdg ne yãmb ye. Bala, bõn-kãens yaa yel-beed ne Sẽn-Ka-Saab sẽn yaa yãmb Wẽnnaamã.

26Ra tall-y bũmb sẽn yaa yel-beed n kẽ y roogẽ n wa paam kãab-beed wa bãmb ye. Yãmb na n geelga bãmb wa yel-beed la yel-wẽnse, bala b kãaba bãmb wẽnga.

← Chapter 6 Jump to: Chapter 8 →