Revelation 10

nyankole

← Chapter 9 Jump to: Chapter 11 →

1Bwanyima nkareeba maraika ondiijo ow'amaani naashuuma naaruga omu iguru. Akaba ayehumbikire ekicu, omuhanganzima gugotsire omutwe gwe, ahamaisho ge nihaaka nk'eizooba, n'amaguru ge gari nk'enyomyo z'omuriro.

2Akaba aine omu ngaro omuzingo gw'akatabo kakuburwire. Yaaribatisa ekigyere kye kya buryo aha nyanja, n'ekya bumosho aha nsi.

3Yaayamuza n'eiraka rihango nk'ery'entare erikutsinda. Ku yaayamwize, enkuba omushanju zaagamba.

4Ezo nkuba omushanju ku zaaherize kugamba, naanye ndangariire kuhandiika, naahurira eiraka niryema omu iguru nirigira riti: Otaata enaama y'ebi enkuba omushanju zaagamba, kandi otabihandiika!

5Reero maraika ou naareebire aribatsi aha nyanja n'aha nsi, yaimutsya omukono gwe gwa buryo agworekyeize eiguru.

6Yaarahira Ruhanga obaho ebiro n'ebiro, owaahangire eiguru n'ensi n'enyanja na byona ebibirimu, naagira ati: Tihaakiriho kukyerererwa!

7Kureka maraika wa mushanju ku araateere enzamba ye, nibwo Ruhanga araahikiirize enaama ye, nk'oku yaakigambiire abaheereza be abarangi.

8Mpaho eiraka ri naabaire naahuriire niryema omu iguru, ryagaruka ryangira riti: Irooko, oyakiire omuzingo, ogukubuururiirwe omu ngaro ya maraika oribatsi aha nyanja n'aha nsi.

9Ntyo ngyenda, mpika maraika ogwo, mmushaba kumpa ogwo muzingo gw'akatabo. Nawe angira ati: Nkako, katware okarye. Omu nda nikaija kukushaarira, kwonka omu kanwa kakunurire nk'obwoki.

10Ntyo nyiha omuzingo gw'ako katabo omu ngaro ya maraika, nkarya. Omu kanwa kannurira nk'obwoki, kwonka ku mpeza kukamira, omunda kanshaarira.

11Reero agambira ati: Oshemereire kugaruka kuranga ebiriba aha bantu b'enganda nyingi, n'aha mahanga n'aha ndimi n'aha bagabe.

← Chapter 9 Jump to: Chapter 11 →