John 8

Marwari Bible

2संवार रौ वळै वो मिंदर आयौ, सगळा लोग उणरै खनै आया, अर वो बैठनै उणौ नै उपदेस दैणै लागौ।

3उणीज वेळा सास्तरी अर फरीसी एक लुगाई नै पकड़नै लाया जिकौ व्यभिचार करती पकड़ी ही, अर उणनै भीड़ रै बीच ऊभी करनै यीसु नै कयौ,

4“हे गुरु, आ लुगाई व्यभिचार करती पकड़ी हो।

5मूसा रै कायदा मांय म्हौ नै आग्या दीनी है की ऐड़ी लुगाईयां नै भाठा ठोकनै मार देणी चाहीजै। सो थूं इण लुगाई रै बारै में कांई कैवै?”

6उणौ यीसु नै परखणै रै सारू आ बात कही ताकी उण ऊपर दोस लगाणै रै वास्तै कोई बात मिळै। पण यीसु झुकनै आंगळी ऊं धरती माथै लिखणै लाग्यौ।

7जद वे उण ऊं पूछणै लाग्या, तो वो सीधौ होयनै उणानै कयौ, “थौरे मे ऊं जिकौ कदैई पाप नीं करयौ, वोहीज उणनै पैला भाटो मारै।”

8अर वळै झुकनै जमीन माथै आंगळी ऊं लिखणै लाग्यौ।

9पण वे ओ सुणन मोटा ऊं लगायनै छोटौ तांई, सैंग एक एक कर उठै ऊं निकळ गिया, अर यीसु ऐकलौ रिया, अर वां लुगाई जिकौ बीच में उभी ही रैय गी।

10तद यीसु सीधौ होयनै उण ऊं कयौ, “हे नारी, वे कठै ग्या? कांई किणी थनै डंड री आग्या कोनीं दीनी?”

11वां कयौ, “हे मालिक, किणी कोनीं।” तद यीसु कयौ, “म्हैं ई थनै डंड री आग्या कोनीं दूं। जा, अर वळै पाप मती करजै।”

12यीसु वळै लोगां नै कयौ, “जगत रौ उजाळौ म्हैं हूं, जिकौ म्हारै लारै हो जावैला, वो अंधारै मांय कोनीं चालै, पण जीवन रौ उजाळौ पावैला।”

13फरीसियों उणनै कयौ, “थूं थांरी गवाई खुद ही दैवै, इण वास्तै थारी गवाई ठीक कोनीं है।”

14यीसु उणानै जबाब दियौ, “भली ई म्हैं म्हारी गवाई खुद दूं, तौभी म्हारी गवाई ठीक है, क्यूंकै म्हनै ठाह है म्हैं कठै ऊं आयौ अर कठै जावूं हूं। पण थै नीं जांणौ की म्हैं कठै ऊं आयौ हूं या कठै जावूंला।

15थै लोग मिनखां री रीत ऊं न्याव करौ हो। पण म्हैं किणरौ ई न्याव नीं करूं।

16पण जे म्हैं न्याव करूं भी, तो म्हारौ न्याव साचौ है, क्यूंकै म्हैं ऐकलौ कोनीं, पण म्हैं अर म्हारौ पिता है जिकौ म्हनै भेज्यौ है।

17थांरी कायदा मांय भी लिख्योड़ौ है, की दो जणौ री मिळन गवाई ठीक होवै है,

18एक गवाई म्हैं खुद हूं, अर दूजा म्हारा पिता गवाई दैवै जिकौ म्हनै भेज्यौ है।”

19उणौ यीसु ऊं कयौ, “थांरौ पिता कठै है?” यीसु जबाब दियौ, “थै म्हनै अर म्हारै पिता नै कोनीं जांणौ हो। जे म्हनै जांणता तो म्हारै पिता नै भी जांणता।”

20ऐ बातां यीसु नै मिंदर री दांन पेटी रै खनै उपदेस देते वेळा कही, अर किणी कोनीं उणनै पकड़यौ, क्यूंकै उणरौ वगत अजी तांई कोनीं आयौ हो।

21यीसु वळै उणौ नै कयौ, “म्हैं जावूं हूं, अर थै म्हनै सोधौला अर खुद रै पाप में मरोला। जठै म्हैं जावूं हूं, उठै थै नीं आ सकौ।”

22इण कारण यहूदियो कयौ, “कांई वो आपघात तो कोनीं करै, जो कैवै है, ‘जठै म्हैं जावूं उठै थै नीं आ सकौ’?”

