John 12

Marwari Bible

1फसह तैंवार ऊं छह दिन पैला इज यीसु बैतनिय्याह में आया, जठै वो लाजर नै मरयोड़ौ मांय ऊं जीवतौ करयौ हो।

2उठै उणौ यीसु रै वास्तै खाणौ तैयार किनो, अर मारथा सेवा करण मांय लागोड़ी ही, अर लाजर उण में ऊं एक हो, जिकौ यीसु रै साथै खाणौ जीमण वास्तै बैठा हां।

3तद मरियम बरतन मांय चौखौ अर घणौ मूंगो जटामासी रौ अन्तर लेयनै यीसु रै पगां माथै चढ़ायौ, अर आपरा बालों ऊं पगां नै पूंछियां। अर अन्तर री सुगंध ऊं पूरौ घर खुसबुदार हो गियौ।

4पण उणरै चेलौ में ऊं यहूदा इस्‍करियोती नाम रौ एक चेलौ जे यीसु नै पकड़ाणै वाळौ हो, कैवण लागौ,

5“ओ अन्तर तीन सौ चांदी रै सिक्‍को में बेचनै इण अन्तर री कीमत गरीब लोगां रै मांय क्यूं नीं बांट दी?”

6साचांणी मांय उणनै गरीबो री फीकर कोनीं ही। वो तो एक चोर हो। अर सैंग चेलौ री रूपिया री थैली उण खनै इज रैवती। घणी बार आपरै कांम रै वास्तै वो उण मांय ऊं रूपिया काढ़ देतो।

7यीसु कयौ, “इणनै कीं नीं कैवणौ। आ म्हनै गाड़े जावण री तैयारी खातर ओ करयौ है।

8क्यूंकै गरीब तो थोरै साथै हमेसां रैवै है, पण म्हैं हमेसां थांरै साथै कोनीं रैवूंला।”

9जद यहूदियो री घणी भीड़ जांण लियौ की वो उठै है, तो वे नीं कैवल यीसु रै कारण आया पण इण वास्तै की लाजर नै देखे, जिणनै यीसु मरयोड़ौ मांय ऊं जीवतौ करयौ हो।

10तद परधान याजकौ लाजर नै ई मारणै रौ मतो कर लियौ।

11क्यूंकै उणरै कारण घणा यहूदी जाता रिया, अर यीसु माथै विसवास करयौ।

12दूजै दिन घणा लोग जिकौ तैंवार में आया हा, उणौ ओ सुणयौ, की यीसु यरुसलेम में आय रिया है।

13इण वास्तै वे खजूर री डाळियो ली, अर यीसु ऊं मिलण खातर निकळिया। अर पुकारनै लागा, “होसना! धन्य है इजरायल रा राजा, जिकौ परभु रै नाम ऊं आवै है।”

14जद यीसु नै गधी रौ एक बछेरियां मिळियां, तो वो उण माथै बैठ गिया, ज्यूं धरम सास्तर मांय लिख्योड़ौ हो,

15“हे सियोन री परजा डरौ मती, क्यूंकै थौरो राजा गधी रै बछेरियां माथै घणी नरमाई ऊं बैठनै थांरै खनै आय रिया है।”

16उणरै चेलौ आ बात पैला नीं समझया हा, पण जद यीसु री महिमा परगट होई तो उणनै याद आई की ऐ बातां उणरै बारै में लिख्योड़ी, अर लोगां नै उण ऊं इण तरैह रौ व्यवहार करयौ हो।

17तद भीड़ रै उण लोगां गवाई दी, जिकौ उण वेळा उणरै साथै हा जद लाजर नै कबर मांय ऊं बुलायनै मरयोड़ौ मांय ऊं जीवतौ करयौ।

18इण कारण लोग उण ऊं मिलनै आया हा क्यूंकै वे इण अनोखे चमतकार रै बाबत सुण्यौ हो।

19तद फरीसी आपस मांय बात करी के “अपां तो हार ग्या। देखौ पूरी दुनिया उणरै लारै व्‍हैगी।”

20जिकौ लोग उण तैंवार में आराधना करणै आया हा उणमे ऊं केई यूनानी हा।

21वे फिलिप्पुस नै जिकौ गलील रै बैतसैदा रौ रैवण वाळौ हो उण ऊं मिळियौ अर कयौ, “भाई सा म्हौ नै यीसु ऊं मिलनौ है।”

22फिलिप्पुस आयनै अद्रियास ऊं कयौ, तद अद्रियास अर फिलिप्पुस जायनै यीसु नै कयौ।

23इण कारण यीसु उणौ नै कयौ, “वो वगत आयग्यौ है की म्हैं मिनख रै बेटे री महिमा होवै।

24म्हैं थौरे ऊं साची बात कहूं, की जठै तांई गेहूंं रौ दाणौ जमीं माथै पड़न मर नीं जावै, उठै तांई वो ऐकलौ रैवै है, पण जद वो मर जावै है, तो घणा फळ लावै है।

25जे इण संसार मांय कोई आपरै जीव ऊं परैम राखैला तो वो उणनै गुमांय दैला। अर जे इण जगत में आपरै प्रांण ऊं परैम नीं राखैला, वो अनत जीवन रै सारू उणरी रकसा करैला।

26जे कोई म्हारी सेवा करणी चावै, तो वो म्हारै लारै वहीर व्‍है जावै, अर जठै म्हैं हूं, उठै म्हारा चेला भी होवैला। जे कोई म्हारी सेवा करै, तो पिता परमेसर उणरौ आदर करैला।

