Proverbs 8

Mossi MPBU (WẼNNAAM SEBRE 2014)

← Chapter 7 Jump to: Chapter 9 →

1Yam boondame, la bãngr zẽkda a koɛɛga.

2Yam yasa kunkubã zutu, la soayã noyã, ne so-palen-paasẽ,

3la a yas tẽngã rignoyẽ, ne so-badsẽ n kelemdẽ n yetẽ:

4«Ninsaalba, yãmb la m sẽn boondã! Ãdem biisi, yaa yãmb la m gomd ne!

5Yãmb a zɩtba, bao-y bãngre! La yam-ka-sek-b rãmba, bao-y yam.

6Kelg-y neere, bala m tara koe-kãseng n na n togs-yã, la mam noorã na n togsa tɩrlem goamã.

7Bala, mam noorã gomda sɩda, la gom-wẽns goam yaa yel-beed ne maam.

8Mam noorã goam fãa yaa tɩrse, la sɩlem bɩ gom-yood ka be b sʋk ye.

9B fãa yaa vẽenes ne ned ning fãa sẽn tar-a yam, la ned sã n paam bãngre, a mikdame tɩ mam goamã yaa sɩda.

10Sak-y m demsgã la y bas wanzuri, bao-y bãngr n yɩɩd sãnem halaale.

11Bala, maam a yam tara yõod n yɩɩd kĩndi halaale, la bõn-sõama ba a yembr ka tõe n dɩk n mak ne maam ye.»

12Maam a yam bee gũus-m-meng pʋgẽ, mam miime tɩ tags n paam bãngre.

13Sẽn-Ka-Saab zoees yaa wẽng kisgri. Maam a yam kisa tɩtaam ne wuk-m-menga, la tʋʋm-wẽnse, ne zĩrẽ.

14Maam n kõt saglg la m wilgd sẽn yaa neere. Yaa maam la bãngre, la pãng yaa maam n so.

15Yaa maam la nanambsã tar n dɩt b naam, la yaa maam la bʋ-kaoodbã tar n vigind tõod sẽn yaa tɩrse.

16Yaa mam maasem yĩng la nanambsã so b soolmã, tɩ kãsem-dãmbã ne bʋ-kaoodbã kaood bʋʋdã tɩrga.

17Mam nonga sẽn nong-b maamã. La sẽn baood-b maamã na n yãnda maam.

18Arzegs ne ziir bee ne maam, la paoong sẽn ka sɛta, ne tɩrlem.

19Mam biisã yaa sõama n yɩɩd sãnem, b yɩɩda sãnem halaale. La b tara yõod n yɩɩd wanzuri halaale.

20Mam kẽnda tɩrlem sor zugu, la yaa pʋ-peelem soay pʋsẽ la m kẽnda.

21Mam dat n kõo sẽn nong-b maamã paoong tɩ b sooge, la m pids b rotã ne arzegse.

22Hal kʋdemd wẽndẽ, Sẽn-Ka-Saab reng n naana maam pipi, n yaool n naan bũmbã fãa.

23Bãmb naana maam tɩ bũmb baa fɩ nan ka be ye. B naana maam hal sɩngr wakate, sẽn deng dũniyã sẽn nan ka naane.

24B roga maam tɩ ko-kãsemsã rag n nan ka be ye, la rẽ tɩ kʋɩls sẽn bund koom me rag n nan ka be ye.

25La bãmb sẽn wa n dog maamã, tɩ b nan ka naan tãmsã ye, la rẽ tɩ kunkubã me rag n nan ka be ye.

26Sẽn-Ka-Saab sẽn wa n naan maamã tɩ tẽn-gãongã ne wetã rag n nan ka be ye, la rẽ tɩ b rag n nan ka naan pipi tom-beell ba a yembr ye.

27Bãmb sẽn wa n yɛdgd sa-gãongã tɩ mam dag n zoe n beeme. B sẽn wa n kargd zĩ-zulumsã ko-ninã toadgã tɩ mam dag n beeme.

28Bãmb sẽn wa n kɩt tɩ sawatã tigimd yĩngrã, la b kɩt tɩ zĩ-zulumsã ko-ninã pus n yi ne pãngã,

29Sẽn-Ka-Saab sẽn wa n yãkd ko-kãsengã todsã, n yeel ko-kãsengã tɩ b ra long n yi b todsẽ wã, b sẽn wa n na n yẽbg dũniyã n ning-a a zĩigẽ wã,

30mam dag n bee bãmb sɛɛgẽ wa tʋʋmdã soaba, n kõt bãmb sũ-noog daar fãa, n kɩdemd b taoor wakat fãa.

31Mam dag n deemda dũniyã bãmb sẽn naanã zugu, la m sũurã rag n nooma m sẽn vɩ ninsaalbã sʋkã yĩnga.

32Dẽ wã yĩnga, m kamba, kelg-y maam! Neb nins sẽn sakd-b mam saglgã paamda sũ-noogo.

33Sak-y m demsgã n lebg yam dãmba, la y ra zãgs-a ye.

34Sẽn kelgd-a maam paamda sũ-noogo. Yẽnda bee mam dignoorẽ beoog fãa, yẽnda yɛsa mam digno-koakẽ n gũudẽ.

35Bala, ned sã n paam maam, a paama vɩɩm, la a paamda Sẽn-Ka-Saab nonglem.

36La ned sã n beeg maam, a maanda a meng wẽnga, la sẽn kis-b maamã nonga kũum.

← Chapter 7 Jump to: Chapter 9 →