John 12 — Mazanderani WMB (کتاب مقدس به زبان مازندرانی - گویش غربی)

1شِش روز پِش از پِسَخی عید عیسی بِیت‌عَنیایی دِهی دِلِه هَموجِه گه ایلعازَر زندگی کِردِه بیمو، ایلعازَر هَمونیِه گه عیسی وِرِه مِردِگونی جا زینِّه هاکِرد وِه.

2اوجِه ویسِه شُوم هادانِه. مارتا پَذیرایی کِردِه و ایلعازَر هَم یَتِه از اونانی وِه گه عیسایی هَمرا سِفرِه سَر نیشت وِه.

3هَمون موقِه، مریم یَتِه شیشِه سُنبُلِ عَطرِ گِرون قِیمَتِ خالص گه نیم لیتری اَنّا وِه رِه بَیتِه و عیسایی لینگِ وی هَمرا عَطرهاشی هاکِردِه و شی گیسی هَمرا خِشک هاکِردِه. خِنِه عَطری بی ای جا پِر بَوِه.

4ولی یَهودای اَسخَریوطی، یَتِه از عیسایی شاگِردِن گه بَعدها وِرِه دِشمَنی تَسلیم هاکِردِه، بُتِه:

5«چه هَین عَطر گه وی قیمَت سیصَد روز کارگَری دَسمِزی اَنّا وونِه رِه نَروتِنی تا وی پولِ فَقیرِنِه هادین؟»

6وی هَینِسه هَینِه نُتِه گه فَقیرِنی فِکر دَوه، بَلگی چون دِز وِه هَینِه بُتِه، عیسی و شاگِردِنی خَرج و بَرجی پول کیسِه وی دَس دَوِه و یَهودا هون پولی جا دِزِّسِه.

7پَس عیسی بُتِه: «وِرِه کار نارین! تا هَین عَطرِ می دَفنِ روزی سِه دارِه.

8چون فَقیرنِه هَمِش شی هَمرا دارِنی، ولی مِنِه هَمِش نارِنی.»

9جَماعتِ زیادی از یَهودیِن وختی بِشنُسِنِه عیسی اوجِه دَرِه، بیمونِه تا نا فَقط عیسی، بَلگی ایلعازَرِ گه زینِّه هاکِرد وِه رِه هَم بَوینِن.

10پَس، مَعبدی گَت گَتِه کاهنِن نَخشِه بَکِشینِه گه ایلعازَرِ هَم بَکوشَن،

11چون باعِث بَوِه وِه خِیلی از یَهودیِن بورِن و عیسی رِه ایمون بیارِن.

12فَردای هون روز، یَتِخِیلی جَماعت گه عیدی سِه بیمو وِنِه، وختی بِشنُسِنِه عیسی اورشَلیمی سِه اِنِه،

13نَخلی شاخِه ایشونِه شی دَسی دِلِه بَیتِنِه و وی پِشواز بوردِنِه. وِشون دادی هَمرا گِتِنِه: «نِجات هادِه! مِوارَکِ اونیگه خِداوندی اِسمی هَمرا اِنِه، مِوارَکِ اسرائیلی پادشاه!»

14اَزما عیسی یَتِه خَرکِرِّه بَنگیتِه و اونی سَر سِوار بَوِه؛ هَمونجور گه مِقَدّسِ نِوِشتِه هایی دِلِه بَنوِشت بَوِه:

15«نَتِرس، اِی صَهیونی کوهی کیجا! هارِش تی پادِشاه اِنِه، تی پادشاه خَرکِرِّه ای سَر سِوارِه و دِ اِنِه.»

16وی شاگِردِن اَوَّل هَین چیارِه نِفَهمِسِنِه، ولی وختی عیسی بعد از بَمِردَن اَی هَم زینِّه بَوِه، شی یاد بیاردِنِه گه هَینِن هَمه مِقَدّسِ نِوِشتِه هایی دِلِه وی خَوَری بَنوِشت بَوِه وِه، و هَمونجور هَم بَوِه.

