Proverbs 11

Mossi MPBU (WẼNNAAM SEBRE 2014)

← Chapter 10 Jump to: Chapter 12 →

1Zãmb zɩslem makdg yaa yel-beed Sẽn-Ka-Saab nifẽ. La b sũur nooma ne pʋ-peelem zɩslem makdga.

2Wuk-m-meng sã n wa, yaa paoogr n pʋgda, la sik-m-meng soab tara yam.

3Nin-tɩrg burkĩndlim n tɛt-a, la sɩlem soab sɩlmã n wãad-a.

4Arzɛk ka tõe n sõng ned sũ-puugrã daar ye, la tɩrlem fãagda ned ne kũum.

5Burkĩn tɩrlem n manegd a soayã, la nin-wẽng wẽnem n lubd-a.

6Nin-tɩrs tɩrlem n fãagd-ba, la zãmb dãmbã yão-beedã n yõkd-b wa bẽdgo.

7Nin-wẽng sã n ki, bũmb ning a sẽn dag n tẽedã me sɛtame, la tẽeb ning a sẽn dag n tar ne a arzegsã me sãamdame.

8Nin-tɩrg paamda yolsg ne yel-pakre, la nin-wẽng n let yẽnda zĩigẽ n deeg toogo.

9Sẽn ka mi-a Wẽnd wãada a to ne a noor goamã, la nin-tɩrg bãngr n fãagd-a.

10Nin-tɩrs sã n tar sũ-noogo, tẽngã neb fãa naagd n kɩdemdame. Nin-wẽns sã n sãamdẽ, tẽngã neb fãa kaasda ne sũ-noogo.

11Nin-tɩrs bark yĩng kɩtdame tɩ tẽng lebgd kãsenga, la nin-wẽns no-goam wãada tẽnga.

12Sẽn paoogd-a a to yaa yam-kaalg soaba, la sẽn tar-a yam sĩndidame.

13Tẽn-kãn-ned pugsda yɛla, la sɩd soab luta yɛla.

14Tẽng sã n ka zã ne yam, a nebã sãamdame, la sagendb sã n yaa wʋsgo, tõogr beeme.

15Ned sã n dɩk sard ne sãana, a kõ a meng yelle. La sẽn zãgs-a sard dɩkr na n vɩɩmda ne bãane.

16Pʋg-sõng paamda ziiri, la pãens rãmbã paamda arzegse.

17Nin-sõng maanda a meng neere, la nin-toaag maanda a meng wẽnga.

18Nin-wẽng ka mi t'a ka na n dɩ a tʋʋmã yõod ye. La sẽn tʋmd-a tɩrlem tʋʋm na n paama keoore.

19N-yẽe! Tɩrlem maaneg rabda vɩɩm zĩigẽ, la wẽng maaneg rabda kũum zĩigẽ.

20Sẽn-Ka-Saab kisa tʋʋm-kɛg rãmbã, la b nonga sẽn kẽnd-a ne burkĩndi.

21Nin-wẽng ka tõe n ka paam sɩbgr ye, la nin-tɩrsã yagens na n paama fãagre.

22Pʋg-neer sẽn ka yam, wẽnda wa sãnem nugbĩng sẽn be kurkur yõorẽ.

23Nin-tɩrs sẽn dat yaa neer bala, la nin-wẽns sẽn gũud yaa sũ-puugr bala.

24Nina kõta wʋsg t'a paoong paasdẽ, tɩ nina bĩngd n ka kõtẽ t'a paoong sɛtẽ.

25Kõat na n paamame halɩ tɩ seke, la sẽn kõt-a koom me na n paama koom n yũ n tɩge.

26Ned sã n bĩngd bɩle n ka rat n yiisi, nebã kãabd-a-la wẽnga, la sẽn yiisd-a bɩle n koosdẽ paamda nebã barka.

27Sẽn baood-a n maan neer baooda barka, la ned sã n baood n maan wẽnga, wẽng n na n paam-a.

28Sẽn teeg-a arzɛk na n lʋɩɩme, la nin-tɩrg tɩlgda wa tɩɩg sẽn tobde.

29Ned sã n kẽesd zũnglg a meng zakẽ, a na n wa zĩnda zaalem, la yalem na n lebga yam soab yamba.

30Nin-tɩrg biis yaa wa vɩɩm tɩɩga, la yam soab paamda nebã.

31Nin-tɩrg sã n paamd a yaood tẽng zug ka, nin-wẽng ne yel-wẽn-maand me kõ paam yaood n yɩɩd sɩda.

← Chapter 10 Jump to: Chapter 12 →