Revelation 11

nyankole

← Chapter 10 Jump to: Chapter 12 →

1Bwanyima nkaheebwa orubingo rw'okugyeresa, orwemi nk'orubango. Reero haabaho owangira ati: Imuka, ogyere Nyaruju n'eitambiro, kandi obare abarikugiramizamu.

2Kwonka otagyera ekibuga ekyehinguririize Nyaruju. Okirekye, ahabw'okuba kirekuriirwe Abanyamahanga, abaraije kuribatiirira orurembo orurikwera, okumara ameezi makumi ana n'abiri.

3Reero baakareebi bangye babiri ndyabaha obushoboorozi bw'okumara ebiro rukumi na magana abiri na makumi mukaaga, nibaranga obutumwa bwa Ruhanga bajwaire ebiguniya.

4Baakareebi abo bombi nibo miti emioliva ebiri, kandi ebikondo bibiri ebyemerera omu maisho ga Nyakubaho w'ensi.

5Ku haakubaho owaayenda kubakora kubi, omuriro gukaabaruga omu kanwa, gumaraho abazigu baabo. Eego, weena orikwenda kubakora kubi, nawe ashemereire kwitwa.

6Baine obushoboorozi bw'okukinga eiguru, ngu enjura erekye kugwa omu biro ebi barimara nibaranga. Kandi baine n'obushoboorozi bw'okuhindura amaizi eshagama, n'okuteeza ensi orufu rwa ibara muringo, ahi baryendera hoona.

7Ku bariheza kuha obuhamya bwabo, ekinyamaishwa kiryatuuhuuka omu kiina kitaine bugarukiro, kibarwanise, kibasingure, kandi kibaite.

8Reero, emitumbi yaabo egume erambiriraine omu nguuto rugyendwa ey'orurembo orukuru, orurikushushanisibwa na Sodoma na Misiri, oru Mukama waabo yaabambiirwemu aha musharaba.

9Abantu batari bamwe, ab'enganda n'endimi n'amahanga, baryamara ebiro bishatu n'ekicweka nibashamaarira emitumbi yaabo, batarikwikiriza ku eziikwa.

10Abatwire omu nsi baryabeeraatira, bashemererwe, kandi bahaane ebiconco, ahabw'okuba abo barangi bombi bakaba nibababonabonesa.

11Kwonka ku haahingwireho ebiro bishatu n'ekicweka, omwitsyo gw'amagara oguruga owa Ruhanga gwabataahamu, baayemerera, haza abaabareebire baitwa obwoba.

12Bwanyima abo barangi bombi baahurira eiraka rihango niryema omu iguru, nirigira riti: Nimwinamukye, mwije aha. Batyo baatemba omu iguru bari omu kicu, abazigu baabo nibabareeba.

13Omuri ago magingo haabaho omutsitsa mwingi, kimwe kya ikumi ry'orurembo kyakumbagara; abantu obukumi mushanju baafeera omuri ogwo mutsitsa; reero abaahonokireho baitwa obwoba, baahimbisa Ruhanga w'omu iguru.

14Mbwenu akagwe ka kabiri kaahwa, kwonka aka kashatu nikaija kubaho juba.

15Bwanyima maraika owa mushanju yaateera eye nzamba, haabaho amaraka mahango omu iguru, nigagira gati: Obukama bw'ensi bwahinduka obukama bwa Nyakubaho waitu n'obwa Kristo we, kandi aryaguma aha ngoma ebiro n'ebiro!

16Abakuru bari abiri na bana abashutama aha bitebe byabo by'obukama omu maisho ga Ruhanga, batyo baajuumara, baaramya Ruhanga,

17nibagira bati: Nitukusiima, Mukama Ruhanga Ow'obushoboorozi bwona, iwe oriho, kandi owaabaire oriho, ahabw'okuba otwaire obushoboorozi bwawe obukuru, waaza aha ngoma.

18Abanyamahanga kashanga ekabacwa amaraka, kwonka obunaku bwawe bwahika, obw'okucwera abafiire orubanja n'okubafubira, obw'okuzimuurira abaheereza baawe, nibo barangi n'abarikwera n'abatiina eiziina ryawe, abato n'abakuru; kandi okacwekyereza abarikucwekyereza ensi.

19Bwanyima Nyaruju ya Ruhanga ey'omu iguru yaigurwa, n'eshanduukye y'endagaano ye yaareebeka omuri Nyaruju ye; haza haabaho emirabyo n'okuhinda n'okugamba kw'enkuba n'omutsitsa n'orubaare rwingi.

← Chapter 10 Jump to: Chapter 12 →