John 19

Mazanderani WMB (کتاب مقدس به زبان مازندرانی - گویش غربی)

1اَزما پیلاتُس دَستور هادا عیسی رِه بَیرِن و شَلّاق بَزِنَن.

2سَربازِن تَلی ای جا تاجی بِبافتِنِه، وی کَلِّه ای سَر بِشتِنِه و یَتِه اَرغَوونی قَوا وی تَن دَکِردِنِه

3و وی وَر ایمونِه، گِتِنِه: «سَلام بر یَهودیِنی پادشاه!» و وِرِه چَک زووِنِه.

4پیلاتُس یَکَش دییَر دیرگا بوردِه و وِشونِه بُتِه: «هارشین، اَلَن وِرِه شِمِه وَر دیرگا اُرمِه تا دِنّین مِن هیچ جرمی وی مَحکوم هاکِردَنی سِه نَنگیتِمِه.»

5پس عیسی یَتِه تاج تَلی ای جا وی کَلِّه ای سَر و اَرغَوونی قَوا وی تَن، دیرگا بیمو. پیلاتُس وِشونِه بُتِه: «هارشین، هَین هَم هَمون مَردی!»

6وختی مَعبَدی گَت گَتِه کاهنِن و مَعبَدی مأمورِن وِرِه بَئینِه داد بَزونِه، بُتِنِه: «وِرِه مَصلوب هاکِن! وِرِه مَصلوب هاکِن!» پیلاتُس وِشونِه بُتِه: «شِما شِه وِرِه بَوِرین و مَصلوب هاکِنین، چون مِن هیچ جرمی وی مَحکوم هاکِردَنی سِه نَنگیتِمِه.»

7یَهودیِن جِواب هادانِه: «اَما شَریعَتی دارمی، طِبقِ اَمِه شَریعَت وی وِنِه بَمیرِه، چون اِدِّعا کِنِّه خِدایی ریکائِه.»

8وختی پیلاتُس هَینِه بِشنُسِه ویشتَر بَتِرسیِه،

9اَی هَم کاخی دِلِه دَگِرِسِه و عیسایی جا بَپُرسیِه: «تو کِجایی هَسّی؟» ولی عیسی هیچ جِوابی نَدا.

10پیلاتُس وِرِه بُتِه: «می هَمرا گَب نَزِنّی؟ مَگِه نَئونی مِن هَین اختیارِ دارمِه تِرِه آزاد هاکِنَم یا تِرِه مَصلوب هاکِنَم؟»

11عیسی بُتِه: «اگه خِدا هَین اختیارِ تِرِه نَداوِه تو هیچ اِختیاری می سَر ناشتی. هَینِسه اونیگِه مِنِه تی تَحویل هادا وی گِناه ویشترِ.»

12بعد از اون پیلاتُس هَینی دِمال دَوِه گه وِرِه آزاد هاکِنِه، ولی یَهودیِن داد زووِنِه و گِتِنِه: «اگه هَین مَردی رِه آزاد هاکِنی، قیصَری رَفِق نیئی. هر کی پادشاهی ای اِدِّعا رِه هاکِنِه، قیصَری هَمرا مخالِفَت کِنِّه.»

13وختی پیلاتُس هَین گَبِ بِشنُسِه عیسی رِه دیرگا بیاردِه و شی داوَری ای تَختی سَر هِنیشتِه، جایی گه به «سَنگ فَرش» مَعروف وِه و آرامی ای زِوون هونِه «جَبّاتا» گِتِنِه.

14هون روز، یَتِه روز قبل از پِسَخی عید وِه گه یَهودیِن شِرِه پِسَخی عیدی سِه حاضِر کِردِنِه. نَزیکِ ظِهر وِه. پیلاتُس یَهودیِنِ بُتِه: «هارشین، هَین هَم شِمِه پادشاه!»

15وِشون شول هادانِه: «وِرِه بَکوش! وِرِه بَکوش! وِرِه مَصلوب هاکِن!» پیلاتُس وِشونِه بُتِه: خواینِنی شِمِه پادشاهِ مَصلوب هاکِنَم؟» مَعبَدی گَت گَتِه هاکِنِن جِواب هادانِه: «اَما بِجز قیصر پادشاهِ دییَری نارمی.»

16سَرآخَر پیلاتُس عیسی رِه وِشونی تَحویل هادا تا وِرِه مَصلوب هاکِنِن. پس وِشون عیسی رِه بَیتِنِه و بَوِردنِه.

17عیسی شی صَلیبِ دوش بَکشیِه، مَحَلی گه وی اِسم کَلِّه ای کاسِه و آرامی ای زِوون جُلجُتا گِتِنِه بوردِه.

18اوجِه وِرِه مَصلوب هاکِردِنِه. وی هَمرا دِ نَفر دییَر هَم مَصلوب بَوِنِه، و هون دِتا عیسایی دِ طَرَف دَوِنِه و عیسی وِشونی میِن دَوِه.

19پیلاتُسی دستوری هَمرا یَتِه کَتیبِه بَنوِشتِنِه و اونِه صَلیبی سَر بَزونِه. اونی سَر بَنوِشت بَوِه وِه: ’عیسای ناصِری، یَهودیِنی پادشاه.‘

20یَتِخِیلی یَهودیِن هون کَتیبِه رِه بَخونِسِنِه، چون جایی گه عیسی رِه مَصلوب هاکِردِنِه شَهری نَزیکی وِه و هون کَتیبِه آرامی، لاتینی و یونانی ای زِوون بَنوِشت بَوِه وِه.

