John 4

Marwari Bible

1जद यीसु नै ठाह पड़ी, के फरीसी पंथ रा लोगां खनै आ बात पूगगी है, की यूहन्‍ना री ठोड़ घणाकर लोग यीसु खनै बतिस्मो लेवण अर चेला बणणै खातर आवै। यीसु खुद नीं पण वांरा चेला बतिस्मो देवता हा।

3इण खातर यीसु यहूदा री कांकड़ छोड़ नै गलील री कांकड़ मांय आयगा।

4मारग मांय उणानै सामरिया ऊं होयनै जावणौ हो।

5इण खातर वे सामरिया रै सुखार नगरी रै खनै उण जमीन माथै पूगिया जिकौ याकूब आपरै बेटे यूसुफ नै दीनी ही।

6अर याकूब रौ बेरौ ई उठीज हो। अतस यीसु मारग रा थाकयोड़ा हा अर इण खातर वे बेरा खनै ई बैठग्या। आ बात दोपार रै लगोलग होई।

7उणीज वेळा एक सामरी लुगाई पांणी भरणै आई, “तो यीसु उण खनै ऊं पीवण रौ पांणी मांगियो।”

8उण वेळा सैंग चेला नगरी मांय खाणौ मोल लेणे गियोड़ा हा।

9सामरी लुगाई कयौ, “थै तो यहूदी हो, पछै म्हारै सामरी लुगाई खनै ऊं पीवणा रौ पांणी कीकर मांगो हो?” उण वगत यहूदी लोग, सामरी लोगां रै साथै किणी तरैह रौ संबंध कोनीं राखता हा।

10यीसु जबाब दियौ, “जे थूं परमेसर रै वरदान नै जांणती, अर आ बात ई जांणती के ओ कुण है जिकौ थनै कैवै के ‘म्हनै पीवण रौ पांणी दे,’ तो थूं उण ऊं मांगती, अर ओ थनै जीवन रौ जळ देतो।”

11सामरी लुगाई कयौ, “हे मालिक, थांरै खनै तो पांणी भरणै तो कीं नीं है अर ओ बेरौ ऊंडो है, पछै ओ जीवन रौ जळ थांरै खनै कीकर आवैला?

12थूं कांई म्हौरै वडेरा याकूब ऊं बढ़ौ है, जिकौ म्हौ नै ओ बेरौ दियौ, अर वे खुद, वांरा टाबर अर उणौरै जिनावरां ओ पांणी पीनौ?”

13यीसु जबाब दियौ, “जिकौ ई इण पांणी नै पीवैला, वो पाछौ तिरसां हो जावैला।

14पण जे कोई उण पांणी में ऊं पीवैला जिकौ म्हैं उणनै देवूंला, वो वळै कदैई तिरसां नीं व्‍हैला, पण वो पांणी म्हैं उणनै देवूंला, वो उणमे एक झरनौ बण जावैला जे अनत जीवन रै सारू उमड़ तो रैवैला।”

15वां लुगाई कयौ, “हे मालिक, औ पांणी म्हनै ई दे ताकी म्हनै बार बार तिरस नीं लागै अर नीं पांणी भरणै इती आगी आऊं।”

16यीसु उणनै कयौ, “जा, थांरै घरधणी नै बुलायनै अठै ला।”

17लुगाई जबाब दियौ, “म्हारौ तो घरधणी है ई कोनीं।” यीसु कयौ, “हां, थूं हाव साची है जणै थूं कैवै के, ‘म्हारौ तो घरधणी है ई कोनीं।’

18अबै तांई थूं पांच घरधणी कर लिया अर जिण साथै थूं अबार रैवै वो ई थांरौ घरधणी कोनीं है। आ बात ई थूं साची कैवै है।”

19वां लुगाई कयौ, “हे मालिक, थै जरुर कोई भविसयदाता हो।

20पण म्हनै आ बात बताओ की थै यहूदी लोग क्यूं कैवौ हो के वो जगा जठै आराधना करणी चाईजै वो यरुसलेम में है। पण म्हैं सामरी लोग औ कैवौ हो के इण भाखर माथै म्हौरै वडेरा आराधना करता हां।”

21यीसु जबाब दियौ, “हे नारी, म्हारी बात रौ विसवास कर की अबै वो घड़ी आवण वाळी है की थै नीं तो इण भाखर माथै पिता परमेसर री आराधना करौला, नीं यरुसलेम में।

22थै सामरी लोग जिणनै नीं जांणौ, उणरी आराधना करौ हो, अर म्हौ यहूदी लोग जिणनै जांणौ हो उणरी आराधना करां हो, क्यूंकै उद्धार यहूदियो में ऊं है।

23पण तौभी वो वगत नैड़ौ है अर समझ लौ के आयग्यौ है, जिणमे साचा भगत परमेसर पिता री आराधना, आतमा अर सचाई ऊं करैला। क्यूंकै पिता आपरै सारू ऐड़ा इज भगतां नै सौधै है।

24परमेसर आतमा है, अर जरुरी है की वांरा भगत आतमा अर सचाई ऊं उण री आराधना करै।”

25लुगाई उणनै कयौ, “इतौ तो म्हैं जांणूं के मसीहा जिकौ चुणयोड़ौ है वो आवण वाळौ है। जद वो आवैला, तो अपांनै सगळी बातां समझा देवेला।”

26यीसु उणनै कयौ, “म्हैं वोहीज हूं जिकौ थांरै ऊं बात करूं हूं।”

27उणीज वगत उणरा चेला उठै आयगा, अर यीसु नै एक लुगाई ऊं बातां करता देखनै अचूम्बो करयौ पण कोई उण ऊं औ नीं पूछयौ, की “थूं कांई चावै है?” या “इण लुगाई ऊं कीण वास्तै बातां करौ हो?”