23यीसु उणौ नै कयौ, “थै धरती माथला हो, म्हैं उपरलो हूं। थै इण संसार रा हो, म्हैं संसार रौ कोनीं हूं।

24इण वास्तै म्हैं थांनै कयौ, की थै खुद रा पापों रै कारण मरोला, क्यूंकै जठै तांई थै भरोसौ नीं करौला की वो म्हैं इज हूं, तो थै थोरै पापों में मरोला।”

25उणौ यीसु नै कयौ, “थूं कुण है?” यीसु उणौ नै कयौ, “वोहीज हूं जिकौ सरूआत ऊं थांनै केवतो आयौ हूं।

26म्हनै थांरै बाबत घणौ ई कैवणौ है अर न्याव करणौ है, पण म्हनै भेजण वाळौ साचौ है, अर जिकौ ई म्हैं उण ऊं सुण्यौ वो इज जगत ऊं कैवूं।”

27पण वे तौभी नीं समझया की वे आपरै पिता रै बारै में कैवै है।

28तद यीसु कयौ, “जद थै मिनख रै बेटे नै ऊंचाई माथै चढ़ावोला, तो थांनै ठाह पड़ैला के वो म्हैं इज हूं, अर म्हैं अपणै आप ऊं कीं नीं करूं, पण ज्यूं म्हनै पिता सिखायौ, त्यूं ही ऐ बातां कैवूं हूं।

29अर जिकौ म्हनै भेज्यौ है वो म्हारै साथै है, वो म्हनै ऐकलौ कोनीं छोड़यौ, क्यूंकै म्हैं हमेसां वो इज कांम करूं जिण ऊं वो खुस होवै है।”

30तद घणा कर मिनख उणरी ऐ बातां सुणन उणरै माथै विसवास करयौ।

31यीसु यहूदी लोगां नै जिकौ उणारै माथै भरोसौ करयौ उणानै कयौ, “जे थै म्हारी सिकसा माथै चालौला, तो थै म्हारा पका चेला हो।

32अर थै सचाई नै जांणौ ला, अर सचाई थांनै आजाद करैला।”

33उणौ यीसु नै जबाब दियौ, “म्हैं तो अबराहम रै वंस रा हां, अर कदैई किणी रा गुलाम कोनीं रिया। फिर थूं कीकर कैवै है की, ‘थै आजाद हो जावोला’?”

34यीसु उणौ नै जबाब दियौ, “म्हैं थांनै साची-साची कैवूं हूं की जिकौ कोई पाप करै है, वो पाप रौ गुलाम है।

35अर गुलाम रौ मालिक रै घर में हमेसां रैणौ कोनीं होवै, पण बेटे रौ हमेसां रैणौ होवै है।

36इण वास्तै जे बेटौ थांनै आजाद करैला, तो थै साचांणी रा आजाद हो जावोला।

37म्हनै ठाह है की थै अबराहम रै वंस रा हो, तौभी म्हारौ वचन नै थै थांरै हिया मांय नीं उतारिया, इण वास्तै थै म्हनै मारणौ चावौ हो।

38म्हैं वोहीज करूं, जिकौ म्हारै पिता रै उठै देख्यौ है, अर थै वो इज करता रैवौ हो जिकौ ई थै थांरै पिता ऊं सुण्यौ हो।”

39उणौ यीसु नै जबाब दियौ, “म्होरा पिता तो अबराहम है।” यीसु उणौ नै कयौ, “जे थै अबराहम री औळाद होवता, तो अबराहम रै जैड़ा कांम करता।

40पण अबै थै म्हनै मारणौ चावौ हो, जिण थांनै वो साचौ वचन बतायौ जिकौ परमेसर ऊं सुण्यौ हो। पण ऐड़ौ तो अबराहम कोनीं करयौ हो।

41थै थोरै पिता रै जैड़ा कांम करौ हो।” उणौ यीसु नै कयौ, “म्हौ व्यभिचार ऊं कोनीं जनमिया, म्हांरौ एक पिता है अरथ परमेसर।”