21پَس یَهودیِنی گَت گَتِه کاهنِن پیلاتُسِ بُتِنِه: «نَنویس’یَهودیِنی پادشاه‘، بَلگی بَنویس هَین مَردی گِتِه مِن یَهودیِنی پادشاهمِه.»

22پیلاتُس بُتِه: «هر چی بَنوِشتِمِه دِ بَنوِشتِمِه.»

23وختی سَربازِن عیسی رِه مَصلوب هاکِردِنِه، وی جِمِه رِه بَیتِنِه چار قِسمَت رَسَد هاکِردِنِه و هر کِدیم یَه قِسمَتِ بَیتِنِه، وختی وی قَوارِه بَرِسینِه بَئینِه یَسَرِه هَسِّه و دَرز نارنِه.

24پس هَمدیَرِ بُتِنِه: «هَینِه گِلی نَکِنیم، بَلگی قِرعه دیم بَدیم بَوینیم کِنی وونِه.» هَینجوری مزامیری نوشتِه حَیقَت بَرِسیِه گه: «می جِمِه رِه شی میِن رَسَد هاکِردِنِه و می قَوایی سَر قِرعه دیم بَدانِه.» پس سَربازِن هَینجور هاکِردِنِه.

25عیسایی صَلیبی نَزیکی، وی مار، وی خالِه، و مریم کْلوپاسی زَنا و مریم مَجْدَلیّه اِسّاوِنِه.

26وختی عیسی شی مار و هون شاگِردی گه وِرِه دوس داشتِه رِه بَئیِه هی وَر اِسّانِه، شی مارِ بُتِه: «اِی زَن، هارِش هَین تی ریکا.»

27اَزما هون شاگِردِ بُتِه: «هارِش هَین تی مار.» از اون ساعت هون شاگِرد عیسایی مارِ شی خِنِه بَوِردِه.

28بعد از اون عیسی گه دِنِسِه دِ هَمه چی تُوم بَوِه، اونی وِسِه گِه مِقَدّسِ نِوِشتِه اَنجام بَرِسِه، بُتِه: «مِنِه تَشنیِه.»

29اوجِه یَتِه ظَرف دَوِه گه تِرش بَوِه شَرابی جا مَشت وِه. پس یَتِه اَبر گه تِرش بَوِه شَرابی دِلِه بَزو وِنِه رِه یَتِه زُوفا داری شاخِه ای سَر بِشتِنِه و عیسایی دِهِنی وَر بَوِردِنِه.

30وختی عیسی تِرش بَوِه شَرابِ بَچِشیِه، بُتِه: «تُوم بَوِه.» اَزما شی سَرِ جِر بیاردِه و شی روحِ تَسلیم هاکِردِه.

31چون هون روز، پِسَخی عیدی آمادِه بَووئَنی روز وِه، و روز بعد، یَهودیِنی گَتِ مِقَدّسِ شنبه وِه. یَهودیِنی گَت گَتِ نَخوایسِنِه جَسَدیشون تا فردا صَلیبی سَر بَمونِّه، پیلاتُسی جا بَخوایسِنِه تا هون سِه نَفری لینگی ساقِ بِشکانَن تا بَتِنَّن وِشونی جَسَدِ صَلیبی جا جِر بیارِن.

32پَس سَربازِن بیمونِه و هون دِ نَفری لینگی ساقِ گه عیسایی هَمرا مَصلوب بَوِه وِنِه رِه بِشکانینِه.

33ولی وختی عیسی رِه بَرِسینِه و بَئینِه بَمِردِه، وی ساقِ نِشکانینِه.

34ولی یَتِه از سَربازِن وی پَلی ای دِلِه نیزِه بَزو و دَرجا وی پَلی ای جا خون و اُو دیرگا بیمو.

35کسی گه هَینِه بَئیِه، شَهادَت دِنِه تا شِما هَم ایمون بیارین. وی شَهادَت راسِ. و وی دِنِّه گه دِ حَیقَتِ گِنِه.

36هَینِن اِتِّفاق دَکِتِه تا مِقَدّسِ نِوشتِه حَیقَت بَرِسِه گه: «وی هَسکائیشونی جا هیچکدیم نِشکِنِه.»

37و هَمینجور هَم مِقَدَّس نوشتِه ای یَتِه قِسمَت دییَر گِنِه: «اونیگه نیزِه بَزونِه رِه، اِشِنِنِه.»

38بعد از هَین اِتِّفاقا، یوسِف گه اَهلِ رامَه وِه، پیلاتُسی جا اِجازه بَخوایسِه تا عیسایی جَسَدِ بَیرِه. یوسِف، عیسایی شاگِرد وِه، ولی یَواشکی، چون یَهودیِنی جا تَرسی وِه. پیلاتُس وِرِه اجازِه هادا. پس بیمو عیسایی جَسَدِ بَیتِه.

39نیقودیموس هَم گه پِشتَر شُوئینِه عیسایی وَر بورد وِه، بیمو و شی هَمرا سی کیلو مُر و عود بیاردِه.

40پس وِشون عیسایی جَسَدِ بَیتِنِه، اونِه طِبقِ یهودی رَسم عَطریجاتی هَمرا کَفنی دِلِه دَپیتِنِه.

41اوجِه گه عیسی مَصلوب بَوِه، یَتِه باغ دَوِه و هون باغی دِلِه یَتِه تازِه مَقبَرِه دَوِه گه حَلا مِردِه ای رِه اونی دِلِه نِشت وِنِه.

42پس چون یَهودینی آمادِه بَووئَنی روز، پِسَخی عیدی سِه وِه، و هون مَقبَرِه هَم هَمون نَزیکی وِه، عیسایی جَسَدِ وی دِلِه بِشتِنِه.

← Chapter 18 Jump to: Chapter 20 →