Proverbs 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1M biiga, fo sã n dɩk sard n yeel f to t'a samdã foom n na n yao, wall f sã n dɩk sard tɩ f na n yaoo sãan samde,

2n wa mik tɩ f gom n yõka f menga, fo noorã goam sã n yõk-f wa bẽdgo,

3ad fo sẽn tog n maan n fãag f menga. Fo sẽn lʋɩ f zoa wã nugẽ wã yĩnga, kẽng n tɩ yãnd f zoa wã, n sik f meng n bõos-a ne pẽdgre, n yeel-a t'a bas f taale.

4Da bao gõeem bɩ suusg baa bilf ye,

5Bɩ f fãag f meng wa walg sẽn fãag a meng tãoos nugẽ, la wa liuul sẽn tõog n fãag a meng tãoogẽ.

6Kʋɩɩma, kẽng n tɩ ges gũuri. Ges a sẽn maandã n dɩk yam.

7Bãmb ka tar naaba, la b ka tar taoor soaba, tɩ b sokd kãsem ye.

8La baoosgo, sɩpaolgo, bãmb tigsda b rɩɩbo. La bõn-bɩʋʋng wakate, b wʋkda b rɩɩb n bĩngdẽ.

9Kʋɩɩma, fo na n pa f gãagẽ hal tɩ ta wakat-bʋgo? Wakat-bʋg la f na n nek n yiki?

10Fo yetame tɩ f rat n gũsa bilfu, tɩ f na n suusa bilfu, n kalemd f nus n gãe.

11Woto, naong na n soos n linga foom wa wagdre, la pɛtã na n linga foom wa fãada.

12Sẽn gomd-a zĩrẽ goam ka nin-tɩrg ye, a yaa nin-yaalga.

13Yẽnda wẽgsda a nin n gomd ne a nao, la a bilsd ne a nusi.

14Yẽnda sũurã pida ne tʋʋm-dẽgdo, yẽnda tagsda wẽng maaneg wakat fãa, la yẽnda wata ne zaba.

15Yaa rẽ n kɩte, tɩ sãoongã na n wa ling-a. La yẽnda na n sãamame tɩ tɩɩm kaẽ ye.

16Bũmb a yoob n be Sẽn-Ka-Saab sẽn kisi, la a yopoe soabã yaa yel-beed bãmb nifẽ.

17Yaa tɩtaam-gesgo, ne zelemd sẽn gomd zĩrẽ goamã, la nus sẽn daagd bʋʋm soab zɩɩm,

18n paas sũur sẽn tagsd n dat n maan wẽnga, ne nao sẽn yãgd n na n tɩ maan wẽnga,

19la kaset zĩrẽ soab sẽn yagd zĩrẽ, ne ned sẽn wat ne zab ba-biis ne taab sʋka.

20M biiga, sak f ba noore, la f ra zãgs f ma zãmsg ye.

21Bĩng zãms-kãens f sũurẽ wakat fãa, la f rɩk-b n pid f loorẽ.

22La gom-kãens na n yãaga foom f kẽnã pʋgẽ, la b na n gũu foom f gõeem wakate, fo sã n wa yik f gãagẽ, gom-kãens na n sagl-f lame.

23Bala, noyã yaa wa fɩtla, la zãmsgã yaa wa vẽenem, la remsgã ne keoogrã yaa vɩɩm sore.

24B na n gũu foom ne pʋg-yoogo, la ne pʋg-sãang sẽn gomd no-noom goamã.

25Bɩ f ra tʋlg pag a woto buud a neermã yĩng ye, la f ra bas t'a ninã gesg kɩt t'a ratmã kẽ-f ye.

26Bala, bur-gɩrg sekda pʋg-yoodr yaoodo, la pag sã n tar sɩd la a yood ne-fo, yaa f vɩɩmã la a rat n sãame.

27Ned tõe n sagla bugum a gɩfẽ t'a fuug ka rɩ bugum bɩ?

28Bɩ ned tõe n taba bug-saall tɩ bugmã ka yõog a naoã?

29A yaa woto me ne ned sẽn dood a to paga. Ned ning sẽn na n sɩɩs-a a to pag paamda sɩbgre.

30Kom sã n tar ned t'a zuk rɩɩb n na n dɩ, bɩ b ra kisg-a t'a yaa wagdr ye,

31La b sã n ling yẽnda n yõke, a na n yaoo bũmbã a sẽn dɩkã naoor a yopoe. La a na n kɩsa bũmb ning fãa a sẽn tar a zakẽ wã.

32La sẽn yood-a ne a to pag yaa yam-kaalg soaba. Yaa sẽn dat-a n sãam a meng vɩɩm n maand a woto.

33Yẽnda na n paama pãbr la paoogre, la a yãndã ka na n tol n sɛ ye.

34Bala, pʋg-sɩd sũ-kiir wata ne a sũ-puug-kãsenga, la yẽnda sũ-dokrã daare, nimbãan-zoeer ka na n zĩnd ye.

35La a ka na n sak yaood ye. Ba b sã n kõ yẽnda kũun wʋsgo, a ka na n tol n sak ye.

← Chapter 5 Jump to: Chapter 7 →