42यीसु उणौ नै कयौ, “जद परमेसर थौरा पिता व्‍हैता, तो थै म्हारै ऊं परैम राखता, क्यूंकै म्हैं परमेसर री तरफ ऊं आयौ हूं। म्हैं अठै खुद री मरजी ऊं नीं आयौ हूं, पण उणै म्हनै भेज्यौ है।

43थै म्हारी बात क्यूं नीं समझौ? इण वास्तै की थै म्हारौ वचन सुणणौ ही नीं चावौ।

44थोरा पिता सैतान हो, अर उण जैड़ा भूंडा कांम करणा थांनै चौखा लागै। वो सरूआत ऊं मिनखमार अर सचाई ऊं घिरणा करण वाळौ हो, क्यूंकै सचाई उण में है ई कोनीं। जणै वो झूठौ बोले, तो आपरै स्वभाव ऊं इज बोले है, क्यूंकै वो झूठौ है अर झूठ रौ बाप है।

45पण म्हैं साचौ बोलूं, इण वास्तै थै म्हारौ विसवास कोनीं करौ।

46थारै मांय ऊं कोई ऐड़ौ है जिकौ म्हारै माथै एक ई पाप रौ दोस लगा सकै? तो पछै म्हैं थांनै साची बात कैवूं तो थै म्हारै माथै विसवास क्यूं नीं करौ?

47जिकौ परमेसर री तरफ ऊं होवै है, वो परमेसर री बातां सुणै है। अर थै इण खातर नीं सुणौ की थै परमेसर री तरफ ऊं कोनीं हो।”

48ओ सुणन यहूदियो यीसु नै कयौ, “कांई म्हौ ठीक कोनीं कैवौ की थूं सामरी है, अर थांरै मांय दुस्ट आतमा है?”

49यीसु जबाब दियौ, “म्हारै मांय कोई दुस्ट आतमा कोनीं, पण म्हैं म्हारै पिता रौ आदर करूं हूं, अर थै म्हारौ अनादर करौ हो।

50म्हैं म्हारी महिमा नीं चावूं हूं, पण हां एक तो है जिकौ म्हारी महिमा चावै है अर न्याव करै है।

51म्हैं थांनै साची बात कैवूं, की जिकौ कोई मिनख म्हारै वचन माथै चालै ला, तो वो अनत काल तांई मौत नै नीं देखेला।”

52यहूदियो यीसु नै कयौ, “अबै म्हौ नै पकी ठाह पड़गी के थारै मांय दुस्ट आतमा है। अबराहम मर गियौ, अर भविसयदाता भी मर गिया, अर थूं कैवै है, ‘जिकौ कोई म्हारा वचन माथै चालै ला, तो वो अनत काल तांई मौत रौ स्वाद नीं चाखेला।’

53म्हांरौ पिता अबराहम तो मर गियौ। कांई थूं उण ऊं बढ़ौ है? अर कांई थूं उण भविसयदाता ऊं बढ़ौ है जिकौ मर गिया? थूं अपणै आप नै कांई ठैरावै है?”

54तद यीसु उणौ नै कयौ, “जे म्हैं म्हारी महिमा करूं तो फालतू है। पण म्हारी महिमा करणै वाळौ म्हारौ पिता है, जिणनै थै कैवौ हो की, ‘वो म्हांरौ परमेसर है।’

55अर थै तो उण नै जांणौ कोनीं, पण म्हैं जांणूं हूं। अर जे म्हैं कैवूं के म्हैं वांनै नीं जांणूं हूं, तो म्हैं ई थांरै ज्यूं झूठौ पड़ जावूं। पण म्हैं उण नै जांणूं, अर उणरै वचन ऊपर चालूं हूं।

56थौरा पिता अबराहम म्हारा दिन देखणै री आसा ऊं घणा खुस हा, अर उणै देख्यां अर आंणंद मनायौ।”

57यहूदियो यीसु नै कयौ, “थूं हाल तांई पचास साल रौ नीं होयौ, तो थै अबराहम नै कीकर देख्यौ है?”

58यीसु कयौ, “आ साव साची बात है की अबराहम रै जनमिया ऊं पैली म्हैं हूं।”

59इण बात माथै वे उणनै मारण खातर भाटा हाथ मांय लिया, पण यीसु लुकनै मिंदर रै चौक ऊं निकळ गिया।

← Chapter 7 Jump to: Chapter 9 →