28पछै वां लुगाई बेरा माथै इज आपरौ मटको छोड़नै पाछी गांव में गी, वां जायनै सगळै लोगां नै कयौ,

29“आओ, एक मिनख नै देखौ, जिकौ म्हैं कांई कांई कांम करिया म्हनै सैंग बता दियौ। कठैई ओहीज तो मसीह कोनीं है?”

30इण खातर भीड़ नगरी ऊं निकळनै यीसु रा दरसण करणै उणरै खनै आवण लागी।

31उणीज वेळा, चेलौ यीसु नै मनवार करी, “हे गुरु, कीं जीमलौ।”

32यीसु जबाब दियौ, “म्हारै खनै ऐड़ौ खाणौ है जिणरै बारै में थै कोनीं जांणौ हो।”

33तो चेला एक दूजा नै पूछण लागा के, “कांई कोई उणरै सारू खावण नै कीं लाया?”

34यीसु चेलौ नै कयौ, “म्हारौ खाणौ ओ है, के म्हैं भेजण वाळा री मरजी रै मुजब चालूं अर उणरौ कांम पूरौ करूं।

35कांई थै कोनीं कैवौ, ‘हाल तांई कटनी मांय, च्यार महीना आडा पड़िया है’? अपांरै च्यांरूमेर खेतो मे निजर घालो, की वे कटनी रै वास्तै पाकोड़ा है।

36फसल काटण वाळा नै मजूरी मिळैला। वे अनत जीवन रौ फळ भण्‍डार मांय भेळा करैला, इण ऊं बीज बावण वाळा अर बाढ़ण वाळा दोनूं नै घणौ आंणंद मिळैला।

37आ बात साची है, ‘बीज बौए कोई और काटे कोई और।’

38म्हैं थांनै उण खेत मांय कटनी करणै भेजिया, जठै थै मेनत कोनीं किनी। दूजौ मेनत किनी अर थै उणरै मेनत रै फळ में भागी होया।”

39उण नगरी रा घणा सामरियो नै उण लुगाई रै कैवण ऊं यीसु माथै विसवास किनो, क्यूंकै उणै आ गवाई दीनी ही, “जिकौ ई कांम म्हैं करिया वो म्हनै सैंग ही बता दियौ।”

40पछै सामरी मिनख यीसु ऊं मिळिया, अर उणनै आपरै गांव मांय पधारण री अरज करी अर यीसु दो दिन तांई उणारै साथै रिया।

41यीसु रा वचन सुणनै वळै ई घणा लोग यीसु माथै विसवास करयौ।

42वे लोग उण लुगाई ऊं कयौ, “अबै म्हौ थांरै कैवण ऊं विसवास नीं करयौ, पण म्हैं खुद इणरा वचन सुणीया, साचांणी यीसु मसीह इज इण जगत रा मुगतिदाता है।”

43पछै उण दो दिनां रै पछै वो उठै ऊं निकळनै गलील री तरफ ग्या,

44क्यूंकै यीसु री खुद री आ गवाई है, की भविसयदाता नै आपरै देस में आदर कोनीं मिळै।

45जद वो गलील में आयौ, तो गलील रा लोग आंणंद रै साथै मिळिया, क्यूंकै फसह रै तैंवार माथै वे लोग यरुसलेम मांय यीसु रा चमतकार देखिया हा, क्यूंकै तैंवार रै वगत वे लोग उठै हा।

46तद वो वळै गलील रै काना नगरी में आयौ, जठै वो पांणी रौ अंगूर रस बणायौ हो, उठै राजा रौ एक सेवक हो जिणरौ बेटौ कफरनहूंम नगरी में घणौ बीमार हो।

47जद वो सुण्यौ के यीसु यहूदिया ऊं गलील में आया है, तो वो उणरै खनै गियौ अर उण ऊं अरज करी, “गुरु, कफरनहूंम मांय म्हारै साथै पधारौ अर म्हारै बेटे नै सावळ करौ, क्यूंकै अबै वो मरण वाळौ है।”

48यीसु उणनै कयौ, “थै म्हारा चिन्ह अर चमतकार देख्यां बिना म्हारै माथै कदैई भरोसौ नीं करौला।”

49राजा रै सेवक अरज करी, “हे मालिक, म्हारै बेटे रै मरणा ऊं पैली पधारौ।”

50यीसु उणनै कयौ, “पाछौ घर जा, थांरौ बेटौ सावळ व्‍हैगौ।” वो परभु यीसु री बात माथै भरोसौ करयौ अर घरै वहीर व्‍हैगौ।

51जद वो मारग मांय हो के उणरा नौकर आया अर उणनै कयौ, “थांरौ बेटौ सावळ व्‍हैगौ।”

52वो नौकरो नै पूछयौ, “वो कीण वगत सावळ हौण लागौ?” वे कयौ, “काले दिन रा एक बजिया पछै बिल्कुल उणरौ ताव उतर गियौ।”

53वो सेवक समझ गियौ की ओ वोहीज वगत हो जिण वगत यीसु कयौ, “थांरौ बेटौ सावळ होय गियौ है।” पछै वो सेवक अर उणरौ पूरौ परिवार विसवास कियो।

54यहूदिया ऊं आया पछै यीसु रौ गलील मांय ओ दूजौ चमतकार हो।

← Chapter 3 Jump to: Chapter 5 →