27“अबै म्हारौ मन घणौ उदास है। इण वास्तै अबै म्हैं कांई कहूं, ‘हे पिता, म्हनै इण घड़ी ऊं बचाय ले’? नीं, क्यूंकै म्हैं इण खातर इण घड़ी पूगयौ हूं।

28हे पिता, आपरै नाम री महिमा हो।” तद आ सरग ऊं आवाज आई, “म्हैं म्हारी महिमा दिखाई है, अर वळै दिखाऊंला।”

29जद जे लोग ऊभा सुण रिया हा, उणौ कयौ “बादळो गरजयो।” दूजौ कयौ, “कोई सरगदूत उण ऊं बोलियौ।”

30इण कारण यीसु कयौ, “ओ सबद म्हारै वास्तै कोनीं, पण थौरे भलाई वास्तै आयौ है।

31अबै इण जगत रौ न्याव होवै है, अबै इण जगत रै राजा सैतान नै बारै निकाळ दियौ जावैला।

32अर जद म्हैं धरती माथै ऊं उठायौ जाऊंला, तद हरैक मिनख रौ ध्यांन म्हारी तरफ खींचुला।”

33ऐड़ी बात कैन उणै ओ परगट कर दियौ, की उणरी मौत कीकर होवैला।

34इण कारण लोगां उणनै कयौ, “म्हौ कायदा री आ बात सुणी है, की मसीह हमेसां रैवैला, फिर थूं ओ कीकर कैवै है, की मिनख रै बेटे नै ऊंचै माथै चढ़ायौ जाणौ जरुरी है? ओ मिनख रौ बेटौ कुण है?”

35यीसु उणौ नै कयौ, “चांदणौ थोड़ी वेळा तांई थांरै बीच मांय है। जठै तांई चांदणौ थांरै भेळौ है तद तांई चालता रौ, ऐड़ौ नीं व्‍है के अंधारौ थांनै घेर ले। जिकौ अंधारा मांय चालै उणनै ठाह कोनीं की वो कठीनै जावै है।

36जठै तांई चांदणौ थोरै साथै है, चांदणै माथै विसवास राखौ, ताकी थै चांदणै री औळाद बणौ।” ऐ बातां कैन यीसु उठै ऊं जाता रिया अर अपणै आप नै वांरै ऊं लूकाय दिया।

37वांरी आंख्यां रै सांम्ही इता चमतकार करिया, पछै ई उणौ नै उण माथै विसवास कोनीं करयौ।

38ताकी यसायाह भविसयदाता रौ वचन पूरौ होवै जिकौ उणै कयौ हो, “हे परभु, म्हारै समाचार रौ कीण विसवास करयौ है? आपरा ताकतवर हाथ कीण माथै परगट होया है?”

39इण खातर वे भरोसौ नीं कर सकै, क्यूंकै यसायाह ओ भी कयौ है,

40“परमेसर वांरी आंख्यां नै आंधी, अर मन नै कठोर कर दियौ है, कठैई ऐड़ौ नीं व्‍है के वे आपरी आंख्यां ऊं देखे, अर मन ऊं समझै, अर फिरै, पछै म्हैं वांनै सावळ करूं।”

41यसायाह ऐ बातां इण वास्तै कही, की उणै यीसु री महिमा नै देखी, अर उणै उणरै बारै में बातां किनी।

42तो ई मुखियां में ऊं घणौ नै उण माथै विसवास करयौ, पण फरीसियों रै कारण खुले में नीं मानता हा, की ऐड़ौ नीं होवै की वे पराथना घर मांय ऊं निकाळ दे।

43क्यूंकै मिनखौ री तरफ ऊं सौभा उणौ नै परमेसर री तरफ ऊं सौभा ऊं करती घणी चौखी लागती ही।

44यीसु हेलौ करनै कयौ, “जे कोई म्हारै माथै विसवास करै, वो म्हारै माथै ही नीं, पण म्हनै भेजणे वाळै माथै विसवास करै है।

45अर जिकौ म्हनै देखे है, वो म्हनै भेजणे वाळै नै देखे है।

46म्हैं जगत मांय चांदणौ होयनै आयौ हूं, ताकी जे कोई म्हारै माथै विसवास करै, वो अंधारै मांय नीं रैवैला।

47“जे कोई म्हारी बातां सुणन नीं मांनै, तो म्हैं उणनै दोसी कोनीं ठैराऊं, क्यूंकै म्हैं जगत नै दोसी ठैराणै कोनीं, पण जगत रौ उद्धार करणै आयौ हूं।

48जिकौ म्हारौ कदर नीं राखै अर म्हारौ वचन नीं सुणै उणनै दोसी ठैराणै वाळौ तो एक है, जिकौ वचन म्हैं कयौ, वे इज आखरी रै दिन मांय उणनै दोसी ठैरावैला।

49क्यूंकै म्हैं म्हारी इछा ऊं बातां कोनीं कही, पण पिता जिकौ म्हनै भेज्यौ है उणीज म्हनै आग्या दीनी है, की कांई कांई कहूं, अर कांई कांई बोलूं।

50अर म्हैं जांणूं हूं, की उणरी आग्या अनत जीवन री तरफ ले जावै है। इण खातर म्हैं जे कीं बोलूं हूं, वो जैड़ौ पिता म्हारै ऊं कयौ है वेड़ौ इज बोलूं हूं।”

← Chapter 11 Jump to: Chapter 13 →