Revelation 5

nyankole

← Chapter 4 Jump to: Chapter 6 →

1Reero omu ngaro ya buryo y'Ogwo osingami aha kitebe ky'obukama, nkareebamu omuzingo gw'ekitabo ekihandiikirwe omunda n'enyima, gukomirwe n'obumanyiso mushanju.

2Bwanyima, nareeba maraika w'amaani, naaranga n'eiraka rihango ati: N'oha oshemereire kushuuruura omuzingo gw'ekitabo n'okubambuura obumanyiso bwakyo?

3Kwonka bambe, tiharabaireho n'omwe omu iguru nari omu nsi, nobu haakuba okuzimu y'ensi, owaabaasize kushuuruura ogwo muzingo nari okugureebamu.

4Naanye nikwo kurira munonga ahabw'okubura oshemereire kushuuruura ogwo muzingo nari okugureebamu.

5Bwanyima omwe aha bakuru bari, yangira ati: Otarira! Reeba, entare y'omu ruganda rwa Yuda, ekitsitsa kya Daudi, akasingura; mbwenu naabaasa kushuuruura ogwo muzingo, n'okubambuura obumanyiso bwagwo mushanju.

6Reero ahagati y'ekitebe ky'obukama n'ebihangwa bina ebihuriire n'abo bakuru, nkareebaho Omwana gw'Entaama ayemereire, ari nk'oitsirwe. Akaba aine amahembe mushanju n'amaisho mushanju; niyo mitima mushanju ya Ruhanga, etumwa omu nsi yoona.

7Ogwo Mwana gw'Entaama atyo agyenda, aiha ogwo muzingo gw'ekitabo omu ngaro ya buryo y'ogwo osingami aha kitebe ky'obukama.

8Ku yaaherize kwihamu ogwo muzingo, ebihangwa bina ebihuriire, n'abo bakuru makumi abiri na bana, byajuumara omu maisho g'ogwo Mwana gw'Entaama. Buri omwe akaba akwaitse ekidongo, n'orwabya rw'ezaabu orwijwire obubaani, nibyo by'okushaba by'abarikwera.

9Batyo baayeshongora ekyeshongoro kisya, nibagira bati: Niiwe oshemereire kutwara omuzingo gw'ekitabo n'okubambuura obumanyiso bwagwo. Ahabw'okuba okaitwa, waacungurira Ruhanga abantu n'eshagama yaawe, ab'omu nganda zoona, n'endimi zoona, n'amahanga goona, n'ebyanga byona,

10Waabahindura oruganda rw'abahongyerezi b'okuheereza Ruhanga waitu, kandi baryategyeka omu nsi.

11Bwanyima, ku naagiire kugira nti, naareeba baamaraika baingi, obukumi n'obukumi, enkumi n'enkumi, beehinguririize ekyo kitebe ky'obukama n'ebihangwa ebihuriire n'abo bakuru.

12Haza naahurira nibagamba n'eiraka rihango, bati: Omwana gw'Entaama owaitsirwe, ashemereire kuheebwa obushoboorozi n'obutungi n'obwengye n'amaani n'ekitiinwa n'okuhimbisibwa n'okusingizibwa!

13Kandi naahurira buri kihangwa kyona ekiri omu iguru n'omu nsi n'okuzimu y'ensi n'omu nyanja na byona ebibirimu, nibigira biti: Ogwo osingami aha kitebe ky'obukama hamwe n'Omwana gw'Entaama nibakasingizibwe, bakaheebwa ekitiinwa n'okuhimbisibwa n'obushoboorozi ebiro n'ebiro!

14N'ebyo bihangwa bina ebihuriire byaikiriza nibigira biti: Kibe kwo! Mpaho abo bakuru baajuumara ahansi, baaramya.

← Chapter 4 Jump to: Chapter 6 →