Proverbs 30

Mossi MPBU (WẼNNAAM SEBRE 2014)

← Chapter 29 Jump to: Chapter 31 →

1Woto yaa a Yake biig a Agʋʋr goamã, a Agʋʋr goma ne a Itiyɛlle, yaa ne a Itiyɛll ne a Ukalle.

2Sɩda, mam yaa yalem n yɩɩd nebã fãa, la m ka tar ninsaalbã yam baa bilf ye.

3Mam ka zãms tɩ bãng yam ye, la mam ka tar pʋ-peelem dãmbã bãngr ye.

4Ãnda n dʋ yĩngr n lebg n sigi? Ãnda n kogl a nus n kok pemsem? Ãnda n yondg koom a fuugẽ? Ãnda n naan tẽn-gãongã? A soab yʋʋr la a bõe, la a biigã yʋʋr la a bõe? Fo sã n miẽ, bɩ f togs-ma.

5B makame n mik tɩ Wẽnnaam goamã fãa yaa sɩda, la a yaa gãong neb nins sẽn baood zĩ-lilldg bãmb nengẽ wã yĩnga.

6Da paas bũmb Wẽnnaam goamã zug tɩ b wa zab ne-fo, la b ges-f wa zĩrẽ-be-ned ye.

7Mam Wẽnnaam, m kot-y-la bũmb a yiibu. Kõ-y-b maam tɩ m na n ket n vɩ:

8Zãag-y-m ne zãmbo, la ne zĩrẽ-beedo. Da bas-y tɩ m yɩ naong soaba, la y ra bas tɩ m yɩ arzɛk soab me ye. Bɩ y kõ maam sẽn sekd m dɩɩbo,

9tɩ m dɩ-n-tɩkã pʋgẽ, bɩ m da wa yeel tɩ m ka mi yãmb a Sẽn-Ka-Saabo, wall tɩ m naongã ra wa kɩt tɩ m zu, n paoog yãmb a Wẽnnaamã yʋʋrã ye.

10Ra kãneg tʋmtʋmd ne a zu-soab ye, ka rẽ, a sã n kãab-fo, tũud-f lame.

11Neb n be n kãabd b ba-rãmb wẽnse, la b ka ningd b ma-rãmb bark ye.

12Neb n be n yetẽ tɩ b yaa yɩlma, n yaool n nan ka paam pekr ne b rẽgdã ye.

13Neb n be n ka nand-b taaba, n get-b ne wuk-m-menga.

14Neb n be tɩ b yẽnã yaa wa zabr sʋʋse, tɩ b yɛyã yaa wa sʋʋse, n dat n wãb nimbãan-dãmbã, ne naong rãmbã, n menes-b dũniyã zugu.

15Dendeoog n tar a kom-pugli a yiibu: «A kõ maam, ne a kõ maam.» Bũmb a tãab n be n ka tɩgd ye, la naasẽ soabã zɩ n yeel tɩ sekame ye!

16Yaa kɩɩm-kulgu, la pʋg-kiiri, la tẽn-koɛɛng sẽn dat koom, la bugum sẽn zɩ n yeel tɩ «Sekame» ye.

17Ned nif sã n sãag a ba, la a ka rat n sak a ma noore, ko-soog gãabd n na n feo yẽnda nini, la yɩbr-bi n na dɩ yẽnda nemdo.

18Yel-soalem a tãab n be n yɩɩd mam tagsgo, la a naas n be mam sẽn ka wʋmd b võor ye:

19«Yaa pa-nand-tugr sẽn tũud sor ning yĩngr n yɩgda, waaf sẽn tũud sor ning pĩig zugu, koom koglg sẽn tũud sor ning ko-kãsengã zugu, la rao sẽn tũud sor ning n kẽngd pʋg-sad nengẽ.»

20Pʋg-yoodr manesem yaa a woto: Yẽnda maanda wẽng n bas n yetẽ t'a ka maan bũmbu, tɩ yaa wa a sẽn dɩ n sɛ, n bas n yẽes a noore.

21Bũmb a tãab n be n tõe n kɩt tɩ dũniyã rigimdi, la a naas n be dũniyã sẽn ka tõe n sak n deeg ye:

22Yaa yamb sẽn lebg rĩma, yalem sẽn paamd n dɩt n tɩgda,

23pʋg-sad b sẽn kis sẽn paam sɩda, la yem-poak sẽn deeg a zu-soben-poak zĩiga.

24Bõn-vɩɩlɩ a naas n be tẽng zug n paoodẽ, n yaool n tar yam:

25Yaa gũuri. Bãmb ka pãng ye, la sɩpaolgo b tigsda b rɩɩbo.

26Yaa kɩɩse. Bãmb pãngã paoodame, la b maanda b yiy pĩis bogdẽ.

27Yaa sʋyã. Bãmb ka tar naab ye, la b yaool n yɩgda sull-sulli.

28La bãngenlegsr f sẽn tõe n gãda f nugẽ, t'a yaool n be rĩm-dãmb zagsẽ.

29Bũmb a tãab n be, m yet t'a naase, tɩ b sã n kẽnd bɩ be ra-sãnde.

30Yaa gɩgemde. Rũmsã fãa sʋka, yaa yẽnda n yaa gãndaoogo. A ka targd bũmb baa fɩ taoor ye.

31Yaa no-raoog sẽn dong a zugu, n gengd no-yãans sʋka, la boɛɛga, la rĩm sẽn lʋɩ a tãb-biis taoor n kẽnda.

32Fo sã n dag n maana yalemdo, n baood n zẽk f menga, n lebg n tagse, bɩ f pĩ f noore.

33B sã n fɩr bĩis-naare b yãkda kaam, b sã n wẽ ned yõore a yũnda zɩɩm, la sũur sã n yiki, wata ne zabre.

← Chapter 29 Jump to: Chapter 31 →