17هون جَماعتی گه ایلعازَری داد هاکِردَنی موقه مَقبَرِه ای جا و وی زینِّه هاکِردَن مَرگی جا عیسایی هَمرا دَوِنِه، هَینجوری هَین اتِّفاقِ شَهادَت داوِنِه.

18هَینِسه جَماعت وی پِشواز بوردِنِه گه بِشنُس وِنِه هَین نِشونِه و مُعجِزِه رِه هاکِردِه.

19پس عِلَمای فِرقِه فَریسی هَمدیَرِ بُتِنِه: «وینِنی دِ اَمِه دَس کاری بَر نیِنِه؛ هارشین دِشتِه دِنیا وی دِمال بوردِنِه.»

20اونانی دِلِه گه عیدی عِبادَتی سِه اورشلیمی سِه بیمو وِنِه، بَعضی یونانی وِنِه.

21وِشون فیلیپُسی وَر، گه اَهلِ بِیت‌صِیدا، جلیلی مَنطَقِه وِه، بوردِنِه و وِرِه بُتِنِه: «آقا، خوایمی عیسی رِه بَوینیم.»

22فیلیپُس بوردِه آندریاسِ بُتِه و وِشون هر دِتا بوردِنِه عیسی رِه بُتِنِه.

23عیسی وِشونِه بُتِه: «اِنسونی ریکائی بَمِردَن و زینِّه بَووئَنی موقِه بَرِسیِه.

24حَیقَتاً شِمارِ گِمِه، اگه گَنِّمی تیم گِلی بِن نَشوئِه و نَمیرِه، تَنیا مونِّه؛ ولی اگه بَمیرِه خِیلی بار اُرنِه.

25اونیگه شی جانِ دوس دارِه، اونِه از دَس دِنِه. ولی اونیگه هَین دِنیایی دِلِه شی جانی جا بِگذِرِه، اونِه اَبَدی زندگی ای سِه حِفظ کِنِّه.

26اگه کسی خواینِه مِنِه خِدمَت هاکِنِه، وِنِه می دِمال بیِه؛ و جایی گه مِن دَرمِه، می خادِم هَم اوجِه دَرِه. کسی گه مِنِه خِدمَت هاکِنِه، پیر وِرِه عِزَّت دِنِه.

27«اَلَن می جان پَریشونِ. چی بُئَم؟ یَعنی بُئَم، ”پیر! اونچی ای جا گه خواینِه می سَر بیِه مِنِه نِجات هادِه “؟ ولی مِن هَین کاری سِه هَین دِنیایی دِلِه بیمومِه.

28پیر، شی اِسمِ جَلال هادِه!» اَزما یَتِه صِدا آسِمونی جا بیمو گه: «جَلال هادامِه و اَی هَم جَلال دِمِه.»

29پس جَماعتی گه اوجِه اِسّاوِنِه و هَینِه بِشنُسِنِه، بُتِنِه: «آسِمونی راد وِه.» بَقیِه بُتِنِه: «یَتِه فِرِشتِه وی هَمرا گَب بَزو.»

30عیسی بُتِه: «هَین صِدا شِمِنِه وِه، نا میسِه.

31اِسا هَین دِنیایی داوَری ای موقِئِه؛ و هَین دِنیایی رَئیس شیطان دیرگا دیم بَدا وونِه.

32وختی مِن صَلیب بَکِشی بَووم و زَمینی جا بِلَن بَووم، دِشتِه مَردِنِ شی سَمت کَشِمِّه.»

33عیسی هَینِه بُتِه تا نِشون هادِه قَرارِ چِتی بَمیرِه.

34پس جَماعت وِرِه بُتِنِه: «طِبقِ اونچی توراتی جا بِشنُسِمی، مَسیحِ موعود تا اَبَد زینِّه مونِّه، پَس چِتیِه گه گِنی اِنسونی ریکا وِنِه مَصلوب بَوو؟ هَین اِنسونی ریکا کیِه؟»

35عیسی وِشونِه بُتِه: «نور اَقَدّی دییَر شِمِه هَمرا دَرِه. پَس تا وختی گه حَلا نورِ دارِنی راه بورین، نَکِنِه تاریکی شِمِه دُورِ بَیرِه. اونیگه تاریکی ای دِلِه راه شونِه، نَئونِه کِجِه شونِه.

36تا وختی گه نورِ دارِنی نورِ ایمون بیارین تا نوری وَچیلِه بَووئین.» عیسی وختی هَین گَبِارِه بَزو، اوجِه ای جا بوردِه و شِرِه وِشونی جا قایِم هاکِردِه.

37با هینگِه عیسی خِیلی نِشونِه و مُعجِزِه وِشونی چِشی وَر هاکِرد وِه، حَلا وِرِه ایمون نیاردِنِه.

38هَینجوری بَوِه گه اِشعیای پِیغَمبَری گَب اَنجام بَرِسِه گه بُت وِه: «اِی خِداوَند، کی اَمِه پِیغِمِ باوَر هاکِردِه، خِداوندی قِدرَت کِنی سِه آشکار بَوِه؟»

39هَمونجور گه اِشعیای پِیغَمبَر یَجا دییَر بُتِه، وِشون نَتِنِسِنِه ایمون بیارِن، چونگه:

40«خِدا وِشونی چِشِ کور و وِشونی دِلِ سَخت هاکِردِه، تا نَکِنِه شی چِشی هَمرا بَوینِن و شی دِلی هَمرا بِفَهمِن، و می سَمت دَگِردِن تا من وِشونِه شَفا هادِم.»

41اِشعیا هَینِسه هَینِه بُتِه گه عیسایی جَلالِ بَئیِه و وی خَوَری گَب بَزو.

42با هَین وجود حَتّی قومی گَت گَتِه ای جا خیلیا عیسی رِه ایمون بیاردِنِه، ولی فَریسیِنی تَرسی جا شی ایمونِ مِقِر نیمونِه تا نَکِنِه وِشونِه عِبادَتگاهی جا دیرگا هاکِنِن.

43چون مَردِنی تَعریف و تَمجیدِ، خِدایی تَعریف و تَمجید هاکِردنی جا دوس داشتِنِه.

44اَزما عیسی بِلَنِ صِدایی هَمرا بُتِه: «هر‌ کی مِنِه ایمون بیارِه، نا مِنِه، بَلگی اونیگه مِنِه بَرِسانیِه رِه ایمون بیاردِه.

45هر کی مِنِه وینِّه، اونیگه مِنِه بَرِسانی رِه وینِّه.

46مِن هِتی نوری تَرا هَین دِنیایی دِلِه بیمومِه تا هر کی مِنِه ایمون بیارِه، تاریکی ای دِلِه نَمونِّه.

47اگه کَسی می گَبِ بِشنُئِه، ولی اونِه بِجا نیارِه، مِن وِرِه داوَری نَکِمِّه؛ چون نیمومِه هَین دِنیایی مَردِنِ داوَری هاکِنِم، بَلگی بیمومِه تا وِشونِه نِجات هادِم.

48اونیگه مِنِه رَد هاکِنِه و می گَبِ قَبول نَکِنِه، یَت دییَر داوَر دَرِه، هَمون گَبایی گه بَزومِه قیامَتِ روز وِرِه داوَری کِنِّه.

49چون مِن شیجا گَب نَزومِه، بَلگی پیری گه مِنِه بَرِسانیِه شِه مِنِه دَستور هادا گه چی بُئِم و چی ای جا گَب بَزِنِم.

50مِن دِمِّه گه وی دَستور اَبَدی زندگیِه. پَس اونچی گه مِن گِمِه دِرِس هَمون چیِه گه پیر مِنِه بُتِه.»